Isayas 22 - Fanawbuid tagsibaliwas Fakayabian

Sik Foyungan sabaliwas Erusalem

¹ Katatuy at foyungan sabaliwa sik tagubungan nu inda Dius gfalag ngay taginfan: Setain katsi takafasludan? Wain ay fagsiun ay tungud bale?

² Ngayuk taw tagaringang ay tagfanguroan guseganan sas fagdaul furuan. Ay ngay iba at kinbul nu kabul, wa sis awayan.

³ Ay ngay tagfangguna nalagyu wan ay tiba natabanan wan. Ay ay ngay iba nalagyu oma, dewa katanya e nagamat yay.

⁴ Fabayani wan nu gwayway au, aroro kabalu au ku ngay kaiban at kinbul. Lag am gfasun ya angku.

⁵ Aroro tam Fun, Yawi at Mabalyanan, nafalganan sik menit laman ngay taw ban gbarisanan ay glagyu sis tagubungan nu inda nu glag ngay taginfan. Sanya ban fag furuan at ngay alad umrufa wan, ay ngay taw tagbanwan sanya guro sas buksul te, “Gubuki emi.”

⁶ Elam at ngay tagfawayan nu namawayan e ngay godun, ay gsakay sis kabayu at faguyudan fangawayan. Ay anggan Kir at ngay tagfawayan gina namawayan, gfalganan at mesa famalabag.

⁷ Kanya fagayu matunglu sit fakesugun fag ngay datag, ay kafag ngay tagakabayuan maful si ay sakbawan furuan alad,

⁸ ay naago Uda at ngay famalabag. Nabul am ay ngay famalabag siginans Sulumun at bale.

⁹ Ay nananlag am Dabid at Furuan at ngay alad laman sumaful am te, sedaul at kinrasras. Ay nafaful am mamam siginans bunaw.

¹⁰ Ay nadama yangay am Erusalem at ngay bale, ay naiklas am tibak bale laman namul gang sanya ginan, laman gfasine at kinrasras fag ngay afud alad.

¹¹ Nawat yangay am sik fagfungsuan mamam sis buknga alad, ay nafapnu am mamam siginan at dan fag fagfungsuan. Ay dewa katanya wam nasaful te, Dius tua at ke algan takatanya siginan ebi, laman umfasludan takatanya.

¹² Ay tam Fun, Yawi at Mabalyanan, nafaidapan ayu laman umke fakabaluun am, ay gwayway am, ay gfalanu ay ngay alfuyu, ay nangalanbungan am saku laman sik fagtoglagan te, kabalu am.

¹³ Abat ngate, guseganan yayam. Nanfilas tuam sik ngay baka ay sik ngay tupa, ay guseganan wam gfangon ay ginum. Aroro nalong am te, “Guseganan way tam, gfangon ay ginum tam, aroro didayu umbul ban tam balabag.”

¹⁴ Yawi at Mabalyanan nalong sa angku te, “We famalyam ya ay asalanan kaduge ban am gleleg.”

Sik Foyungan sabaliwas Sebna

¹⁵ Ay tam Fun, Yawi at Mabalyanan nasugu angku laman nanlag au sas Sebna fag tagulit fun at bale daul, laman glong sa anya te,

¹⁶ “Sinu at nasugu emu te, nangali o sa sangaba tigyangan buksul laman ban am fagnamolian emu, magamut at kinbul fag ngay taw takadungug?

¹⁷ Dirii! Dewa o mabalyanan katsi, Yawi ban nanggamat ay nangukas emu,

¹⁸ ay namabul ay nangukas emu sa tagbia fag talun. Sanya ban nu kabul o ay anggan am fagfanagsagun fag ngay fagsakayan nu karasras, ay gfae fakaplaun ban o am tagfayafun.”

¹⁹ Yawi nalong sa emu te, “Nangaiyan kban emu siginan am fakamulun.

²⁰ “Ginanya ban fag menit, namasanya au ku filian, Elyakim, Kilkya at baguama.

²¹ Ay namasulun au sa anya am lanbung anggan am ginawang, ay namon kwan sa anya am fagmabalyananun. Kanya ban ngay taw Erusalem ay taw Uda at mama.

²² Namon kban sa anya sik fanluang Dabid at fagfagtainanan. Ay gina ban anluang, we taw mafadingding, ay nu nadingding, we mafaluang.

²³ Namaksvn au anya sat fagfagtainanan kata sik maksvn fag fagrabingan sas dingding. Ay kanya ban namae famauseganan sat ngay kalongan.

²⁴ Ay fagayu ban at sisian ay at kalongan sumeg anya. Kanya umkata sik fagrabingan ay sanya nu marabingan nusnge wain fag fagsuadan talay, mangkok ay taya.

²⁵ “Ginanya ban fag menit, kafag fagrabingan umtong, ay fagayu at marabingan sanya umrufa wan. Umfasludan ban katanya aroro Yawi at Mabalyanan at nalong.”