Isayas 17 - Fanawbuid tagsibaliwas Fakayabian

Sik Foyungan sabaliwas Damasku

¹ Katatuy at foyungan sabaliwas furuan Damasku: “Dungugani! Wa ban glugo ya Damasku bunwa sik furuan ya aroro umrasras.

² Ay wa ban e gbanwan ya sas Aruer fag ngay furuan. Ay kanya umkata ban sik fagnamafangonan ngay fagbaugun, ay wa ban e namalimu ya kafag ngay fagbaugun.

³ Sis Israel fag ngay furuan at maaladan umrasras wan, ay Damasku at fagmabalyananun umkalyam ban. Ay at kumdasug ban sat ngay kinsawad fag ngay taw Aram kata yangay taw Israel at nadalan ebi. Au, Yawi at Mabalyanan taglong takatanya.

⁴ Ginanya ban fag menit, Israel at fagmabalyananun umkalyam wan, ay at fagmaramramanun gfaungbus sik fagidapun.

⁵ Ay kanya ban kata way sik taggutlu at nagutlu wan, ay kata nu ntabu ggutlu sik gamasun sis datag Refaim.

⁶ Wa ban ngayu takasawad sanya fag ngay taw. Kanya ban fagayu kata sik fun kayu ulibu gina e ntabu ggutlu at ngay rawvg: tibaginan umke sawad yay dua ay mannga tuluk rawvg sa tangabat fag sanga, ay mannga ufat ay limak rawvg sa tibak sanga. Au Yawi, Israel at Dius, taglong takatanya.”

⁷ Ginanya ban fag menit, fagayu ban taw umkakbang sat nawat anya, sas Israel at Dius at yud e Malong.

⁸ Ay gubun ban at nawat fag ngay fagirugan. Ay gubun yangay ban ngay turuk fagtoglagan Asera fag fagsegan, ay anggan at fagirugan famaebebanglu at ngay nawat ebi ataw.

⁹ Ginanya ban fag menit, Asirya at mogat fag ngay furuan umrasras wan ay at ngay taw mubun wan, aroro ngay taw Israel andasug wan. Kanya ban umkata yangay ngay taw Amur ay taw Kib at naubun at ngay furuan.

¹⁰ Ngay taw Israel, umfasludan ban sa ayu takatanya, aroro nalyam am Dius tagfalangfe ayu, ay fagsarirungan fag gang. Nu katanya, ay fananum dewa at mafilian fia, kata way sik ubas siginan tibak talun,

¹¹ at natugbung oma ay at nasariksik gina am gtanum fag menit, wam e faggutluun, abat ngate, nangidapan way ban am sat yud kafia fag anini.

¹² Dungugani! Sik ngay taw ngayu garingang kata sik lugwak nu gfawas.

¹³ Dewa katanya, dewa garingang ngayu kata sik lugwak nu gfawas, kanya ban fagayu lumagyu kaduge Dius gagras anya, kata sik naglayapan tagsis buksul, tagmara nu gfalayug, ay kata sik nagutan tagbaribungan fag fulug nu gfalayug.

¹⁴ Katatuy ban at kumfasludan sa sangay taw at namawayan ay at namangkamul tam ngay ramraman: sisad yabi kamalimuanan, ay balabag di wa sanya ya.