Fangatulun 3 - Fanawbuid tagsibaliwas Fakayabian

Famamut Fagsafulun at Kamafanudan

¹ Ku sisian, lag o kalyam ku ngay foyungan emu. Fasii tua gugat am amatanganan ku ngay suguan.

² Nu katanya, ngaba tua ban am leleg ay di ban o e fagayudanun ya.

³ Kabavn mafangesugi ay matuyani tua, lag kalyam, ay fasii tua gugat am amatanganan.

⁴ Nu katanya tua am fakamulun, Dius ay anggan fagayu taw guseganan.

⁵ Afanudi tua gugat sas Yawi sas fagdaul am amatanganan, ay lag o gseg am sadili fagsafulun.

⁶ Amatangi tua Yawi sas fagayu am fakamulun, ay kanya gfoyung emu sat matuyan fag dalan.

⁷ Lag o gamatangan te, e fagsafulun wo, suyui tua Yawi, ay lag gfakamulun at mauri.

⁸ Aroro katanya tua tagfae fagmanabayanun ay tagfabitsug emu.

⁹ Fauseganani Yawi siginan nu gfon o am ramraman, ay nu gfon o am gutluan taguna fag rawvg.

¹⁰ Nu katanya tua ban am fakamulun, am gutluan umkapnu sam bale famoy, ay am fanlangu di kamin.

¹¹ Ku sisian, lag o kauri Yawi nu gsalag emu, aroro kanya tagfasine am ugali.

¹² Aroro Yawi gfasine at ngay fakesugun fag ngay taw at ugali, kata sik mama nu gfoyung at fakesugun fag sisian.

¹³ Mauseganan sik taw ke fagsafulun ay fagmatogdungugun,

¹⁴ ay kanya amafanud yap tua sanbung salapi ay gintu,

¹⁵ ay gtungud tua sas nusnga setaw at mafanud fag ngay gang. Ay nusnge wain we mafasudsudan tuy.

¹⁶ Nu katanya, kanya gfaba tua am leleg, ay gfae ramraman emu, ay gfae fagusegananun emu.

¹⁷ Fagsafulun tagfae fagmanabayanun emu.

¹⁸ Masine sik taw at ke fagsafulun, aroro kanya tagfon fagmasineun ay tangaba fag leleg.

^19-20 Siginan Yawi at fagsafulun, nawat banwa ay daga, ay anke ngay bulbug, ay anke arak siginan sangay linyabu.

²¹ Ku sisian, fabanwani tua si emu fagsafulun ay fagmamatanganun. Kabavn amatangi tua gugat ay lag gfabayan nu kalyam.

²² Aroro kanya tagfon emu tangaduge ay at manabayan fag leleg.

²³ Ay manabayan tuo gbanwan dewa e faurianan.

²⁴ Ay manabayan tua nu gtiug o, ay di o e fakalimuun.

²⁵ Lag o kalimu dewa e ndasug vtv masakit nusnga setaw fag malimu, ay dewa e namamin ngay taw mauri.

²⁶ Aroro gafanud tuo te, Yawi gulit ay gfayayu emu siginans faurianan.

²⁷ Kaksvn am fagmakatuun, gubuki ngay taget gubuk.

²⁸ Lag o gfabalabag ya nu e fagmakatuun tuo ggubuk katsi.

²⁹ Lag o e namatangan at mauri sam fasabale tagafanud emu.

³⁰ Lag o namabadbaboan am iba nu dway mafanud, ay kaugat wan nu dway e nafakamulun sa emu at mauri.

³¹ Lag o galabian tagfakamulun at mauri, anggan at namaning at ngay fakamulun.

³² Aroro Yawi kauri maksvn ngay taw at yud matuyan at amatanganan, dewa katanya, kanya guseganan tua tagugali at matuyan.

³³ Yawi gfauri sik talanan tagfakamulun at mauri, dewa katanya, kanya ggubuk tua talananan tagfakamulun at matuyan.

³⁴ Ay kanya gfauri ngay taw tagfalingun at iba, dewa katanya, kanya gfon tua nusnge wain sas fagayu takamababaun.

³⁵ Kanya gfauseganan at ke fagsafulun fag ngay taw, dewa katanya, kanya gfae fakaplaun way at yud mamatanganan fag ngay taw.