Isayas 13 - Fanawbuid tagsibaliwas Fakayabian

Sik Foyungan sabaliwas Talun Babilunya

¹ Katatuy Yawi at foyungan sabaliwas talun Babilunya, at nafoyung sas Isayas, Amus at baguama:

² Fabati sik fakatoglagan fag ramit sas tungud buksul at yud e kayu. Ay uroi daul ay yafei sa sangay tagfawayan laman nanakbo ay namawayan at mabalyanan fag ngay taw at furuan.

³ Nasugu au ku nafili fag ngay tagfawayan tagfauri ku fakadotamaun fag ngay taw. Kanya fag ngay tagfawayan gfanagsag te, mafakamulun au.

⁴ Dungugani tagaringang fag ngay taw sa sangay buksul. Dungugani at maful fag ngay fagfagtainanan ay fag ngay talun at ngay taw nu garingang. Yawi at Mabalyanan gfaful ngay tagfawayan laman namawayan.

⁵ Kanya fagayu siginan tangayayu fag ngay talun. Yawi ay at ngay tagfawayan rumasras fagdaul talun.

⁶ Fagayu am waywayi, aroro munakbang wan Yawi at menit, Dius at Mabalyanan nu namaurianan.

⁷ Ginanya ban fag menit, ngay taw ban at ngay take umlukme. Ay fagayu taw ummomuy,

⁸ ay tumadtaruyan kalimu, ay dumalan ban at maksvn fag fagidapun kaksvn sik mangena nu gidapan gina gfasalug. Ay kafag ngay taw dumaddamaan, ay at kaksvnan nu kalimu, at ngay kamatan umraska.

⁹ Fagayu am dungugani! Yawi at menit kadasug wan, ginanya ban fag menit namasure at maksvn at dotama ay at faurianan. Kanya ban rumasras sanya fag daga ay wa ban kabanwan ya, ay fagayu tagasalanan tagbanwan sanya umkamin.

¹⁰ Ngay galeme ban wa gdamlag ya. Ay menit dewa ansure, madulum way, ay magdanun wa gyamag ya.

¹¹ Namaurianan kwan fagdaul daga aroro sat fagmauriun ay anggan ngay tagasalanan aroro sat ngay asalanan. Ay namamin kwan fagayu taw takamatungudun. Ay gfaragang kwan ngay taw nu kamalabi.

¹² Wa ban ngayu ya ngay taw at kumsawad. Kafag ngay taw ban wa kayu ya gintu tagsiginans Ufir.

¹³ Nanguig kban banwa ay fagdaul daga. Ay ginanya ban fag menit, namakamulun au takatanya laman namasure au ku maksvn fag dotama.

¹⁴ Tibak talun at taw tagbanwan sis talun Babilunya lumagyu ban, laman kafoli sat mesa talun kata nu e gfafalo sik arasyo. Kafag ngay taw ban guli kata sik ngay tupa at yud e galaga ya.

¹⁵ Fagayu ban at nagamatan e gurus wan.

¹⁶ Ay e gfafalang ban at ngay sisian sit daga salubangan. Ay e namul ban at ngay ramraman ay e namataladan at ngay bubay.

¹⁷ Fagayu am, dungugani! Sumugu au ngay taw Medya laman namawayan ngay taw Babilunya. Kafag ngay taw Medya wa galabian gintu ay salapi.

¹⁸ Ay kanya fagayu we afanyu ya gfabul taw Babilunya at ngay baguama siginans banyas. Ay wa yangay e afanyu ya sa sangay sisian.

¹⁹ Talun Babilunya amasine yap tua tibak fagfagtainanan. Siginan takatanya, at ngay taw kamatungudun. Dewa katanya, rumasras kban kata Suduma ay Gumura.

²⁰ Ay wa ban e namanwan ya sanya kabavn. Anggan ngay taw Arabya wa ban kaylat ya namale at bale ramit sanya. Ay wa ban e namafangon ya sanya ngay tupa.

²¹ Tagbanwan ban sanya ngay mela way lang. Kata ngay ebo ay tiba yak madot fag ngay mela. Sanya ban ngay kambing talun nu gfanulbuan.

²² Ay ngay idu talun gsubang ay gbanwan sa sangay mogat fag ngay bale ay sa sangay bale daul. Munakbang wan talun Babilunya nu karasras; wa glugo ya.