Fakasigadan 9 - Fanawbuid tagsibaliwas Fakayabian

Dius at Fatuyanan sas Nui

¹ Sanya ginan, Dius nafadante Nui ay anggan at ngay sisian ay nalong te, “Sisiani laman ban umkayu am ay umkapnu sas fagdaul daga.

² Ay fagayu ban mangilafang: taglao, taglayug, tagalafang, ay anggan tagsisad lino kalimu tua ayu. Ay gfagbilug kban sa ayu kanya fagayu.

³ Siginan ban katsi kon wam ngay fagbaugun, ay gfon kwan sa ayu laman ban ay fakonun, kata ku nafon ayu fag ngay tanum takaon tua at ngay rawvg.

⁴ Ay dewa katanya, lag ban am kon fagbaugun at yamas at yud naduksun at taguk gina kabul, aroro taguk wan leleg.

⁵ Fakabulun ban ku faurianan sas nusnga sinu at nafabul taw ay anggan ban ngay fagbaugun at nafabul ayu, ay namaurianan kyangay ban nusnga sinu at nafabul at iba.

⁶ Ay nusnga sinu ban at nafabul at iba, at ngay iba yangay ban at namabul anya, aroro Dius nawat taw kata anya.

⁷ Ay sisiani ban laman umke ngay taw sas fagdaul daga.”

⁸ Dius nalong yay fia sas Nui ay anggan sat ngay baguama te,

^9-11 “Katsi gfatuyanan au sa ayu ay sa ay ngay kasugfunanan, ay sas fagayu tagleleg, ngay manuk tungud, ngay fagbaugun ay fagayu tagsis talun fag ngay mangilafang at nafasfuan ayu naduksun siginans sakayan lino. Kata tuy ku fatuyanan: kwa ban gdog ya gfaurianan fagdaul daga siginans lino laman namamin fagayu tagleleg.”

^12-13 Ay Dius nalong yangay te, “Katatuy ban at fakatoglagan ku fatuyanan sa ayu ay anggan sa sangay mangilafang at nanangalo ayu: gfasa kban sad linyabu ku balango, laman ban famamatang sas fagayu kasugfunanan kabavn ban.

¹⁴ Galay kban namae linyabu, ay balango kasure,

¹⁵ gamatang kban ku fatuyanan sa ayu ay sas fagayu awatan tagleleg. Anud, wa ban gdog ya e lino daul at namamin fagayu tagleleg.

¹⁶ Galay ban balango kasure sa sangay linyabu, gamatang kban gugat ku fatuyanan sas fagayu ku awatan tagleleg sas fagdaul daga.”

¹⁷ Nu katanya, Dius nalong sas Nui te, “Balango ban at fakatoglagan ku fatuyanan sas fagayu tagleleg sas fagdaul daga.”

Nui at ngay Baguama

¹⁸ Nui at ngay baguama: Sem, Kam ay Afet. Kanya fag tulu galo anya sis sakayan lino. (Kam, Kanaan at mama.)

¹⁹ Ay siginan kafag duksayan ngay taw sas fagdaul daga at fakasigadan.

²⁰ Nui sik tagtanum, ay sia wan taguna gtanum wat ubas.

²¹ Sik menit, Nui nainum at malangu siginans wat ubas at mamam, ay nalangu. Ay malulasan gtaygilidan sit bale ramit.

²² Ay Kam, Kanaan at mama, nasakbo sat bale ay nalag at mama nu malulasan. Ay kanya naduksun laman namasaful sat faduksay fagdua.

²³ Ay duksay Sem ay Afet nabul sik ramit ay nafasat lafi ay gtalyuyan glao. Ay duksay nasakbo laman nangumut at mama at bilug. Kanya wa gdama aroro wa kaylat glag at mama nu malulasan.

²⁴ Ay Nui nu nfia wan nu galangu, ay nu nasaful at faglon at nafakamulun sa anya,

²⁵ kanya nalong te, “Kanaan ban gafaurianan ay nangasik fagsuguan sat ngay faduksay.”

²⁶ Ay kanya nalong yangay te, “Segi Yawi, Sem at Dius. Kanaan ban nangus, Sem wa fia at fagsuguan.

²⁷ Dius ban nangus gfabia Afet at talun. Ay Sem ban nangus at gaban namanwan sas Afet fag gaban. Ay Kanaan ban nangus Afet wan at fagsuguan.”

²⁸ Ay siginan nu kalino, Nui nu gleleg tuluk yak sandan limak safuluk banwa.

²⁹ Ay Nui anbul gina at banwa siamk sandan limak safulu.