Isayas 15 - Fanawbuid tagsibaliwas Fakayabian

Sik Foyungan sabaliwas Muab

¹ Katatuy at foyungan sabaliwas Muab: Kaduge way ban sik yabi nu e grasras furuan Ar ay Kir, talun Muab at fagagbilugun.

² Ay fagayu taw Dibun naundaud sat dius at bale ay sat ngay bale fagnansegan sa tangabat fag buknga laman nanwayway sanya. Fagayu taw Muab kabalu Nebu ay Medeba. Ay fagayu taw tagsanya naufo at alfuyu ay at ngay umi sik famasaful te, kabalu.

³ Ay kaduge glao sa sangaba dalan, galanbungan saku, sik famasaful te, gubun at asalanan. Ay maksvn nu gwayway sit ngay tungud bale ay sis fagaweanan.

⁴ Ngay taw tagsis furuan Kesbun ay anggan tagsis Elyale gwayway wan, ay kadungug sitsigons furuan Yaas. Nu katanya, Muab at ngay tagfawayan nafanguroan aroro maksvn nu kalimu.

⁵ Anbalu au at kinfasludan sas Muab. Fagayu at nalagyu andasug sas Suar ay sas Eglat-Selisya. Fagayu taw gwayway kaduge gundaud sas Luit. Ay tibak taw maksvn nu gwayway gina glao sas Kurunaim, aroro at kinfasludan sa anya.

⁶ Fagayu liskung sis Nimrim anlanggang wan. Ay fagayu at makmak anlangke wan, ay we gtugbung ya.

⁷ Ay nu katanya, nafalin wan sas dife Liskung Arabim at nalufuyan fag ngay ramraman.

⁸ At kaksvnan nu gwayway kadungug sas tigyangan Muab anggan sas Eglaim ay sas Beer-Elim.

⁹ Liskung Dibun ankapnu taguk, ay gtungud yay ban kanya ku fagnamakamulunun. Namasanya au sik liun laman namawayan ngay taw at nalagyu siginans Muab ay anggan fagayu at kinsawad sanya fag talun.