Isayas 29 - Fanawbuid tagsibaliwas Fakayabian

Sik Foyungan sabaliwas Erusalem

¹ Yawi nalong te, “Afanyuan Erusalem, Dabid at fagbanwanan fag furuan! Agvd, e fagmafuluni kayu banwa am tagsis furuan.

² Ay dewa katanya, namawayan kway ban kafag furuan, ay at ngay taw gwaywayan ban kabalu. Ay nu sa angku, kafag furuan umkata wa sik fagirugan tagatagukun.

³ Namawayan kwa ban kafag furuan Erusalem. Namaligung au sik ngay turuk ngabat famawayan, ay namungsu au daga sa sangaba day alad laman at fakatoan.

⁴ Kanya ban umrasras wan ay umkata sik labang nu guro sasad daga, gibugan nu kadungug.

⁵ Dewa katanya, umdasug ban sik menit at ngay tagfawayan umkata sik dafug ay kata sik naglayapan takalayug sas tagmara. Ay umfasludan ban masakit takatanya sa anya fagayu.

⁶ Ay au, Yawi at Mabalyanan, namamatang kban furuan Erusalem, ay umdasug kban gasfuan lingsi, ay uig, ay sik awang, ay tagbaribungan fag tagmara, ay fulug, ay tagigang fag afuy.

^7-8 Ngay talun ban at ngay taw at nafawayan furuan Erusalem ay narufa at ngay alad umkalyam kata sik taginfan. Kanya fagayu kata way sik taw takalunus tagtaginfan te, gfangon, ay dewa katanya, nu nfulo kalunus yay gugat, ay kata way sik taw takadanum tagtaginfan te, ginum, ay nu nfulo wan, kadanum yay gugat.”

⁹ Am fag ngay taw Uda, katai yud e nasafulan. Katai yud glag. Alangui ay ranranugani, bunwa aroro nainum am fanlangu.

¹⁰ Aroro Yawi kata nu nafatiug ayu ngabasad. Ay ay ngay taglong kata ay ngay alfuyu ay ay ngay mata, ay dewa katanya, Yawi natabun way.

¹¹ Ay nu sa ayu, kanya fag ngay foyungan kata sik fafil yud marafadan. Ay nu namatap o sa sik taw tagsaful gtap, kanya lumong te, “Duan, kwa mafatap kanya aroro wa marafadan.”

¹² Ay nu namatap o sa sik taw yud saful gtap, kanya lumong te, “Duan, kwa saful gtap.”

¹³ Ay tam Fun glong te, “Kafag ngay taw nu gseg angku ay nu gfauseganan angku sit bibig way lang, ay dewa katanya, at amatanganan ngayayu way angku. Ay nu gseg angku gfaning way taw at suguan.

¹⁴ Nu katanya, gdog kyay nangawat sik madulo fag ngay fakamulun sanya fag ngay taw. Ay umkalyam ban at ke fagsafulun fag ngay taw at nasafulan, ay umkalyam ban tagtogdungug fag ngay taw at fagmatogdungugun.”

¹⁵ Afanyuan am tagsuksuk ay ngay algan sas Yawi. Nu gfakamulun am ay fakamulun si way sad fagmadulumun ay glong am te, “Wa ngap e glag ay we gsaful tam fakamulun.”

¹⁶ Ay amatanganan mabilingan way. O sik takawat bisu katap te, sik lutuk? O sik bisu mafalong way sat nawat anya te, “Bunwa o at nawat angku?” O sik bisu mafalong way sat nawat anya te, “Wo e nasafulan?”

¹⁷ Kadasug ban sik buknga, talun Lebanun at araw umsik masine fag fagtanuman, ay at masine fag fagtanuman umsik araw.

¹⁸ Ginanya ban fag menit, at yud gdungug, gdungug nu e gtap sis fafil. Ay siginans fagmadulumun, at yud glag lumag tua.

¹⁹ Ngay takamababaun ay ngay yud e kwa gdog ban guseganan sas Yawi, Israel at Dius at yud e Malong.

²⁰ Aroro umkalyam wan at madot fag ngay taw ay at ngay takamalingun. Ay umbul ban fagayu takaylat gfakamulun asalanan,

²¹ anggan taglong at yud matuyan sabaliwa tiba, anggan takamuagan laman gfaylatan tagwabilug, ay anggan ngay takamuagan tagfatuyan laman at yud e asalanan fag ngay taw wa umke fagmatuyanun.

²² Nu katanya, Yawi, at nafalangfe Abrayam, glong sas Akub at kasugfunanan te, “Siginan ban katsi, kanya fagayu di e fakaplaun ya ay di e fagafanawaun.

²³ Aroro Akub at ngay kasugfunanan gina lumag ku nafakamulun sa anya, kanya dumungugan tua angku, Akub at yud e malong fag Dius. Ay kanya kalimu tua angku, Israel at Dius.

²⁴ Ngay taw ban at yud saful at matuyan sumaful wan, ay takamayud ban guseganan wan nu e gfoyung anya.”