Fangatulun 9 - Fanawbuid tagsibaliwas Fakayabian

Fagsafulun ay Fagyudun Mamatanganan

¹ Fagsafulun, kata sik taw at nawat at bale, at ke fituk turuk.

² Ay kanya nafalganan sik fagusegananun. Ay nafalganan yangay ngayuk fakonun ay at mayayum fag ngay fanginum.

³ Ay nasugu at ngay fagsuguan fag mangena sa tangabat fag afud furuan, laman namasaful te,

⁴ “Am fag ngay taw tagkurang yay ay fagsafulun ay ay fagmamatanganun, Gewan, sa am ku bale.

⁵ Gewan, nangon am ay nanginum ku ngay nafalganan.

⁶ Ubuni wan ay fagyudun e fagmamatanganun, laman ban ngaduge tua nu gleleg am, ay saful tuam gtogdungug.”

⁷ Nu nasalag way o takamalingun, kanya ro gfauri emu. Ay nu nasalag way o at mauri fag taw, kanya ro gfakamulun sa emu at masait.

⁸ Nu katanya, lag o gsalag nusnga sinu fag taw takamalingun, aroro kauri way ro emu. Am fagsalagun nusnga sinu tua at ke fagsafulun, ay kanya ro kesug emu.

⁹ Nu nafoyung o sik taw at ke fagsafulun kafamut ro at fagsafulun. Ay nu nafoyung o sik taw at matuyan, kaugat yay ro at fagsafulun.

¹⁰ “Nu kaylat o kae fagsafulun, suyui tua Yawi. Ay nu gtoglag at yud e malong fag Dius, fakatoglagan te, saful tua gtogdungug.

¹¹ Siginans fagsafulun, ngaduge tua nu gleleg o.

¹² Nu e fagsafulun tuo, mabayan tuo, dewa katanya, nu sik takamalingun way o, gidapan way ban o.”

¹³ Fagyudun e fagsafulun, kata sik mangena at mabarisan yud e fagsafulun.

¹⁴ Ay kanya malunggung sit sakbawan, ay tibaginan sa tangabat fag afud furuan,

¹⁵ ay guro ngay taw taglangfe tagsat mesa fagfakamulunan.

¹⁶ Ay kanya glong te, “Gewan, am at yud e fagsafulun.” Ay nu sat yud saful gtogdungug,

¹⁷ amataba yap at nafangkamul fag mamam, ay amataba yap tagsuksuk nu kon tinapay.

¹⁸ Dewa katanya, ngay taw tagsanya, wa saful te, umbul. Ay fagayu at nasanya, si wa sfagfolian.