Fakamulun 5 - Fanawbuid tagsibaliwas Fakayabian

Ananias ay Safira

¹ Ay e sik taw, at ngayan Ananias ay at bubay Safira. Kafag dadwa nafalao yangay sik afud at daga.

² Ay dadwa ansadi gbuin at nagbulan, ay sik afud way at nafon sa sangay nasugu.

³ Ay Pedru nalong te, “Ananias, wain am fagnafabayanun Satanas nu gagbilug emu laman kamuag o sat Masine fag Falad, ay wain am fagnabuinun ay daga at nagbulan laman sa am sadili fakaylatun?

⁴ O nunda kanya bunwa ay daga? Ay nu nafalao wo, o yangay at ke algan te, tain ban am fakamulun sa ay salapi. Ay wain am fagnamatanganun yay at namakamulun takatanya? Nu kamuag o bunwa sas taw nu bunway sa tuas Dius.”

⁵ Ay Ananias nu nadungug, antaygilid way lang ay anbul wan. Ay fagayu taw nu nadungug at kinfasludan, maksvn nu kalimu.

⁶ Ay sik ngay baguama andasug laman nansifig Ananias ay nafaduksun ay nanamoli wan.

⁷ Ay nu nlangfe tuluk uras, Safira andasug ay wa nasaful at kinfasludan sat indugan.

⁸ Ay Pedru nainto Safira te, “O anud, kayu way tuy ay daga at nagbulan?” Ay kanya nabalus te, “Sabv, kayu way nya.”

⁹ Ay Pedru nalong anya te, “Wain ay fagnadiuganun gfaskud tam Fun at Falad? Damai! Si was sakbawan at nanamoli am indugan, ay at fadogan ro emu wan.”

¹⁰ Ay ginanya yay Safira antaygilid ay anbul. Ay kafag ngay baguama nu ndasug, nalag te, Safira anbul wan, nu katanya, kanya fagayu nafaduksun ay nanamoli munakbang sit indugan.

¹¹ Aroro siginan at kinfasludan, ngay tagafanud ay fagayu at nadungug maksvn nu kalimu.

Ngay Nasugu Nafakamulun ngayuk Madulo

¹² Ngay nasugu nafakamulun at ngay madulo fag ngay fakatoglagan ay at madulo sa sangay taw. Ay fagayu tagafanud maful gugat sis Sulumun at Tangbi Aba.

¹³ Ay at yud gafanud fag ngay taw dewa natoglag te, ngay tagafanud sik fagsuyuun, wa kaylat nangaful sa anya fagayu.

¹⁴ Ay dewa katanya, kafamut tua tagafanud sa tam Fun, mangama ay mangena.

¹⁵ Aroro siginan sangay nasugu at nafakamulun fag ngay madulo, ngay taw nabuba ke ngay fakasaitun sas day dalan ay nafataygilidan sit ngay igyan laman ro Pedru nu nadalan ay nu naninu, kanya fagayu kafia.

¹⁶ Ay ngayu yangay ktaw at kindasug siginans ligung Erusalem fag ngay furuan ay gbuba ke ngay fakasaitun ay ke ngay mauri fag falad, ay kanya fagayu anfia.

Ngay Nasugu Gdog yay Ankubung

¹⁷ Nu katanya, fun tagfon fanggalangun ay at ngay ufud fag ngay taw Saduseu, maksvn nu galabian.

¹⁸ Ay kanya fagayu nagamat Isus at ngay nasugu ay nafaubung.

¹⁹ Ay ginanya fag yabi tam Fun at tagbarita andasug ay naluang ubung dingding sakbawan ay nafaduksun ngay nasugu, ay glong te,

²⁰ “Loi wan sas Dius at bale ay foyungi sa baliwa at bagu fag leleg tagsiginans Dius.”

²¹ Ay sbalabag sirut, kanya fagayu nafaning tagbarita at longan ay nasakbo sas Dius at bale ay gfoyung sa sangay taw at maful sanya. Ay fun tagfon fanggalangun ay at ngay ufud nu ndasug, nafauro taw Udyu at ngay tagfangguna laman gkamatoan. Ay kanya fagayu nasugu laman nantaban Isus at ngay nasugu siginans fagubungan.

²² Ay kafag ngay fagsuguan nu ndasug sas fagubungan we lagan ya ngay nasugu. Nu katanya, kafag ngay fagsuguan anfoli sat ngay tagfangguna laman namasaful at nalag.

