Isayas 14 - Fanawbuid tagsibaliwas Fakayabian

Ngay Taw Israel nu Kafoli siginan at Fagatabananan

¹ At matuyan, Yawi ban kafanyu taw Israel ay gdog yangay nanfili at ngay taw, laman gdog yay namanwan sa ebi at talun, ay e ngay taw siginan tibak talun at magamut sanya.

² Ay tiba bank talun at ngay taw ggubuk taw Israel laman manangafoli sas Yawi at nafon fag talun. Ngay taw Israel ban namagsuguan ngay taw tagsiginan tibak talun, ay tumaban ban at ngay nataban anya, ay namagtainan ebi at ngay nafaidapan anya.

Babilunya at Fun Umbul ban

³ Ngay taw Israel, gina ban Yawi gfafaingalay ayu siginan ay ngay fagidapun ay ay fagafanawaun ay siginan nu gafagsuguanan am,

⁴ namalingun ban am Babilunya at fun. Katatuy ban ay nalong: “Katsi nababawan wan ebi fag fun takamaidapan, ay anragang wan nu kamalingun.

⁵ Yawi nafalyam wan at mauri fag ngay fun at fagmabalyananun,

⁶ kanya fagayu ebi kadotama gugat ay gfaidapan ngay taw, ay maksvn nu gfaurianan tibak talun.

⁷ Sanya ginan ban, fagdaul daga ummanabayan. Ay fagayu ban taw galubad guseganan.

⁸ Anggan ban tagsis Lebanun fag ngay kayu ayu daul guseganan sa kafag fun at nabulanan ay glong te, ‘Katsi anbul wo, wa ban e namuan ya emi.’

⁹ Ngayu tagsi sangay kinbul at fagbanwanan taganamablangun mandi emu. Kanya ebi ste swa daga fag ngay tagfangguna ay fag ngay fun at ngay falad. Kanya fagayu umlindug siginan at mesa faglunggungan laman namablang emu.

¹⁰ Ay kanya fagayu glong sa emu te, ‘Katsi anmomuy wo kata emi, gsud way tam lang.

¹¹ Katsi anbul wo, ay wo e fagmabalyananun ya, ay we famawangan ya tagfauseganan emu. Ay am fagtiugan ay anggan am umut sik ngay ulud way.’

¹² O at nafangayan te, Tagurabas, antong wo siginans banwa. Ay o ebi tagbabo ngay talun at ngay taw, antong wo sas daga.

¹³ Ebi gamatangan o te, ‘Sumakbo au sas banwa, laman nangawat au ku faglunggungan sas tungud Dius at nawat fag ngay galeme. Ay nanmalunggung au sas fawalan baliwa sas tungud buksul nu inda ngay dius nu maful.

¹⁴ Nangabat au sas tungud linyabu, ay umkata au Tiba Tungud fag Dius.’

¹⁵ Dewa katanya, e nabuba way emu sa sangay kinbul at talun, sa tangabasad fia fag lusung.

¹⁶ Kafag ngay taw at mabulan gfadamaun ay glong te, ‘O in oma siring ngay taw sis fagdaul daga at fakalimuun ay at nauig ngay fagfagtainanan?

¹⁷ O nunda siring bunwa in at nafarasras ngay furuan, ay at nafakata talun at yud e taw fagdaul daga, ay at yud nafalfas at nataban fag ngay taw?’

¹⁸ Ngay fun at mabulan sas fagdaul daga manabayan tua sit mesa fagfolian.

¹⁹ Ay dewa katanya o, e nangukas ban emu kata sik sanga at yud e fanambagun. Ay at fantabun ban am bilug sik ngay tagfawayan at bilug at kinbul sas awayan. E namatong ban emu sasad lusung gasfuan ngay kinbul sis awayan, ay nanalfi emu ngayuk gang. Kata yangay o sik mabulan fag taw at nasiadan ngay taw.

²⁰ Wa ban e namoli ya emu kata tibak fun, aroro o yay at narasras am talun ay at nafabul am ngay taw.” At mauri fag ngay taw wa ban e kasugfunanan ya kabavn.

²¹ Falganani sik afud talun fagfabulan fagayu at ngay sisian aroro at ngay mangaguyang anke asalanan. Wa ban masine ya nu gdog namagtainan, ay nu nangawat sik ngay furuan ayu daul sas fagdaul daga.

²² Yawi at Mabalyanan nalong te, “Rumasras kban talun Babilunya. Kwa ban gfasawad ya tagleleg sanya fag talun, ay wa ban umke sawad nusdi sadi at kasugfunanan.

²³ Ay fagdaul ban talun Babilunya namasik talun au ngay mela at fagbanwanan, ay kata sik bunaw tagamakmakun, ay rumasras kban kata nu e nawaris. Au, Yawi at Mabalyanan, taglong tuy.”

Sik Foyungan sabaliwas Asirya

²⁴ Yawi at Mabalyanan maksvn nu glong te, “Anud, umfasludan ban ku namatangan ay ku ngay algan.

²⁵ Namamin kban fagayu taw Asirya tagsi ku talun Israel, ay nansiad kban tagsanya fag ngay buksul. Namalfas kban ku ngay taw siginan at fagafagsuguananun.

²⁶ Katanya ban ku fagnamakamulunun sas fagdaul daga. Katanya ban ku faurianan ku fagnamalagun sas fagayu talun.”

²⁷ Sinu at mafafaragang Yawi at Mabalyanan at algan? Sinu at manansalag at ngay faurianan?

Sik Foyungan sabaliwas Filistia

²⁸ Gina fun Akas anbul, Dius nafoyung tuy fag foyungan sa angku:

²⁹ “Ngay taw Filistia, lag am guseganan te, anbul wan ebi fag fun at nafawayan ayu, aroro at fantubus anya amafangadotama yap tua at mama, kata sik dot nu nbul, at riangan amaganga yap tua, ay amatarung yap.

³⁰ Ay namafangon au fia ku ngay taw tagafalingunan ay namabanwan manabayan. Ay namabul au am ngay kasugfunanan at kinsawad siginans lunus.

³¹ Am fag ngay taw Filistia, waywayi maksvn, aroro kadasug wan ay ngay fawayan kata sik anus siginans wala fag alvngvdan, ay tanan mabalyanan.

³² Tain ban tam famalus sa kafag talun at ngay nasugu? Tam famalus ban glong tam te, ‘Yawi tua at nawat Buksul Siun, ay at ngay taw tagidapan nu nansarirung sanya wan.’ ”