Isayas 21 - Fanawbuid tagsibaliwas Fakayabian

Sik Foyungan sabaliwas Babilunya

¹ Katatuy at foyungan sabaliwas Babilunya: At ngay fawayan ban umdasug kata sik tagbaribungan fag tagmara. Kanya dumalan sas talun Negeb siginans talun at yud e taw siginan sik malimu fag talun.

² Nalag au sik malimu fag taginfan sabaliwas fakamaboun ay faurianan. Elam ay Medya, fawayani Babilunya! Dius ban namaragang wan Babilunya nu gfaurianan tibak talun.

³ Katanya ku nalag si ku taginfan, ay anlimu au maksvn ay sik fansait bilug andasug sa angku, kaksvn sik mangena nu gidapan gina gfasalug.

⁴ Ku baga gsubsubuan ay gtadtaruyan au kalimu. Kwa manabayan sad yabi aroro kalimu kway gugat.

⁵ Sis Babilunya at ngay fagtainan gfalganan sik yafun daul, ay nasagmak sanya at ngay faglunggungan, ay kanya fagayu gfangon ay ginum. Ay e nauro te, “Falganani wan! Namawayan wam.”

⁶ Tam Fun nalong sa angku te, “Filii sik tagulit at furuan laman gfoyung nusnga setaw at nalag.

⁷ Masine sa sik tagulit nu mafalganan tua gugat ay nu namoyung vtv nu nalag te, e ngay faguyudan fangawayan ay e ngay kabayu gadgaloan mesa dua, ay e ngay tagfawayan gsakay sis ngay asnu ay sis ngay kamelyu.”

⁸ Ay kafag tagulit guro te, “Fagtainan, kayu menit ay yabi ste kway gugat gulit sis bale fagulitan.

⁹ Damai! E kadasug wa ngani sik taw gsakay si sik ngay kabayu at faguyudan. Ay kafag taw glong te, ‘Niklas wan Babilunya! Anggan fagayu at ngay fagsegan narit sas daga ay anrufa wan.’ ”

¹⁰ Ay glong au te, “Ku ngay iba taw Israel, takata sik ngay nagdagamian sis fagruyusan, gfoyung au sa ayu ku ngay nadungug siginan Yawi at Mabalyanan, Israel at Dius.”

Sik Foyungan sabaliwas Edum

¹¹ Katatuy at foyungan sabaliwas Edum: E sik taw siginans Edum taginto gugat sa angku te, “Tagulit, o glugo yay ro manga nu kamenit?”

¹² Ay nabalus au te, “Gakamenitun wan ay sanya ginan kayabi yangay ro fia. Ay nu kaylat yay ro wo gdog nanginto, afolii yap.”

Sik Foyungan sabaliwas Arabya

¹³ Katatuy at foyungan sabaliwas Arabya: Am fag ngay taw Dedan, taggabanan gadgalinan sas talun Arabya,

¹⁴ foni sik mamam sanya fag ngay taw takadanum. Fagayu am tagbanwan sas Tema, fafangoni sanya fag ngay taw at nalagyu siginan at ngay furuan.

¹⁵ Kanya fag ngay taw nalagyu at maksvn fag awayan ay tagfafalo anya fag ngay taw tagafisoan ay tagagodunan.

¹⁶ Fun Dius nalong sa angku te, “Kaduge way ban sik banwa, ngay taw Kedar at fagmabalyananun umkalyam wan.

¹⁷ Wa ban ngayu at kumsawad at mabalyanan fag ngay tagfawayan.” Yawi, Israel at Dius taglong takatanya.