²³ Ay glong te, “Nu glag ami fagubungan madingdingan mandi, ay e ngay tagulit sis day sakbawan. Ay nu naluang ami sakbawan, wami e lagan ya at maubungan.”

²⁴ Ngay tagulit at fun sis Dius at bale ay ngay fun tagfon fanggalangun nu nadungug kafag barita, andulo maksvn ay namatangan te, tain ban at kumfasludan sas fagunan.

²⁵ Ay sik taw andasug ay nafansulit te, “Ay naubung fag ngay taw, katsi siwas Dius at bale ay kamoyung.”

²⁶ Ngay tagulit at fun ay at fagfanggunaun fag ngay tagulit, nalo sas Dius at bale, ay gdog nataban Isus at ngay nasugu, dewa katanya wa nafalimuanan nu ggamat aroro kalimu te, ngay taw mafana anya gang.

²⁷ Kafag ngay tagulit nataban Isus at ngay nasugu sa sangay tagfangguna at daga salubangan. Ay fun tagfon fanggalangun nainto anya fagayu te,

²⁸ “O nunda ya mi nasalag ayu te, ‘Lag gfoyung ya sabaliwas Isus’? Abat ngate am nafaning, ay foyungan anfagdaul wan sas Erusalem ay glong yayam te, ami at nafabul anya.”

²⁹ Pedru ay at ngay ufud nabalus te, “Dius tua em fagfaningun, bundi nusnga sinu fag taw.

³⁰ Nafabul am Isus siginan nu natuktuk am anya sas fasulungan kayu, dewa katanya, tam ngay mangaguyang at Dius nafadog nafaleleg anya siginan at fagmabulanan.

³¹ Sanya ginan Dius nafabat anya ay nafalunggung sit siun baliwa laman sik fun ay tagfalangfe, ay gfon buknga sas fagayu taw Israel laman gubun at ngay asalanan.

³² Gfatuyan ami te, matuyan em ngay nalag. Ay at Masine fag Falad, Dius at nafon sas fagayu tagfaning anya, gfatuyan yangay.”

³³ Ngay tagfangguna nu nadungug takatanya, maksvn nu kadotama, ay gyafabulun kafag ngay nasugu.

³⁴ Dewa katanya, Gamaliel fag taw Fariseu, ay tagfoyung Muisis at Faugali ay fagayu taw at fagsuyuun, anlindug si sangay tagfangguna at daga salubangan ay gsugu te, “Faduksuni yap kanya fag ngay taw.”

³⁵ Sanya ginan kanya glong te, “Ku kaiban fag ngay taw Israel, amatangani tua fia ay fagnamakamulunun sanya fag ngay taw.

³⁶ Ebi, e sik taw at ngayan Teudas, kanya andasug ay kamatungudun te, e fagmabalyananun. Kanya e ufatk sandank taw. Ay dewa katanya, e nafabul anya ay at ngay taw nasaruayan wan ay at adgaloanan wa nke tungkul.

³⁷ Ay abandi, e sik taw yay fia at kindasug gina griruk ngay taw at kayuan, kanya Udas, ay sik taw Galilea. Kanya e ngay taw yangay. Dewa katanya, e nafabul yangay anya, ay at ngay taw nasaruayan way lang.

³⁸ Nu katanya, glong au ayu te, fabayani wan kafag ngay taw ay lag tam kasalag, aroro at algan ay at fakamulun nu siginan ways taw, kanya ban umfangulan way.

³⁹ Dewa katanya, nu siginan tuas Dius, wam mafaragang anya fagayu. Aroro nu nasalag way ban am anya, tam fagfawayanun Dius wan.”

⁴⁰ Ay kafag ngay taw nafaning Gamaliel at fangatulun. Dewa katanya, gdog yay nafasakbo kafag ngay nasugu, ay nafalang. Sanya ginan, kanya fagayu maksvn nu gsalag ngay nasugu te, “Lag am kamoyung ya sabaliwas Isus,” ay sanya ginan nafalfas wan.

⁴¹ Ay kafag ngay nasugu nalo wan siginans taw Udyu at ngay tagfangguna, ay maksvn nu guseganan aroro Dius nafon fangagwanta aroro sas Isus at ngayan.

⁴² Kayu menit, kanya fagayu gsakbo sas Dius at bale ay sa sangay bale, ay gfataglayun gfoyung at Masine fag Barita sabaliwas Isus, Dius at nafili fag Fun.