Filipus 4 - Fanawbuid tagsibaliwas Fakayabian

Useganani sas Dius

¹ Nu katanya, ku fakesugun ku ngay faduksay, faksvni ay fagmasadiun sa tam Fun. Gyalagun au ayu. Am wan ku fagusegananun ay ku fakamatungudunun.

² Am fag duena Eudya ay Sintiki, get au sa ayu te, asadii wan aroro duksay am sa tam Fun.

³ Ay get kyangay sa emu, at matuyan ku taggubuk te, gubuki duena. Aroro kafag duena naugatan nagubuk angku nu gfarapyag au at Masine fag Barita, gadgaloan Kliminti ay e tiba yay ku ufud tagfakamulun, at ngay ngayan marirukan sis fagrirukan at ke leleg ban.

⁴ Kabavn useganani sa tam Fun. Gdog au glong te, useganani!

⁵ Falagi sas fagayu taw ay fagmalukmeun. Munakbang wan tam Fun nu kadasug.

⁶ Lag am gafanawa nusngewain ay fagayudanun, abat ngate, eti way sas Dius siginan ay darangin gasfuan nu guseganan am.

⁷ Nu katanya, Dius at yud e gfasud at fagmanabayanun tagdiri ay amatanganan siginan ay fagmasadiun sa tam Fun Isus.

⁸ Ku ngay faduksay, sat fakatabuan, fabanwani si ay amatanganan at matuyan, ay at mauseganan, ay at yud e kalong, ay at masine, ay at maksvn nu maylat.

⁹ Fakamuluni fagayu ay nasaful, ay nabul, ay ay nadungug, ay ay nalag siginan angku. Nu katanya tua ay fakamulun, Dius takamon fagmanabayanun si tua ayu.

Pablu Guseganan ngay Tagafanud at Fanggubukun

¹⁰ Maksvn nu guseganan au sa tam Fun aroro gdog yayam nafalag sa angku ay fakafanyun at kinlangfe fag ngay menit. Saful au te, diam nalyam angku, dewa katanya, yam karan ggubuk angku.

¹¹ Dewa au glong sa ayu takatanya, kwa grvbvy ay fanggubukun. Annanad kwan guseganan nusnga setaw tagsi angku.

¹² Annanad kwan yud e kwa ay e kwa kman. Annanad kwan nusnga setaw ku kayaunanan, dewa au mapsug, ay dewa au kalunus, ay dewa ngayu ku ramraman, ay dewa kurang way.

¹³ Mafafakamulun au nusnga setaw aroro siginan tam Fun Isus, kanya wan tagfae fagmabitsugun angku.

¹⁴ Ay guseganan au ay nafakamulun aroro nagubuk tuam angku sa ku ngay fagidapun.

¹⁵ Nasaful wam gina am gfasigad gafanud sat Masine fag Barita ay gina au glao sanyaginans Masidunya, am yay lang at kinsadi sa ku fagidapun siginan nu gfon am ay fanggubukun sa angku.

¹⁶ Dewa au sis Tesalunika, ngayu ginan am gfon sa angku ay fanggubukun sa ku fagayudanun.

¹⁷ Dewa katanya, kwa grvbvy ay famonun, nu bunway kaylat au gyalagun ay fakamulun at masine nu kafamut.

¹⁸ Aroro siginan ay fanggubukun, Epafruditu at nafosuk sa angku, nasawe yay sa ku day fagayudanun. Ay famonun sik mabebanglu fag fanggalangun, at maksvn nu masine ay nu maylat sas Dius.

¹⁹ Ay ku Dius yangay tagfon ayu ay fagayudanun fagayu, siginan at fagmaramramanun ay at fagmasineun at yud kamin kabavn siginan tam Fun Isus.

²⁰ Segi tam Dius tam Mama kabavn ban. Anud.

Fakatabuan at Longan

²¹ Longi sas Dius at ngay nafili fagayu, ngay tagafanud sa tam Fun Isus te, O manabayan tuam? Ay anggan tam ngay faduksay ku ufud, katanya yangay at longan sa ayu.

²² Ay tam ngay faduksay tagste, kaugat wan at ngay taggubuk sis talun Ruma at fun at bale daul, glong yangay te, O manabayan tuam?

²³ Sumawa nangus fia ayu tam Fun Isus at fagmagalangun.