Isayas 2 - Fanawbuid tagsibaliwas Fakayabian

Fagmanabayanun sas Fagdaul Daga

¹ Katatuy Isayas, Amus at baguama, at nalag fag foyungan sabaliwas Uda ay Erusalem:

² Sa ban taguyan fag ngay menit, Yawi at bale at fagmalindugan fag buksul abat yap ay amafanud yap tua fagayu buksul, ay fagayu ban talun at ngay taw nangaful sanya.

³ Ay kanya ban fagayu glong te, “Bastam sas Yawi at nafili fag buksul, sas Akub at Dius at bale, laman kanya ban gfoyung antam at ngay balyawvtan tam fagnamaningun.” Nu katanya, Yawi ban at foyungan kafagdaul siginans Buksul Siun, tagsis furuan Erusalem.

⁴ Yawi ban nanwabilug ay namasadi ngay talun at taw. Nu katanya, kanya ban fagayu di gawayan ya, ay wa ban gfananad ya laman at namawayan. Ay at ngay fiso tagsumbalian at uyup, nangawat wan fangali daga. Ay at ngay bangko nangawat wan fanggafas.

⁵ Akub at ngay kasugfunanan, nangugali tam kata Yawi at foyungan, aroro at foyungan kata sik yamag sa antam.

Dius Nu Gfaurianan fag Menit

⁶ Yawi, anud, naiyan wo am nafili fag ngay taw, Akub at ngay kasugfunanan, aroro kanya fagayu nafanud sa tibak foyungan tagsiginans fakamenitan fag gaban taw. Ay nafanud yangay sa takamuag fag ngay tagfoyung takadasug, kata ngay taw Filistia. Ay kanya fagayu ansadi sa tibak talun at ngay taw.

⁷ Talun Israel, ngayu at ngay salapi ay gintu, ay wa kamin at ngay ramraman. Ay ngayu yangay at kabayu, ay di katap at ngay faguyudan fangawayan.

⁸ Kanya yay fagayu at nawat at fagfausegananun fag ngay fagsegan!

⁹ Nu katanya, kanya fagayu umfaurianan ay umkapla. Yawi, lag o kafanyu ya anya fagayu.

¹⁰ Ngay taw Israel, glagyu ban am sa sangay luib ay sa sangay alian, laman nanuksuan am Yawi at dotama ay at fagmabalyananun.

¹¹ Ginanya ban fag buknga, Yawi way lang ngay taw at fagfabatun ay at fagfausegananun. Kanya ban gfababa ay gfapla fagayu takamatungudun ay takamanagsag.

¹² Yawi at Mabalyanan nafalganan sik menit laman namaurianan fagayu takamatungudun, ay fagayu taglong te, mabalyanan ami.

¹³ Yawi ban namuan wan fagayu kayu sidru tangabat tagsis Lebanun, ay fagayu kayu daul tagsis Basan.

¹⁴ Kanya ban gfadatag wan fagayu fungsu ay anggan fagayu buksul, kanya fagayu dewa ngabat,

¹⁵ ay nanrasras yangay ban fagayu bale tangabat ay at mogat fag ngay alad.

¹⁶ Kanya ban gfalubgub wan fagayu sakayan lino tagbia ay at masine.

¹⁷ Ay ginanya ban fag buknga, Yawi way lang ngay taw at fagfabatun ay at fagfausegananun. Kanya ban gfababa ay gfapla fagayu takamatungudun ay takamanagsag,

¹⁸ ay fagayu ban at fagsegan umkalyam wan.

¹⁹ Ay ginanya ban, Yawi gfalag at dotama ay at fagmabalyananun siginan nu guig fagdaul daga, ay ngay taw ban lumagyu nansuksuan sa sangay alian ay sa sangay daga luib sa sangay fungsu.

²⁰ Ginanya ban fag buknga, kanya fagayu gukas wan at ngay fagsegan at mawatan sanbung salapi ay gintu. Ay kanya ban fagayu gfamato wan at ngay fagsegan sa sangay but ay sa sangay alebung.

²¹ Ay ginanya ban, Yawi gfalag at dotama ay at fagmabalyananun siginan nu guig fagdaul daga, ay ngay taw ban gfabulun glagyu nanuksuan sa sangay gang tagbia ay sa sangay daga luib sa sangay fungsu.

²² Lag am gafanud ya sa sangay taw, aroro kanya fagayu kabul way kata engasan nu masakit kalyam. Ay wain se mafanud tua nunda sa ayu kanya fag ngay taw?