Isayas 10 - Fanawbuid tagsibaliwas Fakayabian

^1-2 Ida, afanyuan am! Am takawat at yud matuyan fag ngay faugali. Aroro wa matuyan nu gfawabilugan am sa ku ngay taw at yud e kwa ay tagidapan. Ay gbul am anggan ngay fagbubayun ay ngay yud e fagtainan ya at ngay fagagbilugun.

³ Tain ban ay fakamulun nu ndasug nu gafaurianan am fag menit, gina ban faurianan andasug siginan tangayayu fag talun? Dada ban nu get am gubuk? Ay dada ban nu gfasuksuk am ay ngay ramraman?

⁴ Wa ban am e balyawvtan ya sangay at nantudan magamut ngay natabanan ay mannga nantaygilidan magamut at ngay kinbul. Dewa katanya, Yawi at dotama ya nalyam, ay mafalganan yay namaurianan anya fagayu.

Yawi at Faurianan sa sangay Taw Asirya

⁵ Yawi nalong te, “Ida, afanyuan ngay taw Asirya. Kanya ban ku fagnansuguun laman namalag ku fandotaman.

⁶ Gsugu kban anya fagayu laman namawayan ku fakadotamaun fag ngay taw at yud gfaning angku, ay laman nanrasras ay nansiad anya fagayu kata nu gsiad lifak sa sangaba dalan, ay namul yangay ban at ngay ramraman.”

⁷ Dewa katanya, Asirya at fun wa saful te, Yawi at nasugu anya, ay wa kaylat takatanya. Ay kanya nu glong sia wan at narasras ngayuk talun.

⁸ Nu katanya, kanya kamatungudun te, “O nunda fagayu tagfangguna ku ngay tagfawayan wa kata sik ngay fun?

⁹ O nunda wa gsudan at kinfasludan sa ngay furuan Karkemis, Kalnu, Arpad, Amat, Damasku ay Samarya? Narasras kwan kanya fag ngay furuan!

¹⁰ Nafaurianan kwan kafag ngay fagfagtainanan tagseg at ngay fagsegan ngayu! Kafag ngay taw at ngay fagsegan amadulo ay ayu yap tua furuan Erusalem ay Samarya at ngay fagsegan.

¹¹ Nu katanya, nanrasras kyangay ban furuan Erusalem gasfuan at ngay fagsegan, kata nu grasras au furuan Samarya gasfuan at ngay fagsegan.”

¹² Dewa katanya, tam Fun Dius nalong te, “Gina ban antabu nu gagbilug au Asirya at fun nu namafasludan ku algan fag faurianan sas Buksul Siun ay sas furuan Erusalem, namaurianan kyangay ban anya, aroro kanya kamatungudun ay kamanagsag!”

¹³ Aroro Asirya at fun nalong te, “Nafakamulun au takatanya, siginan ku fagmabitsugun ay ku fagsafulun. Nagbilug au ngayuk talun ay at ngay ramraman. Maseganama au ay nababo kwan kafag ngay talun at ngay fun.

¹⁴ Nabul au ngayuk talun at ngay ramraman, kata nu gbul au sik ngay iklug sit yud e glub fag fugad. We nafadfarang ay we narekrek.”

¹⁵ Ay wain? O sik wase ay sik lagari e fagmabalyananun gtungud tagbilug? Ay o sik famalang maurug way tagbitbitan anya?

¹⁶ Nu katanya, tam Fun, Yawi at Mabalyanan, namae fakasaitun ban ngay taw Asirya at ngay tagfawayan at mabitsug, ay namadasug ban sik afuy daul tagigang laman nangirug kafag fun at fagmabitsugun ay at ramraman fagayu.

¹⁷ Yawi wan at yud e malong fag Dius, ay sia wan taw Israel at salung. Kanya kata sik afuy tagigang at nangirug Asirya at fun, kata ngay tanum at madugi nu kairug, kaduge way sik menit.

¹⁸ Nu setain sik fakasaitun nu gfamomuy sik taw at bilug, katanya yangay, Yawi ban grasras wan Asirya at fun at fagagbilugun fag ngay araw ay at ngay tanum tangayu nu grawvg.

¹⁹ Wa ban ngayu ya at sawad ngay fun kayu sanya fag ngay araw. Ay dewa sik sisian sirut mafatap way lang.

²⁰ Ginanya ban fag buknga, ngay taw Israel, Akub at kasugfunanan at kinsawad, wa ban nanseg ya sat nafaurianan anya fagayu fag ngay talun, nu bunway nanseg tua ban Yawi, ngay taw Israel at Dius at yud e Malong.

²¹ Ay at kinsawad ban at ngay amatanganan umfoli sat Mabalyanan fag Dius.

^22-23 Ngay taw Israel dewa ngayu kata lagnas sis tigyangan dagat, wa ban ngayu at kumfoli, nu bunway at kinsawad way lang ban. Aroro mafalganan wan Dius at faurianan sat ngay taw, ay umfaurianan. Anud, tam Fun, Yawi at Mabalyanan, namaurianan wan fagdaul daga, kata at algan.

²⁴ Nu katanya, tam Fun, Yawi at Mabalyanan glong te, “Ku ngay taw tagbanwan sis Siun, lag am kalimu ngay taw Asirya at nafaidapan ayu kata ebi ngay taw Igiptu nu gfaidapan ayu.

²⁵ Aroro wa ban glugo nu kadotama au ayu, ay namadasug au ku dotama sanya fag ngay taw yakmay anbul.

²⁶ Au Yawi at Mabalyanan, gfaurianan kban anya fagayu kata ebi ku nafakamulun sa sangay taw Midyan munakbang sis Gang Ureb, ay kata yangay ku nafakamulun sa sangay taw Igiptu gina au nafalubgub anya fagayu sasad dagat.

²⁷ Ginanya ban fag buknga, gfalfas kban ayu siginan sangay taw Asirya at fagmabalyananun, kata nu e nabul ay famubaun at mabyat, ay at mabyat fag fantungud liug tagsi ay ngay tungud liug. Kafag ngay fantungud liug ban umlifung, aroro kataglu ban am.”

Ngay Taw Asirya nu Gfawayan ngay taw Uda

²⁸ Ngay taw Asirya nafawayan furuan Ayat, ay nataglayun sas Migrun ay nafamato at ngay famubaun sis Mikmas;

²⁹ ay nataglayun glao sas dalan tagsis buknga buksul, ay natiug sis Geba. Ay ngay taw Rama kalimu anya fagayu, ay ngay taw tagbanwan sis Gibya, sis fun Saul at furuan, nalagyu.

³⁰ Ngay taw Galim, uroi! Ay am ngay taw Lais ay am at afanyuan fag ngay taw Anatut, dungugani!

³¹ Ngay taw Madmena nalagyu wan, ay ngay taw Gebim nasuksuan wan.

³² Ginanya fag menit, ngay taw Asirya nangadasug sas Nub ay namasaful te, namawayan Buksul Siun, Erusalem at buksul.

³³ Fagayu am, dungugani! Tam Fun, Yawi at Mabalyanan, namamin fagayu taw Asirya siginan at madulo fag fagmabalyananun kata nu glifung sik sanga kayu. Kanya nafababa at ngay takamatungudun sat iba, kata nu gfuan tangabat fag ngay kayu.

³⁴ Ay kafag ngay taw ban umkamin kata nu gfuan ngay kayu sisad araw. Tam Dius at Mabalyanan namamin ban anya fagayu kata nu gfuan sik fun kayu sis Lebanun.