Fangatulun 2 - Fanawbuid tagsibaliwas Fakayabian

Fagsafulun at Kamafanudan

¹ Ku sisian, aylati tua gugat ay amatangi ku ngay foyungan, ay ku ngay suguan.

² Dungugani sabaliwa tagfae fagsafulun ay tagfasaful emu.

³ Ugatani nangae fagsafulun,

⁴ ugatani tua nu grvbvy o, kaksvn nu grvbvy o sanbung salapi ay nusnge wain fag ramraman at masuksukan.

⁵ Nu nafakamulun tua ban o takatanya, sumaful tua ban o gsuyu Yawi, ay sumaful yangay ban o sabaliwa anya.

⁶ Aroro Yawi wan tagfon fagsafulun ay fagmamatanganun ay fagmatogdungugun.

⁷ Ay kanya galaga ngay taw tagugali at matuyan ay at yud e malong, ay sik famalabag sa sangay taw tagfakamulun takatanya,

⁸ ay gulit yangay ngay taw tagugali at yud e malong ay at matuyan.

⁹ Nu gdungugan tuo angku, kasaful o am fagnamakamulunun at matuyan ay at maylat.

¹⁰ Nu gfakamulun tua ban o takatanya, kafamut tua am fagsafulun, ay gfae fagmanabayanun tua ban emu.

¹¹ Nu saful tuo gtogdungug ay saful gamatangan at kasakan, kanya tagdiri emu.

¹² Fagsafulun tagfayayu emu siginan at mauri fag ugali, ay siginan yangay sangay taw taglong at mauri.

¹³ Ay kanya fag ngay taw naubun at matuyan fag ugali ay at nafili at mauri way fag ngay balyawvtan,

¹⁴ ay taguseganan gfakamulun sat mauri ay takaylat gugat sat fagmauriun,

¹⁵ ay kanya fag ngay taw nu mabanwan mauri at ugali.

¹⁶ Fagsafulun tagfayayu emu siginan at mauri fag mangena at fakamaylatanun, ay siginan at maylat fag ngay longan.

¹⁷ Takatanya fag mangena, naubun at naindugan ebi gina mabaguina. Ay nalyam wan at fatuyanan sas Dius ebi gina kadadwa,

¹⁸ Ay nu nasa wo at bale, kata wa nu nasa o sfakabulun, aroro kanya wan dalan sat ngay mabulan at fagbanwanan.

¹⁹ Nusnga sinu fag mangama at nasanya, wa mauli ya, umkalyam wan dalan tagsas leleg.

²⁰ Nu katanya, faningi at matuyan fag ngay taw nu mabanwan, ay banwani at yud e malong.

²¹ Aroro nusnga sinu fag taw tagbanwan tua sat matuyan ay yud e malong, kanya ngaduge tua nu gleleg stes fagdaul daga.

²² Dewa katanya, at mauri ay tagfandaya fag ngay taw, gaiyanan, kata nu e ggulad ngay makmak.