Isayas 23 - Fanawbuid tagsibaliwas Fakayabian

Sik Foyungan sabaliwas Tiru ay Sidun

¹ Katatuy at foyungan sabaliwas Tiru: Waywayi wan fagayu am tagsakay sis Tarsis at ngay tagbia fag sakayan lino, aroro anrasras wan at fakatungkudan sis Tiru. Katanya ngay taw Sipre at foyungan ayu.

² Ay fagayu am tagbanwan sis tigyangan dagat, lag garingang, anggan fagayu am tagfaebayad sas Sidun. Ngay tagsakay

³ nadife dagat laman namul ay namae bayad at ngay nagutlu siginans Sikur sas Liskung Nilu. Ay fagayu taw siginan sangay talun, sa tua ayu nu namalao at ngay famalaoun.

⁴ Furuan Sidun, aplai wan, aroro Dagat, am mogat fag fagsarirungan glong te, “Kwe sisian; kwa batang nafagurang sisian, mangama man ay mangena.”

⁵ Ngay taw Igiptu kabalu ban nu nadungug at kinfasludan sas Tiru.

⁶ Waywayi wan, fagayu am tagbanwan sa sangaba tigyangan dagat. Difei wan sas Tarsis.

⁷ Ebi, manabayan tua furuan Tiru, tangaduge wan nu mawatan. Ay at ngay taw nadasug tua sa tangayayu fag talun ay nagbilug wan sanya at ngay daga. Dewa katanya, amatangani at kinfasludan katsi.

⁸ Sinu at nafalganan takatanya sas Tiru? Kafag furuan at naago tibak furuan, ay at ngay tagfaebayad takadungug sas fagdaul daga.

⁹ Yawi at Mabalyanan at ke algan takatanya, laman namatong takamatungudun tagseg at kamasinean, ay laman gfamababaun ngay takadungug sas fagdaul daga.

¹⁰ Am fag ngay taw Tarsis, tanumi sa ay daga sis tigyangan Liskung Nilu, aroro sis Tiru, we fakatungkudan ya sakayan lino.

¹¹ Yawi nafalugde at take sas dagat baliwa ay nauig wan fagayu at fagfagtainanan. Ay nasugu te, rasrasi wan Kanaan at fagnangakbangan fag furuan.

¹² Yawi nalong te, “Furuan Sidun at ngay taw, wa ban am manabayan ya. Anrasras wam! Dewa am lumagyu sas Sipre, wa ban am gugat manabayan sanya fag furuan.”

¹³ Fagayu am, damai talun Babilunya. Dada wan tagbanwan sanya? Taw Asirya narasras wan at maksvn fag afud, ay nafabayan wan nu marasrasan ay tagbanwan sanya, ngay mela way lang.

¹⁴ Waywayi wan, fagayu am tagsakay sis sakayan lino tagsas Tarsis, aroro anrasras wan ay fagnangakbangan fag furuan.

¹⁵ Wa ban e gamatang ya Tiru kaduge fituk safuluk banwa, at kadugayan sik fun nu gleleg. Ay nu nlangfe kadugenya, Tiru umkata sik tagfaebayad fag mangena, gfaning tuy fag alubad: “Tagfae bayad fag mangena, katsi nalyam wo.

¹⁶ Nu katanya, buli yap am fagfawangun ay fawangi fasineuni kaduge o glulian sanya fag furuan. Alubadi gugat laman ban e gamatang tua emu.”

¹⁷ Nu ntabu fituk safuluk banwa, Yawi nangamatang yay ban Tiru. Ay dewa katanya, Tiru gdog yay gfakamulun kata ebi at fakamulun, kata yay gugat sik tagfaebayad fag mangena. Ay namakamulun at mauri laman umke salapi siginans fagayu talun at ngay taw.

¹⁸ Ay sa ban taguyan, at nafabul fag ngay salapi wa ban namungsu. Kanya ban fagayu sik famonun sas Yawi laman famul ngayuk fakonun ay at masine fag ngay lanbung ay namon sa sangay taw tagfakamulun sas Yawi.