Isayas 16 - Fanawbuid tagsibaliwas Fakayabian

¹ Ngay taw Muab at nalagyu sas Sela fag furuan, sik furuan tagsis tagalagnasun fag talun, foni sik ngay tupa riangan laman famonun sas Erusalem at fun.

² Muab fag ngay mangena tagsis fagdifean Arnun kata sik ngay manuk tungud at nafafadfarang at fakfak aroro e nafalimu siginan at fugad.

³ Taw Muab nalong sa sangay taw Uda te, “Falui emi em fakamulun. Gubuki emi kata sik fun kayu nu glanbung swabilug menit. Nalagyu wami siginan em furuan, ay katsi wami e bale ya. Fasuksuani emi ay lag gfoyung te, ‘Ste ami.’

⁴ Fabanwani emi si ay talun ay balabagi emi siginan sa ngay taw takaylat namabul emi.” Takamalingun ay takamabul umkalyam wan, ay wa ban e gfawayan ya talun Israel.

⁵ Ay Dabid ban at kasugfunanan at sadi nanfunan ke fakesugun ay ke fagmatuyanun. Kanya ban matuyan nu gfawabilugan, ay maseganama nu gfakamulun sat masine.

⁶ Nadungug ami te, maksvn wan ngay taw Muab nu kamatungudun. Maksvn wan nu kamalabi ay nu kamabatun, dewa katanya, we tungkul at fakamatungudunun.

⁷ Nu katanya, ngay taw Muab nanwayway aroro kabalu at furuan. Kanya ban fagayu gwayway gfandeng aroro nalyam wan at mayayum fag ngay fakonun sis Kir-Kareset.

⁸ Anyango wan tagsis furuan Kesbun fag ngay gamasun, anggan tagsis furuan Sibma fag ngay tanum ubas. Sik ngay fun tagsiginan tibak talun nasiad kafag ngay taw at ngay tanum wat ubas, at nadasug sas furuan Aser, ay sas talun at yud e taw, ay at ngay tandug at nalangfad sas Dagat Maraska.

⁹ Nu katanya, gwayway au kata ngay taw Aser, aroro e narasras wan ngay tanum wat ubas sis Sibma. Kabalu au ngay taw Kesbun ay taw Elyale aroro we kadungug ya tagfanguroan guseganan aroro wa nke gutluan.

¹⁰ Nalyam way siginan sa ngay tanuman rawvg fagusegananun, aroro e nafamin wan at ngay masine fag tanuman. Ay we galubad ya ay we gfanguroan sas wa tanuman wat ubas. Ay we fagturisan rawvg laman at fanginum. Yawi nafaragang wan nu guseganan gfanguroan.

¹¹ Nu katanya, kabalu au at kindasug sas Muab kata sik fagfawangun ke ngay bakyang at mabalu fag awang. Ay kabalu kyangay at kindasug sas Kir-Kareset.

¹² Fanlufuy way ngap ngay taw Muab nu gfoyfolian sat ngay bale fagnansegan sa tangabat fag afud daga. Ay anggan we fanambagun nu nanlao gugat sas bale fagnandaranginan laman nandarangin.

¹³ Katanya ebi Yawi at nalong sabaliwas Muab.

¹⁴ Ay katsi, katatuy at longan, “Nu nlangfe tuluk banwa umkalyam wan talun Muab at ngay ramraman, ay fagayu ban at taw umkapla. Wa ban ngayu at kumsawad tagleleg sanya ay kanya ban fagayu momuy.”