Isayas 11 - Fanawbuid tagsibaliwas Fakayabian

At Manabayan fag Fagfagtainanan

¹ Dabid at kasugfunanan kata sik nagtudan kayu at natandug. Ay umdasug ban sik fun siginan Dabid at kasugfunanan.

² Yawi at Falad namanwan sa anya. Ay kanya tagfon fagsafulun ay fagmamatanganun, ay fagsafulun nu gfalganan at fagnamakamulunun, ay fagmabalyananun, ay nu gtoglag ay nu gsuyu Yawi.

³ Ay kanya kaylat gfaning Yawi. Ay nu gfawabilugan di kata at nalag ay at nadungug.

⁴ Ay matuyan nu gfawabilugan sat yud e kwa ay ggubuk. Ay siginan at aringang, namaurianan fagdaul daga ay siginan at engasan kanya namabul at mauri fag ngay taw.

⁵ Kanya mafalganan gugat gugali at matuyan ay at mafangesug, kata sik taw tagsulun at famutus at fagwan laman mafalganan namakamulun.

⁶ Sik idu talun ay tupa riangan gudgufudan ban gbanwan. Ay ngay kambing ay ngay kuti daul gudgufudan ban gtiug. Sik riangan baka ban gfasfuan liun at ngay riangan nu gfangon, ay sisian way ban tagalaga.

⁷ Sik baka ay sik usu gasfuan ban gfangon, ay at ngay riangan ban magamut nu gtiug. Ay sik liun kon ban nagutan fare kata sik baka.

⁸ Sik ngenge ban nu gawean dewa munakbang si takamabul fag ule at bale, ay sik sisian ban dewa napkap, di gagatan.

⁹ Wa ban e mananrasras ya Siun, ku filian fag buksul at yud e malong. Aroro fagdaul daga at ngay taw tumoglag ban Yawi, kata mamam nu nkapnu sas dagat.

¹⁰ Ginanya ban fag menit, kafag fun tagsiginans Dabid at kasugfunanan umkata sik famasaful fag ramit sa sangay talun at ngay taw, laman fagayu taw umful sa anya, ay at fagbanwanan fag talun umsik takadungug.

¹¹ Ginanya yangay ban fag menit, Fun Dius gdog yay namasure at fagmabalyananun laman namafoli at sawad fag ngay taw Israel at natabanan sas Asirya, ay sas talun Igiptu, ay sas Patrus, ay sas Etiupya, ay sas Elam, ay sas Babilunya, ay sas Amat, ay sa sangay afud talun swabilug dagat.

¹² Ginanya ban, Yawi namabat at famasaful fag ramit sa sangay taw sas fagayu talun, laman namaful fagayu at kinrapyag fag ngay taw Israel ay Uda siginan tibak afud talun sas fagdaul daga.

¹³ Taw Israel di ban galabian ya ngay taw Uda, ay taw Uda di ban kadotama ya ngay taw Israel.

¹⁴ Ay kanya ban fag ngay taw masadi nu namawayan ngay taw Filistia sas fakayabian, ay anggan ngay taw tagsas fakamenitan, nangago at ngay ramraman sanya ginan fag ngay talun. Ay kanya ban nangagbilug ngay taw Edum ay Muab, ay namagtainan ngay taw Amun.

¹⁵ Yawi ban namatat tagsis Igiptu fag dagat, ay namadasug sik masugba fag tagmara sas Liskung Eufrates laman umke fituk sarangan laman ngay taw madife.

¹⁶ Umke dalan ban laman Dius at ngay taw at kinsawad umkalfas siginans Asirya, kata ebi gina ngay taw Israel glao siginans talun Igiptu.