Fakasigadan 16 - Fanawbuid tagsibaliwas Fakayabian

Agar ay Ismael

¹ Ay Saray, Abram at mangena, we sisian. Dewa katanya, kanya e fagsuguan siginans talun Igiptu at ngayan Agar.

² Saray nalong sas Abram te, “Aroro Yawi wa kaylat nu e sisian au, masine nung o sa ku fagsuguan fag mangena. Bangaran ban umke sisian au siginan anya.” Ay Abram nafaning at mangena at longan anya.

³ Ay Saray nafon at fagsuguan Agar sas Abram laman at mangena. (Anfasludan takatanya gina anlangfe safuluk banwa nu gbanwan sis Kanaan.)

⁴ Ay Abram nafataladan Agar ay sanya ginan nafafion. Ay Agar nu nasaful te, gfafion wan, nafalingun at tagfayafun Saray.

⁵ Nu katanya, Saray nalong sas Abram te, “Katsi Agar gfafion wan ay gfalingun angku. Ay o wan ke malong. Nafon kwa sa emu anya ay o wan tagsalag. Yawi wan taginsaful nu sinu ta at matuyan.”

⁶ Ay Abram nabalus anya te, “O nunda kanya bunwa am fagsuguan? Kin, fakamuluni sa anya kata am fakaylatun.” Siginan ginanya, Saray maksvn nu gfaidapan Agar, ay sa oma taguyan Agar nalagyu wan.

⁷ Ay Yawi at tagbarita nalag Agar sis talun at yud e taw si sik bulbug. Ay kafag bulbug munakbang sis dalan tagsas Sur.

⁸ Ay kafag tagbarita nainto anya te, “Agar, Saray at fagsuguan, daginan o ay dada o?” Ay Agar gbalus te, “Nalagyu au ku tagfayafun Saray.”

⁹ Ay tagbarita nalong anya te, “Afolii wan sam tagfayafun ay namababaun o sa anya.”

¹⁰ Ay tagbarita nalong yay fia anya te, “Gfayu kban am ngay kasugfunanan ay at kayuan ban wa katap ya.

¹¹ Katsi gfafion o, ay namasalug ban o sik munama. Ay fangayani ban anya te, Ismael, aroro Yawi nadungug am fagetun gina o gidapan.

¹² Ay kanya ban kata way sik mela sis talun. Ay gfawayan ban fagayu taw, ay fagayu ban taw gfawayan yangay anya. Ay anggan ban at ngay kalongan gfabadbaboan yangay sa anya.”

¹³ Agar nafangayan Yawi at nafakamatoan anya te, “Taglag fag Dius,” aroro Agar nalong te, “Anud! Nalag kwan Dius taglag angku.”

¹⁴ Nu katanya, kafag bulbug swabilug Kades ay Bered nafangayan te, Beer-Lakay-Ruy.

¹⁵ Ay Agar anfoli wan sat tagfayafun Saray. Ay wa glugo ya, Agar anke sisian sik munama siginans Abram. Abram nafangayan kafag sisian te, Ismael.

¹⁶ Abram waluk safulu labi unumk banwa gina Ismael kasalug.