Isayas 26 - Fanawbuid tagsibaliwas Fakayabian

Fanseg Dius fag Alubad

¹ Ay ginanya ban fag ngay menit, e nangalubad tuy fag alubad sas talun Uda: Mogat wan tam furuan! Dius nu gfalangfe antam kata sik alad nu gsafung antam.

² Luangi wan furuan at ngay sakbawan laman masakbo at matuyan fag ngay taw tagfaning Yawi.

³ Yawi, foni sik maksvn fag fagmanabayanun sanya fag ngay taw tagamatangan kabavn sabaliwa emu, aroro gafanud tua sa emu.

⁴ Fagayu am afanudi tua gugat sas Yawi, aroro kanya wan sik gang tam fagsarirungan kabavn ban.

⁵ At matuyan, e gfababa wa fia nusnga sinu takamatungudun, ay e rumasras wan at furuan anggan umrapyag sas daga.

⁶ Ay at yud e kwa ebi ay tagafalingunan nansiad wan.

⁷ Ay at matuyan fag ngay taw at dalan madatag tua, ay o wan, Dius at Matuyan at nafadatag.

⁸ Yawi, nafaning wami fagayu am ngay suguan, ay gafanud wami sa emu. Em fakaylatun namauseganan wami emu.

⁹ Sad yabi grvbvy au emu sas fagdaul ku amatanganan. Am ngay balyawvtan matuyan tua, ay fagayu taw sas fagdaul daga, sumaful tua at matuyan fag ugali.

¹⁰ Dewa o kafanyu at mauri fag ngay taw, wa gugali at masine. Dewa gbanwan magamut sit masine fag ngay taw, gfataglayun yay gugat nu gfakamulun at mauri, ay wa natoglag am fagmabalyananun.

¹¹ Yawi, nafalganan wo laman namauri anya, ay dewa katanya, wa nasaful. Yawi, foyungi anya. Faplani anya laman lumag te, se aksvn nu kesug o am ngay taw. Famini wan am ngay tagfawayan siginans afuy.

¹² Yawi, nafae fagmanabayanun tuo emi, aroro fagayu em nafakamulun, siginan tua am gubuk.

¹³ Yawi em Dius, tibak dius gfagtainan yay emi, ay dewa katanya, o way lang em fagnansegan.

¹⁴ Katsi kanya fagayu anbul wan ay wa ban gdog gleleg. Nafaurianan o anya anggan anbul ay we gamatang ya anya.

¹⁵ Yawi, nafabia tuo em talun, ay nafadugdug tuo em ngay taba daga, ay aroro katanya gfauseganan tuami emu.

¹⁶ Yawi, nafaurianan o am ngay taw, ay gina gaidapan, nanangakbang tua sa emu ay nadarangin tua.

¹⁷ Yawi, glag tuo em fagidapun. Kata wami sik mangena tagfasalug nu guro aroro maksvn nu kasait.

¹⁸ Nafandeng ami aroro gidapan ami, ay dewa katanya, wami e nafasalug. Wami e nafakamulun laman gfalangfe ami em talun, ay wami nafasalug tagbanwan ban ste swa daga.

¹⁹ Dewa katanya, gdog yay ban gleleg am ngay taw at kinbul. Ay at ngay mabulan ban umlunggung yay ay nangalubad guseganan. Nu setain nu gfae damug o sas daga, o yangay tagfadog gfaleleg fagayu kinbul.

²⁰ Fagayu am ku ngay kaiban, sakboi wan sa ay ngay bale ay dingdingi wan ay ngay sakbawan. Suksuani yakmay anlangfe Yawi at dotama.

²¹ Aroro kanya umdasug siginan at fagbanwanan laman namauri fagdaul daga at ngay taw aroro at ngay asalanan. Daga namalfas yay ban at kinbul fag ngay taw, ay wa ban gdog ya nanuksuk.