Fakamulun 9 - Fanawbuid tagsibaliwas Fakayabian

Isus nu Guro Saulu

¹ Ay Saulu gfataglayun at algan nu namauri tam Fun at ngay tagafanud. Kanya nanangakbang sas fun tagfon fanggalangun

² laman nanget sik rirukan at fagfalagun sa sangay taw Udyu sa sangay bale fakafulan sis Damasku, laman mananggamat ngay mangama ay ngay mangena tagfaning at foyungan sabaliwas Isus, ay arodi namuba sas Erusalem laman nangubung.

³ Ay Saulu nu munakbang wan sis Damasku, sik yamag siginans banwa nadamlag masakit sat ligung.

⁴ Nu katanya, Saulu anlub sas daga ay nadungug sik aringang te, “Saulu, Saulu, wain am fagfauriun angku?”

⁵ Ay Saulu nabalus te, “Sinu o, ku Fun?” Ay kafag aringang nabalus anya te, “Au wan Isus, am fagfauriun.

⁶ Alindugi, ay loi sas furuan, ay sanya ro e gfoyung emu am fakamulun ban.”

⁷ Saulu at ngay ufud malindug sit day tigyangan ay maragangan way lang. Ay kanya fagayu nadungug sik aringang, dewa katanya, we lagan tagaringang.

⁸ Ay Saulu anlindug ay nu nafandama wa glag, nu katanya, at ngay ufud nataban anya sas furuan Damasku.

⁹ Ay Saulu nu yud glag tuluk menit, ay kadugenya, wa gfangon ay wa ginum.

¹⁰ Ay sis furuan Damasku e sik tagafanud at ngayan Ananias. Tam Fun gfakamatoan anya siginan sik taginfan ay glong te, “Ananias.” Ay kanya nabalus te, “Nataw, ku Fun?”

¹¹ Ay tam Fun nalong anya te, “Loi sas dalan at ngayan te, At Maturun fag Dalan, ay adasugi sas Udas at bale, ay rvbvyi sik mangama at ngayan Saulu, sik taw Tarsu. Katsi, kanya gdarangin.

¹² Ay nafalag au sa anya te, nasakbo o ay nafatayuk o am daluap sat mata laman gdog yay glag.”

¹³ Ay Ananias gbalus te, “Ku Fun, ngayu ku nadungug sabaliwa kafag taw te, ngayu kanya at nafaidapan am ngay nafili sis Erusalem,

¹⁴ ay kanya ndasug ste, aroro siginan ngay fun tagfon fanggalangun nafon sa anya fagmabalyananun laman nanggamat fagayu tagafanud sa emu.”

¹⁵ Ay tam Fun nalong anya te, “Loi wan, aroro nafili au anya laman namatoglag angku sas yud Udyu fag ngay taw, sa sangay fun ay sa sangay taw Israel.

¹⁶ Ay namalag kyangay sa anya ngay fagidapun at fagnandalanun, ay nu setain ban nu gagwanta laman sa angku.”

¹⁷ Ay Ananias nalao wan ay nasakbo sas Saulu at fagtaglayunan fag bale ay nafatayuk at daluap sa anya ay glong te, “Faduksay Saulu, tam Fun Isus at kinsure sa emu si sangaba dalan nasugu angku laman gdog yay ro wo glag, ay at Masine fag Falad umtayuk sa emu.”

¹⁸ Ay arodi vtv e ntong siginan Saulu at mata kata sik ngay sariksik, ay kanya glag wan. Ay Saulu anlindug ay Ananias nafasurung anya.

¹⁹ Ay kanya nu nafangon wan, gdog wan anbitsug. Ay Saulu nabanwan yay nu seyuk menit sis furuan Damasku gadgaloan ngay tagafanud sas Isus.

Saulu Kamoyung sis Furuan Damasku

²⁰ Ay Saulu gfasigad gfoyung si sangay taw Udyu at ngay bale fakafulan, ay glong te, Isus wan Dius at Baguama.

²¹ Ay fagayu tagdungugan anya kadulo, ay ginto te, “O nunda bunwa at nafaurianan ngay tagafanud sis Erusalem? Kanya andasug stie laman nanggamat fagayu tagafanud ay gtaban sa sangay fun tagfon fanggalangun.”

²² Dewa katanya, kaugat yay Saulu nu kamoyung, ay ngay taw Udyu sis Damasku wa mafabalus Saulu nu gfoyung te, Isus Dius at nafili fag Fun.

²³ Ay nu nlangfe ngayuk menit, sanya fag ngay taw Udyu ansadi laman namabul Saulu.

