Filipus 2 - Fanawbuid tagsibaliwas Fakayabian

Famababauni kata Isus

¹ Dakngani maksvn wan ay amatanganan siginan ay fagmasadiun sa tam Fun Isus, ay gsudsunan am sat fakesugun, ay e fagmasadiun tuam sat Masine fag Falad, ay mafanggubuk tuam ay kedkesugan,

² faugati yap ku fagusegananun: masadii tua, ay edkesugani, ay masadii fia ay amatanganan ay anggan ay algan.

³ Fagayu ay fakamulun lag gfaning ay sadili fakaylatun ay lag kamatungudun. Nu bunway famababauni tua, ay amatangani te, em iba amasine yap tua emi.

⁴ Dangay ay sadili fagmasineun ay fagamatanganun, nu bunway amatangani yangay tagfae fagmasineun ay iba.

⁵ Famababauni tua kata tam Fun Isus.

⁶ Aroro dewa si anya Dius at kawalungan, wa nagbilug at fagmadiusun;

⁷ kanya naubun fagayu at fagmadiusun, ay ansik taw fia ay ankata sik fagsuguan.

⁸ Nu katanya, kanya gina sik taw nafamababaun tua, ay sik tagfaning fia anggan anbul sas fasulungan kayu.

⁹ Ay Dius nafabalyanan anya ay nafon at ngayan gtungud yay tibak ngayan,

¹⁰ laman fagayu awatan tagsis banwa ay tagsis daga ay tagsas daga daga nantudan laman gseg anya,

¹¹ ay kanya fagayu gfoyung te, Isus tam Fun, laman gfauseganan Dius tam Mama.

Damlagi Kata Galeme

¹² Nu katanya, ku fakesugun ku ngay faduksay, kata ebi nu gfaning am gugat ku ngay foyungan ayu, faugati yap nu gfaning am deyud au sanya. Alimui tadtaruyani nu gugatan am gfakamulun at masine yakmay am antuyan te, masadi wam,

¹³ aroro Dius tua tagfakamulun gugat sa ayu laman makatu am gfaning at fakaylatun.

¹⁴ Fagayu ay fakamulun dangay am gawayan ay gbadbaboan,

¹⁵ laman katap tuam fia te, Dius am at ngay sisian, at yud e malong, ay sik fagfaningan kaduge am gfasuglatan sit yud matuyan fag ngay taw, ay laman di e kafoyung sas fagayu taw te, ay fakamulun mauri. Nu katanya tua, gdamlag am sas fagayu taw kata galeme nu masulo sis banwa,

¹⁶ kaduge am gbakvd tagfon leleg fag longan. Ay nu katanya tua ay fakamulun, e fakamatungudunun kban gina tam Fun Isus gdog kafoli, aroro saful au te, di ban umfangulan ku ngay nafakamulun sa ayu.

¹⁷ Ay fagafanudun ay ay fagfaningun sa tam Fun kata sik fanggalangun sa anya. Ay ku taguk dewa umbusbus gasfuan ay fanggalangun, guseganan au, ay gfasfuan kban ayu guseganan.

¹⁸ Ay anggan am useganani yangay fasfuani angku.

Timuteu ay Epafruditu

¹⁹ Gseg kwa fia te, tam Fun Isus nu kaylat, gsugu au sa ayu Timuteu laman sumaful au ngay barita sabaliwa ayu laman gfaksvn ku amatanganan.

²⁰ We tibak taw takaksvn nya nu kesug ayu kata nu kesug au ayu.

²¹ Aroro tibak taw at fagugatanun sa way lang at sadili fakaylatun, wa gfaning tam Fun Isus at fakaylatun.

²² Ay dewa katanya, nasaful wam Timuteu at kamatuyanan. Kanya nagubuk angku kamoyung at Masine fag Barita kata sik sisian nu ggubuk at mama.

²³ Gsugu kban anya sa ayu nu nasaful ktua at kumfasludan sa angku ste.

²⁴ Ku fagsegun siginan tam Fun at gubuk umdasug kyangay ban nangus vtv sanya.

²⁵ Ay namatangan au te, gfauli kwa sa ayu Epafruditu, ku faduksay sa tam Fun Isus, ay ku faudgufudan yangay sa ku fakamulun, ay ay nasugu laman taggubuk angku.

²⁶ Kanya maksvn nu gyalagun ayu, ay kabalu aroro nadungug am te, kanya e fakasaitun.

²⁷ Matuyan, kanya anke fakasaitun ay arvs anbul wan. Baliwan tam Dius anfanyu tua anya ay anggan angku, aroro siginan at nafian, nalyam tua nu kabalu au maksvn.

²⁸ Nu katanya, kaylat au gfauli anya sa ayu aroro nasaful au te, maksvn ban nu guseganan am nu nalag am anya. Nu katanya tua, kdi ban gafanawa ya ayu.

²⁹ Aylati fia nu ndasug sanya, aroro kanya tam faduksay sa tam Fun. Ay suyui yangay tibak taw takata anya.

³⁰ Aroro siginan at nainlufuyan gfaning tam Fun Isus, arvs anbul wan, ay at leleg siwas fakalimuun laman gfakamulun sa angku ay fagyudun mafakamulun.