Filipus 3 - Fanawbuid tagsibaliwas Fakayabian

Ansik Matuyan siginans Fagafanudun

¹ Ku ngay faduksay, gfataglayun au glong te, useganani sa tam Fun. Kwa kalufuy gdog griruk sa ayu tuy fagayu, aroro sa ay fagmasineun.

² Dirii nusnga sinu fag taw tagugali at mauri kata sik idu, kafag ngay taw gfakamulun at mauri, ay kanya fagayu gfabulun sa sangay yud Udyu te, fae fakatoglagani.

³ Amatangani te, itam wan Dius at ngay sisian, ay gseg tam anya siginan at Masine fag Falad, ay guseganan tam aroro siginan tam fagmasadiun sa tam Fun Isus, ay tam fagsegun bunwa siginans taw at faugali.

⁴ Ay kin, nu siginan di takatanya e fagmafamatungudunun au. Ay tibak taw nu gafanud way sas taw at faugali, au, kaugat wan.

⁵ Aroro anke fakatoglagan au sis fawaluk menit, ay sik taw Israel au, siginans Benamin at kasugfunanan, ku ngay mangaguyang taw Ebreu, ay nu sabaliwa em faugali tam fagkamatoanun, sik taw Fariseu au at maksvn nu gfaning.

⁶ Aroro siginan ku kamaseganaman, nafauri au ngay tagafanud. Ay nafafaning au fia em faugali.

⁷ Dewa katanya, fagayu takatanya ebi ginan ku fagfaningun fia, katsi gfayud kwa e tungkul aroro sa tam Fun Isus.

⁸ Matuyan, we tungkul ya sa angku takatanya fagayu, aroro katsi at mafanud sa angku nu gtoglag ktua ku Fun Isus. Aroro siginan anya, fagayu tagsi angku ebi, gtuyan kwa te, kata way lang sik nakaurian laman tam Fun Isus gbanwan tua si angku,

⁹ ay au, si ktua anya. Kwa ntap kata nu yud au e asalanan siginan ku nafaningan em faugali, nu bunway siginan tua ku fagafanudun sa tam Fun Isus. Ku fagintapun kata nu yud au e asalanan siginan tuas Dius, siginan ku fagafanudun.

¹⁰ Katsi, kaylat au gtoglag tam Fun Isus, ay gyasafulun au at kamabalyananan aroro nadog naleleg, ay kata anya kaylat au nanginkidapan, ay namaning anya anggan sat nabulanan.

¹¹ Ay nu katanya, gseg au te, gdog yay ban gfaleleg angku.

Gfataglayun Au Sitsigons Fakatabuan

¹² Kwa glong te, nabul kwan takatanya fagayu. Ay kwa yangay glong te, matuyan kwan. Dewa katanya, gugatan au namul kanya fag fagmatuyanun, aroro kanya tua tam Fun Isus at fagnauroun angku.

¹³ Ku ngay faduksay, kwa gamatangan te, nabul kwan kanya fagayu. Ku fakamulun katsi gfalyam kwan at kinlangfe, ay gugatan au gyabulun tagsis fagunan.

¹⁴ Gfataglayun au sitsigons fakatabuan laman namul au at famonun fag leleg at yud e fakatabuan, magamut si tam Fun Isus, siginan Dius at nauroan angku.

¹⁵ Katanya nangus tam amatanganan, nu nkaksvn wan tam fagafanudun. Nu dway katanya ay ngay amatanganan, Dius gfayamag yay sa ayu.

¹⁶ At mafanud, fataglayuni nu gugali tam kata tam ngay nasaful.

¹⁷ Ku ngay faduksay, masadii faningi ku ugali, ay faningi yangay tibak taw tagugali kata em nafalag sa ayu fag fagfaningan.

¹⁸ Kata ebi ginan ku longan gugat ayu, katsi galiasun au gdog glong sa ayu te, ngayu yayk taw tagugali gfawayan tam Fun Isus at nabulanan sas fasulungan kayu.

¹⁹ Kanya ban at fungfung fakaminun way, aroro gseg at bilug at fakaylatun. At fagusegananun at mapla way, ay at fagamatanganun tagste way swa daga.

²⁰ Dewa katanya, tam fagbanwanan ban sa tuas banwa. Siginan yangay sbanwa, gfanya tam tam Fun Isus, tam tagfalangfe.

²¹ Nu ndasug ban ginanya fag menit, kanya gtubus tam bilug ste swa daga ay gfafasine ban kata at bilug. Kanya namakamulun takatanya siginan at fagmabalyananun tagfagtainan sas fagayu nusnga setaw.