Fangatulun 7 - Fanawbuid tagsibaliwas Fakayabian

¹ Ku sisian, amatangi tua gugat ay faningi ku ngay foyungan emu.

² Faningi fia ku ngay suguan emu laman ban ngaduge tua nu gleleg o. Fabanwani si emu ku ngay foyungan, kata nu gdiri o am mata.

³ Amatangi tua gugat, laman di o kalyam.

⁴ Am fagsafulun tuyani te, kata am faduksay mangena, ay am fagmatogdungugun tuyani te, am fagadgalangan.

⁵ Aroro takatanya tagfayayu emu siginan at mauri fag mangena at famaylatanun.

At Mauri fag Mangena

⁶ Nabanawan au si em bale at fagbanawanan,

⁷ ay nalag au ngayuk baguama at yud e fagsafulun, ay at sadi kaugat wan nu yud e fagsafulun.

⁸ Kanya glao sa sik sagbatan, tagsa at mauri fag mangena at bale.

⁹ Ay ginanya gyawyawa wan ay gakadulumun wan,

¹⁰ ay sik mangena nanamablang kafag baguama, ay nu galanbungan kata sik takamatugtug fag mangena. Kanya namatangan wan at fagnamakamulunun ro sa kafag baguama.

¹¹ Kafag mangena mabarisan, ay wa gfangapla, ay wa kagwanta sit bale.

¹² Ay kanya malayun nu kalag si sangay dalan, ay si sangay sagbatan, ay si sangay fagaweanan.

¹³ Ay baguama nu nkakbang, kafag mangena nayuk wa vtv, ay wa kapla ya glong te,

¹⁴ “Nafafasludan kwan ku fatuyanan nu namon au fanggalangun, ay si ku bale, ngayu at yamas, ku fanggalangun at nagsawadan.

¹⁵ Nananrvbvy au emu, ay fadi, nalag ktua emu.

¹⁶ Naigyan kwan ku fagtiugan sik ramit masine, ay kafag ramit siginan yay stalun Igiptu,

¹⁷ ay naugwag au sanya famaebebanglu fag lune, ay sikya, ay tiba yak famaebebanglu.

¹⁸ Nu katanya, gewan wan, nantaladan wata fagngabak yabi,

¹⁹ aroro ku indugan wa ste ya, nalao wan sa tangayayu fag talun.

²⁰ At buba salapi ngayu tua, ay ya ban guli yakmay anlangfe duak linggu.”

²¹ Nu katanya, kanya nafaylatan kafag baguama siginan at ngay longan at masine.

²² Ay kafag baguama nanangalo kata sik baka nu gatabanan sas fagfilasan, ay kata sik arasyo nu glao sa sik sangdaw,

²³ ay sanya wan kanya nu gafanan, ay antalfus sat baga. Ay kata yangay sik manuk tungud masakit nu nangadasug sa sik litag sat fagnangabulan, dewa katanya, kanya wa nasaful.

²⁴ Nu katanya, ku ngay sisian, dungugani fia ku ngay longan.

²⁵ Lag am gafaylatan takatanya fag mangena, ay lag am gfabayan kanya nu gfalyam ayu.

²⁶ Ngayu wak mangama at kinfaurianan, aroro siginan kafag mangena.

²⁷ Nu nasa wayam at bale, kata wa nu nalao am sat ngay mabulan at talun.