Isayas 25 - Fanawbuid tagsibaliwas Fakayabian

Segi Tam Dius

¹ Yawi, o wan ku Dius! Gseg au ay gfauseganan emu aroro madulo am ngay fakamulun. Nafafasludan tuo fagayu am ngay algan siginan ngay ebi taguna.

² Narasras wo at maaladan fag ngay furuan sa tibak talun. Ay narasras wo yangay tibak talun at ngay taw at mogat fag furuan, ay wa ban e gdog ya nangawat.

³ Nu katanya, sik mabalyanan fag ngay taw gfauseganan tua ban emu ay ngay talun at ngay taw at madot sumeg tua ban emu.

⁴ O wan tagbalabag at ngay tagafalingunan ay tagfon at nayudanan gina e fagidapun fag buknga. O wan at fagsarirungan gina e fulug ay gina masugba. Aroro at madot fag ngay taw nu kadasug kata sik fulug nu gfalang sas alad,

⁵ ay kata sis talun matat fag masugba. Dewa katanya, mafafaragang tuo tibak talun fag ngay taw nu gfanguroan. Ay mafafaragang tuo at madot fag ngay taw nu gfangalubadan, kata sik masugba nu kalyam aroro linyabu nafarum.

⁶ Ste sbuksul Siun, Yawi at Mabalyanan e nafalganan sik yafun daul sas fagayu taw. Kanya nafalganan at mayayum fag ngay fakonun ay fag ngay fanginum.

⁷ Ay ste yay fag buksul, Yawi nu gfalyam fagayu talun at ngay taw at fakabaluun.

⁸ Yawi tam Fun namalyam waban fakabulun ay rumarus wan fagayu taw at liasun. Ay namalyam waban sas fagdaul daga at ngay taw at fakaplaun. Umfasludan waban fia takatanya aroro Yawi wan at ke longan.

⁹ Ay nu nfasludan waban takatanya, at ngay taw lumong te, “Kanya wan tam Dius! Nafanud tam sa anya, ay nafalangfe antam. Kanya wan Yawi ay nafanud tam sa anya. Guseganan watam ay gseg anya, aroro kanya nafalangfe antam.”

¹⁰ Matuyan wan Yawi gumubuk wa fia ste fag Buksul Siun, ay dewa katanya, namaurianan waban ngay taw Muab. Yawi ban nansiad Muab kata sik nagutan sas fagukasan ifut.

¹¹ Ay dewa katanya, kafag ngay taw namabulun yay ban nangalangfe kata sik taw tagakalubgubun. Ay dewa katanya, dewa saful gfioan, Yawi namalubgub yay anya. Ay namababa ban anya aroro kamatungudun.

¹² Ay rumasras ban tangabat ay at maksvn fag alad anggan umrapyag sas daga.