Isayas 27 - Fanawbuid tagsibaliwas Fakayabian

¹ Ginanya ban, Yawi gbitbitan at mabalyanan at maruk fag fiso laman namabul Libyatan, kafag ule daul tagalafang sasad dagat.

² Ginanya yangay ban fag menit, nangalubad am sik alubad sabaliwas tanuman wat ubas gina ngayu at narabas.

³ Au wan, Yawi, tagalaga kafag tanuman wat ubas. Gfarugme au gugat, ay gulit kayu menit ay kayu yabi laman di e gfauri.

⁴ Kdi kauri kafag tanuman wat ubas. Ay dewa katanya, nu e lagan au at madugi fag makmak, ggulad kwan ay girug.

⁵ Ay kanya umlangfe tua nu masadi tua sa angku ay get gubuk sa angku.

⁶ Umdasug ban sik menit ngay taw Israel, Akub at ngay kasugfunanan, umke lalid yay kata sik tanum. Ay kanya ban umke ngay sanga, ay umke ngay barugwak, ay rumawvg ngayu, anggan umkapnu sas fagdaul daga.

⁷ Yawi di nafaurianan ngay taw Israel, kata nu gfauri ay nu gfabul at ngay tagfawayan.

⁸ Yawi nafabayan wan at ngay taw nu gatabanan laman gafaurianan. Ay nafalayug anya fagayu sa sik maksvn fag tagmara tagsiginans fakamenitan.

⁹ Kanya ban fag ngay taw nu narasras tua at nawat at fagirugan fag ngay gang, ay nu narufa wan anggan andudug ay gfuan at ngay fagirugan famaebebanglu ay ngay turuk fagtoglagan Asera fag fagsegan, gfalyam kwan at ngay asalanan.

¹⁰ Mabaluanan way lang at maaladan fag furuan, ay we taw ya gbanwan sanya, ay kata way lang sik talun at yud e taw. Sanya at fagnamafangonan way lang ay fagfatiugan at ngay baka. At ngay baka nafamin wan ngay kayu at ngay don.

¹¹ Ay at ngay sanga nu nyango wan, kalifung wan, sik ngay mangena gfaful laman at famaygang. Kafag ngay taw we nasafulan, nu katanya, Dius at nawat anya wa kafanyu ya anya.

¹² Ginanya ban fag menit, Yawi namaful fagayu taw Israel siginans Liskung Eufrates sitsigons fagfamiluganan mamam sis talun Igiptu, kata nu gfaful rawvg gina fanrabasan.

¹³ Ay gina ban e ndungug budyung at awang daul, umfoli ban sas furuan Erusalem tagidapan fag ngay taw Israel, at natabanan sas Asirya ay Igiptu. Ay kanya ban fagayu sumeg Yawi sat yud e malong fag buksul tagsis furuan Erusalem.