Isayas 28 - Fanawbuid tagsibaliwas Fakayabian

Sik Foyungan sabaliwas Samarya

¹ Afanyuan Samarya; kanya kata sik sangbo barugwak, tagalangu fag ngay taw Israel at fakamanagsagun. Furuan Samarya sisad datag, sit masine fag daga, dewa katanya, at kasinean kalyam way ban kata sik barugwak takalangke.

² Dungugani fagayu am! Tam Fun Dius e nafalganan sik mabitsug ay sik mabalyanan fag talun at ngay taw at nanrasras ban Samarya. Kanya fag ngay taw kata sik maksvn fag fulug, ay kata sik tagbia fag lugwak.

³ Kanya ban nansiad Samarya, kafag sangbo barugwak, ngay tagalangu fag ngay taw Israel at fakamanagsagun.

⁴ Kanya fag furuan sisad datag, sit masine fag daga, ay dewa katanya, at kasinean kalyam way ban kata sik barugwak takalangke. Kanya ban kata sik tanum igus taguna at rawvg, ay nusnga sinu ban tagdalan sanya ay nalag kafag rawvg namul wan ay kon.

⁵ Ginanya ban fag menit, Yawi at Mabalyanan umkata sik masine fag sangbo barugwak sas fagayu at kinsawad fag ngay taw.

⁶ Ay namon sa sangay tagwabilug sik amatanganan laman matuyan nu gfawabilugan. Ay namabitsug ngay tagulit sanya fag furuan laman namawayan at ngay fawayan.

⁷ Ay dewa katanya, ngay tagfon fanggalangun ay ngay taglong granranugan aroro galangu, ay at ngay amatanganan wa maugali ya. Ay ngay taglong gsalan wan nu gfae masuad at ngay taginfan, ay ngay tagfon fanggalangun wa masine at ngay algan.

⁸ Ay sit ngay fagfangonan mapnu wa fangkok ay we afud ya masine.

⁹ Kafag ngay taw kamayud ay glong te, “Nataw manga Dius at amatanganan sabaliwa antam? O nunda kata yay tam sik ngenge sirut at bagu katabu gsusu? Wain fakatanyaun at foyungan sabaliwa antam?

¹⁰ Nu garingang sa antam we masuad, kata sa sik ngenge sirut nu garingang we masuad.”

¹¹ Kafag ngay taw wa kaylat gdungugan. Nu katanya, Yawi nangaringang sanya fagayu siginan tibak taw tagsaman at fangaringang.

¹² Katatuy Yawi at longan, “Ste ay fagfiangalayan. Am fag ngay mamomuy, fiangalayi.” Dewa katanya, kanya fagayu wa kaylat gdungugan.

¹³ Nu katanya, Yawi at longan sa anya fagayu we masuad, kata sa sik ngenge sirut nu garingang we masuad. Ay kanya fag ngay taw nu glo wan umfuan ay umke fakarukan, ay umsangdaw ay umgamat wan.

¹⁴ Nu katanya, dungugani Yawi at longan sa ayu, am takamalingun fag ngay tagfangguna Erusalem at ngay taw.

¹⁵ Aroro kamatungudun wayam ay glong te, “E nasadian wami sas fakabulun te, ‘Lag gfabul emi,’ ay e nasadian yangay ami sat ngay kinbul at talun te, ‘Lag gtaban emi sanya.’ Nu katanya, wa ban mi e fagafanawaun dewa umdasug nusnge wain fag faurianan kata sik lugwak, aroro gseg wami em fakamuaganun ay em fagfandayaun te, kanya mafalangfe emi.”

¹⁶ Nu katanya, katatuy Yawi tam Fun at longan: “Dungugani fagayu am! Namae fagfatungkudan au gang sas Siun; sik gang maksvn, ay at yud guigan, ay mafanud. Nusnga sinu tagafanud sa anya di ban e fakaplaun.

¹⁷ Kata wayam sik bale ku nainsaful te, o masine wan. Ay gina am gfawabilugan, nasaful au te, wam matuyan. Nu katanya, namalayug au ayu sas fulug ay namalimus sas lugwak ay fakamuaganun ay fagsegun te, mafalangfe ayu.

¹⁸ Dewa katanya, wa ban e tungkul ay nasadian sas fakabulun ay ay nasadian yangay sa sangay kinbul at talun. Aroro gafaurianan ban am gina ngay faurianan andasug kata sik lugwak.

¹⁹ Ay kayu ban menit kadasug sa ayu takatanya, sbalabag ay sad yabi, ay matuyan wan umlimus am.” Gina ban am natogdungug kanya fag foyungan umlimu wam fia.

²⁰ Aroro kata wayam sik taw tagtiug sit munagud fag fagtiugan, ay at umut wa mafaumut anya.

²¹ At matuyan, Yawi namawayan wa fia ayu kata ebi at nafakamulun sas buksul Perasim ay sas datag Gibyun. Namakamulun waban fia at madulo fag fakamulun.

²² Ay katsi, faragangi wan nu kamalingun am, laman di kafamut at faurianan sa ayu. Aroro nadungug kwan siginan tam Fun, Yawi at Mabalyanan at suguan te, kanya rumasras wan fagdaul ay talun.

²³ Dungugani wa fia tuy ku longan.

²⁴ O sik taggamas ggamas way lang gugat ay wa gtanum ya?

²⁵ O nunda nu nafalanu wa at daga, gtanum wan nusnge wain fag bvtang sit mesa fagtanuman?

²⁶ Aroro Dius nafoyung tua anya, nasaful wan at fakamulun ro.

²⁷ Ay nu gruyus tibak rawvg, bunwa at mabyat fag fanruyus, nu bunway sik kayu way at famalang.

²⁸ Trigu nu maruyusan wan, wa gfadog ya gruyus, ligisi laman e fangawat tinapay. Ay at fanruyus sik fagguyudun ke balingkitan, ay dewa katanya at fangguyud fag kabayu wa gligis trigu at rawvg.

²⁹ Kanya fag fagsafulun siginan tuas Yawi at Mabalyanan. Masine at ngay fangatulun, ay maylat at fagsafulun.