Fakasigadan 34 - Fanawbuid tagsibaliwas Fakayabian

Nafakamulun sas Dina at Mauri

¹ Sik menit, Dina, Akub ay Lia at baguina, nanansibo at ngay fagadgalangan fag ngay baguina sas talun Kanaan.

² Ay sanya fag talun at fun, Kamur fag taw Kib. Ay kanya e baguama at ngayan Sekem. Ay Sekem nu nalag Dina, nafabulun nataban anya ay nafataladan.

³ Kanya maksvn nu galabian ay gfababaun sa anya.

⁴ Ay Sekem nalong sat mama te, “Mama, awati sik balyawvtan laman mabul au Dina ku bubay ban.”

⁵ Ay Akub nu nasaful te, Sekem nafakamulun at mauri sas Dina, kanya naragangan way lang, aroro ginanya at ngay baguama galaga way at ngay baka sit fagfafangonan.

⁶ Ay Kamur, Sekem at mama, nalao sas Akub laman namakamatoan.

⁷ Ay Akub at ngay baguama nu nasaful at kinfakamulun at mauri sas Dina, noli wa vtv siginan at fagfafangonan, ay ankuri sat ngay amatanganan ay maksvn nu kadotama Sekem, aroro nafakamulun at yud masine fag fakamulun tagfapla Akub at talananan.

⁸ Ay Kamur nalong anya te, “Dakngani Sekem kaylat wan Dina, wain tam fagyudun gfadadwa wan anya fagdua?

⁹ Masadi watam, aylati wan ay ngay baguina nu kadadwa sa em ngay baguama, ay em ngay baguina nu kadadwa yangay sa ay ngay baguama.

¹⁰ Masine wayam gbanwan iste si em daga nusnga nday ay fakaylatun. Ay nusnga nday masine yangay am gfalao nusnga setaw ay fagagbilugun, ay magbilug am nusnga nday ste fag daga.”

¹¹ Ay Sekem kaksvn way nya nu gfalukmeanan sas Dina at mama ay anggan sat ngay faduksay. Ay kanya nalong sa anya fagayu te, “Nu masine sa ayu, nanfamubay au ay faduksay Dina. Ay anggan am, eti yangay ay fakaylatun nusnge wain si emi.

¹² Longi, seyu ro ku fon ayu laman umdadwa ami. Gfon kro sa ayu nusnga seyu ay fagetun nung tua ro mi andadwa.”

¹³ Ay aroro Sekem nafakamulun at mauri sas Dina, Akub at ngay baguama namanaw Sekem fag talame.

¹⁴ Akub at ngay baguama nalong sas Kamur te, “Maksvn fag fakaplaun nu nafafangindugan way romi em faduksay sat yud e fakatoglagan.”

¹⁵ Ay kanya glong yangay te, “Kaylat wa romi, fagayu mangama tagste nung tua ro gfae fakatoglagan kata emi.

¹⁶ Ay nu katanya tua ban, masine wam dayvm kamubay em ngay baguina, ay anggan ban ami kamubay wami sa ay ngay baguina. Ay namanwan wami magamut ayu laman sik furuan way tam.

¹⁷ Ay wayam kaylat takatanya, glo wami, gtaban wami Dina.”

¹⁸ Ay Kamur talame namatangan te, Akub at ngay baguama at longan masine.

¹⁹ Ay aroro Sekem maksvn nu kesug Dina, wa nfangulan ya at buknga laman namaning Akub at ngay baguama at fakaylatun. Ay Sekem wan at fagfaningun fia fag taw sit mama at talananan.

²⁰ Nu katanya, talame nafaful fagayu mangama sis sakbawan furuan ay nalong te, “At kasine gfadgaloan kafag ngay betaw at kindasug sa antam.

²¹ Gbia tua tam talun. Ay gfabanwan waban tam ste. Masine waban tam mesa gfafanmangena ay gfafanmangama tam ngay sisian.”

²² Ay talame glong sat ngay ibama te, “Umfasludan ban takatanya nu nafae fakatoglagan tua ban tam kata Akub fag talanan.

²³ Nu katanya, at ngay ramraman ay at ngay baka ay nusnge wain antam wan. Aylati wan kanya fagayu nu gfadgaloan antam gbanwan.”

²⁴ Ay fagayu mangama naylat takatanya fag balyawvtan, ay kanya fagayu nafae fakatoglagan wan.

²⁵ Ay sis fatuluk menit, gina maksvn yay fia nu ganini at nafae fakatoglagan, Simyun ay Lebi, Dina at ngay kaka, nabul at mesa fiso ay nafabul sanya fag ngay mangama gina ganinian.

²⁶ Ay duksay nafabul wan fagayu anggan talame Kamur ay Sekem, ay nataban Dina siginan Sekem at bale, ay nalao wan.

²⁷ Ay nu ntabu wan fagayu, Akub at ngay baguama tiba nabul kanya fagayu at ramraman. Duksayan nafakamulun takatanya aroro Sekem nafakamulun mauri sas Dina.

²⁸ Kanya fagayu nabul wan anggan at ngay fagbaugun tupa, baka ay ngay asnu, ay nabuba yangay fagayu tagsis furuan ay tagsis tanuman at masine at ke fanambagun.

²⁹ Ay nabuba yangay fagayu at ramraman, ay nataban wan at ngay mangena ay at ngay sisian, ay we nafasawad ya nusnge wain.

³⁰ Akub nalong sas duksay Simyun ay Lebi te, “Nafon am angku sik maksvn fag fagidapun. Katsi ngayu takauri angku, taw Kanaan ay taw Peres. Kanya ro fagayu nu nsadi way ay nu nanamawayan way ro antam, wa tam e kasakan taw laman tagbalabag antam. Kanya ro fagayu makatu way gfaurianan fagdaul ku talananan.”

³¹ Dewa katanya, duksay nalong te, “Wami kaylat em faduksay nu kafoyung te, sik mauri fag baguina.”