²⁴ Ay Saulu nasaful kafag ngay taw at mauri fag algan. Kayu menit ay yabi kafag ngay taw gfanya anya si sangay sakbawan furuan laman namabul anya.

²⁵ Dewa katanya, sik yabi, Saulu at ngay tagadal nasuad anya sa sik bang ay nafatagbung sas day alad.

Saulu sis Erusalem

²⁶ Ay Saulu nu ndasug sas Erusalem, kanya kaylat oma nangaful sa tibak tagafanud, dewa katanya, kanya fagayu kalimu way aroro wa gafanud te, Saulu sik tagafanud wan.

²⁷ Ay Bernabe nataban Saulu sa kafag ngay tagafanud ay nafoyung sabaliwa Saulu nu glag Isus gina si sangaba dalan, ay nu setain tam Fun nu gfakamatoan anya, ay nu maseganama gfoyung sabaliwas Isus sis furuan Damasku.

²⁸ Siginan ginanya, Saulu gfadgaloan tibak tagafanud, ay kanya fagayu maseganama nu gfoyung sas fagdaul Erusalem sa baliwa tam Fun.

²⁹ Ay Saulu gfakamatoan ay gfabadbaboan ngay taw Udyu tagsaful Griegu fag fangaringang, nu katanya, kanya fagayu andotama ay gyafabulun anya.

³⁰ Ay ngay tagafanud nu nasaful kafag ngay taw Udyu at algan, kanya fagayu nataban Saulu sas furuan Sesaria ay nafauli sas furuan Tarsu.

³¹ Siginan ginanya, ngay tagafanud sas fagdaul talun Udea ay Galilea ay anggan Samarya, anke fagmanabayanun ay ankaksvn yangay nu gafanud ay gbanwan gfaning tam Fun. Ay at Masine fag Falad nafabitsug at ngay amatanganan, nu katanya, ngay tagafanud anfamut yay.

Duak Madulo

³² Ay Pedru nanansibo Dius at ngay tagafanud sa sangay furuan, ay nasa yangay sfuruan Lida.

³³ Ay kanya nalag sanya sik mangama at ngayan Eneas. Ay kafag mangama walu wak banwa nu gtaygilidan sit igyan, aroro wa malao.

³⁴ Ay Pedru nalong sa anya te, “Eneas, Isus, Dius at nafili fag Fun, gfafia emu. Malindugi wan ay faluti am igyan.” Ay arodi vtv, kanya nlindug.

³⁵ Ay tagbanwan sis furuan Lida ay sis furuan Sarun nu nalag te, Eneas anfia wan, kanya fagayu gafanud yangay sa tam Fun.

³⁶ Ay sis furuan Upa, e sik mangena gafanud yangay, at ngayan Tabita. (Sas Griegu, at ngayan Durkas, at masuad te, Bian.) Kabavn kanya mafanggubuk, kaugat wan sat yud e kwa.

³⁷ Ay ginanya, kanya anke fakasaitun ay anbul. Ay tibak tagafanud nafegus anya ay nabuba sat tungud fag suluk.

³⁸ Furuan Lida munakbang sis furuan Upa, ay tibak tagafanud nu nadungug te, Pedru sis furuan Lida, kanya fagayu nasugu duak mangama laman nantaban. Ay duama nu ndasug sas Lida, nalong sas Pedru te, “Wainyayo, aloi emi.”

³⁹ Ay Pedru nanangalo duama. Ay kanya nu ndasug sas furuan Upa, tibak tagafanud nataban anya sat tungud fag suluk. Ay ngay fagbubayun gwayway sis Pedru at ligung ay gfalag sa anya Durkas at nawat fag ngay ramit kaduge kanya gfaudgufudan anya fagayu.

⁴⁰ Sanya ginan, Pedru nafaduksun ngay taw ay gtudan gdarangin. Ay nu ntabu wan, nasalubang sas Tabita ay nalong te, “Tabita, alindugi!” Ay nafamandama ay nalag Pedru ay kanya anlunggung.

⁴¹ Sanya ginan, Pedru nated at take ay nafalindug. Ay Pedru nauro ngay fagbubayun ay tiba yak tagafanud ay nafalag sa anya fagayu te, Tabita gleleg wan.

⁴² Ay fagayu taw sis furuan Upa nadungug at kinfasludan ay ngayu at nafanud sa tam Fun.

⁴³ Ay Pedru gbanwan yay sis Upa ngayuk menit sis Simun at bale. Simun sik tagfagong fagbaugun at balat.