Fakamulun 6 - Fanawbuid tagsibaliwas Fakayabian

Nu Gfili Fituk Mangama

¹ Ginanya fag buknga, ngayu takafamut ngay taw tagafanud sas Isus. Ay ngay taw Udyu tagsaful Griegu fag fangaringang, anke fanlonganan sa sangay taw Udyu tagsaful Ebreu fag fangaringang, aroro galay gfon fakonun sa sangay fagbubayun, kafag gaban taw at ngay fagbubayun wa nke afud laman at fakonun kayu menit.

² Nu katanya, at Labi Duak nasugu nafaful fagayu tagafanud ay nalong te, “Wa masine nu gfaragang ami gfoyung Dius at longan, laman namakamulun ami sabaliwa fanggubukun takalag.

³ Nu katanya, em ngay faduksay filii si ayu fituk mangama ay natuyan te, matuyan at ugali, ay at ke Masine fag Falad. Ay kanya ban at namakamulun sabaliwa ngay fakonun.

⁴ Ay ami, gfalganan ami em buknga laman gdarangin ay gfoyung Dius at longan.”

⁵ Ay fagayu tagafanud naylat ngay nasugu at famalun. Ay nafili Esteban, sik mangama at maksvn nu gafanud ay at Masine fag Falad si anya. Ay nafili yangay Felipe, Prukuru, Nikanur, Timun, Parmenas ay Nikulas siginans furuan Antiukya sis talun Sirya, at kintaip sas taw Udyu at fagafanudun.

⁶ Ay nataban kafag fituk mangama sat ngay nasugu at daga salubangan. Ay at ngay nasugu gina gdarangin gfatayuk at ngay daluap sanya fag fituk mangama at tungud alfuyu.

⁷ Nu katanya, Dius at longan gtaglayun nu kafagdaul. Ay sis Erusalem ngayu yay at kinfamut tagafanud sas Isus, ay ngayu yangay tagfon fanggalangun at nafanud.

Nu Ggamat Esteban

⁸ Dius nafon sas Esteban fagmabalyananun. Nu katanya, kanya nafasure at mabalyanan ay at madulo fag ngay fakamulun ay ngayuk taw at nalag.

⁹ Ay sik ngay taw nafabadbaboan Esteban. Kafag ngay mangama siginans Sirene, Aleandria, Silisya ay Asya. Kanya fagayu nangaful yangay sas taw Udyu at nalfas wan siginan nu gafagsuguanan at bale fakafulan.

¹⁰ Dewa katanya, kafag ngay taw wa mababo Esteban sit longan aroro at Masine fag Falad nafae fagsafulun anya.

¹¹ Ay kafag ngay taw nasugu tibak taw laman nanfamuagan nanlong sa sangay taw te, “Nadungug ami Esteban nu glong mauri sabaliwas Muisis ay sas Dius.”

¹² Ay siginan takatanya kanya fagayu nafadotama fagayu taw ay at ngay funan ay anggan ngay tagfoyung Muisis at faugali. Nu katanya, kanya fagayu nagamat Esteban ay nataban sa sangay taw Udyu at ngay tagfangguna at daga salubangan.

¹³ Ay nataban yangay tibak taw laman nanfamuagan te, “Tuy fag taw wa gfaragang nu glong at mauri sabaliwas Dius at bale ay sas Muisis at faugali.

¹⁴ Ay nadungug ami nu glong te, Isus tagsiginans Nasaret nanrasras ban Dius at bale ay namabali ban tam faugali Muisis at nafon sa tam ngay mangaguyang.”

¹⁵ Ay kafag ngay tagfangguna nadama Esteban at kamatan ay nu glag, kata sik tagbarita at kamatan nu masulo.