Isayas 18 - Fanawbuid tagsibaliwas Fakayabian

Sik Foyungan sabaliwas Etiupya

¹ Afanyuan talun at munakbang sis Etiupya fag ngay liskung at tigyangan. Sanya at ngay liung nu glayug, kadungug nu gfawvswvs at ngay fakfak.

² Siginan kafag talun, e nasugu sik ngay taw tagfadasug barita, ay kanya fagayu gsakay si sik ngay sakayan lino mawatan anyamu ay gulitan Liskung Nilu. Fagayu am at matarung fag ngay tagbarita, afolii wan sa ay ngay iba fag ngay tangabat ay madalusan at balat, tagbanwan sa sik talun tangayu at liskung; kanya fag ngay taw mabalyanan ay tibak taw at fakalimuun.

³ Fagayu am tagbanwan sas fagdaul daga, fanyai nu e gfabat sik famasaful fag ramit sas tungud buksul, ay dungugani nu gbudyung.

⁴ Aroro katatuy Yawi at longan sa angku: “Manabayan au gbanawan siginan ku fagbanwanan, kata menit at sugba nu gamgamad kabat swabilug menit, ay kata yangay sik damug kinful gina fanggutluan fag buknga.”

⁵ Gina yud andasug fanggutluan, gina yay ngay barugwak anrabas wan, ay gina yud anlesan at ngay rawvg, glifung wan taglangfad fag ngay sanga.

⁶ Dius ban namamin wan ngay taw Etiupya, ay namaon sa tagsis talun fag ngay mangilafang. Kanya ban ngay manuk tungud at fakonun gina mangune, ay tagsis talun fag ngay mangilafang at fakonun gina abagat.

⁷ Ay ginanya ban, e namuba sik ngay famonun sas Yawi at Mabalyanan siginan sik ngay taw tangabat ay madalusan at balat, tagbanwan sa sik talun tangayu at liskung; kanya fag ngay taw mabalyanan ay tibak taw at fakalimuun. Kanya ban namuba at ngay famonun sas Buksul Siun, sas Yawi at Mabalyanan at fagbanwanan.