Fakamulun 3 - Fanawbuid tagsibaliwas Fakayabian

Nu Gfafia sik Taw at Yud Malao

¹ Sik menit, gina sis fatulu sfafun, Pedru ay Uan nalao sas Dius at bale laman nandarangin, aroro ginanya fandaranginan.

² Ay sanya e sik mangama yud malao siginan ngay nu kasalug. Kayu menit e namuba anya sas Dius at day sakbawan bale at nafangayan te, Masine fag Sakbawan, laman nanget sa sangay taw tagsakbo.

³ Ay kanya nu nalag Pedru ay Uan nu gsakbo, get salapi.

⁴ Ay Pedru ay Uan nadama anya. Ay Pedru nalong te, “Damai sa emi.”

⁵ Ay kafag mangama gtangda, at fagsegun te, duama ro gfon sa anya salapi.

⁶ Ay Pedru nalong te, “Kwe salapi, dewa katanya, e fon kro sa emu. Sa tam Fun Isus at ngayan, tagsiginans Nasaret, glong au emu te, malindugi ay loi.”

⁷ Ay Pedru nated kafag mangama at siun fag take ay nafalindug anya. Ay kafag mangama at ngay darafa ay at ngay lufuan anbitsug.

⁸ Ay kanya anlindug masakit ay malo wan ay nangalo Pedru ay Uan sas Dius at bale ay glao gtudtulbuan gseg Dius.

⁹ Ay fagayu taw nu nalag kafag taw nu glao ay nu gseg Dius,

¹⁰ natoglag te, kanya wan at malunggung gugat laman nanget kayu menit sis day sakbawan Dius at bale at nafangayan te, Masine fag Sakbawan. Ay fagayu taw maksvn nu kadulo.

Pedru Gfoyung sis Dius at Bale

¹¹ Ay kaduge kafag mangama gfagtean sis duama, ngay taw nanangakbang masakit sa anya fag tulu sis Sulumun at Tangbi Aba, ay kanya fagayu andulo maksvn aroro sat nalag.

¹² Ay Pedru nu nalag kafag ngay taw, glong sa anya fagayu te, “Em kaiban fag ngay taw Israel, wain ay fakaduloun ay nalag? Ay wain ay fagdamaun fia emi? O gamatangan am te, nafafia ami anya siginan em sadili fagmabalyananun ay em fagmatuyanun?

¹³ Duan! Bundi ami! Nu bunway tam mangaguyang tua Abrayam, Isak ay Akub at Dius at nafakamulun takatanya laman gfon famauseganan sat fagsuguan Isus. Ay nafon am anya sat mabalyanan fag ngay taw laman namabul, ay nafauri am anya sis Pilatu at daga salubangan, dewa kanya kaylat gfalfas anya.

¹⁴ Ay kanya dewa sik matuyan ay yud e malong, ankuri am anya, ay naet am te, falfasi sik takamabul fag taw.

¹⁵ Ay nafabul am tagagbilug tam leleg. Dewa katanya, Dius nafadog yay nafaleleg anya, ay mafatuyan ami sabaliwa anya.

¹⁶ Tuy fag mangama tagsi ay salubangan ay fagtoglagun, at faginbitsugun aroro siginan tua at fagafanudun sas Isus, ay kata ay nalag, kanya anfia aroro gafanud tua.

¹⁷ “Ku ngay faduksay, nasaful au te, wam nasaful ay nafakamulun sas Isus, ay katanya yangay ay ngay tagfangguna.

¹⁸ Ay baliwan ay nafakamulun takatanya, anfasludan Dius at nafoyung ebi siginan at ngay taglong at foyungan te, Dius ban at nafili fag Fun nanginkidapan.

¹⁹ Nu katanya, ubuni ay ngay asalanan ay afolii sas Dius, laman kanya gfalyam ay ngay asalanan, ay gfon ayu buknga laman manabayan tuam,

²⁰ ay gsugu ban sa ayu Isus, Dius at nafili fag Fun, ay umke fagmabitsugun ban am siginan anya.

²¹ Dius ban yakmay nafabagu fagayu nusnge wain, kata at foyungan sat ngay taglong ebi taguna, kanya ban gbanwan yay gugat sis banwa.

²² Kata Muisis at longan te, ‘Tam Fun Dius nanfili ban sik taglong kata angku siginan ay ngay kasugfunanan, ay faningi ban nusnge wain at longan sa ayu.

²³ Ay at yud ban gfaning kafag taglong at foyungan, gfasaman siginans Dius at furuan ay gfamin fia.’

²⁴ Ay katanya yay Dius at ngay taglong at foyungan sabaliwa katsi fag ngay menit, siginans Samwel ay anggan at naguyan anya fag ngay taglong.

²⁵ Dius at nafatuyanan sat ngay taglong, ay at nawat fag nasadian sa tam ngay mangaguyang, sa yangay antam. Ay kanya nalong sas Abrayam te, ‘Aroro sam kasugfunanan, gfon kban fagmasineun sas fagdaul daga at ngay taw.’

²⁶ Nu katanya, Dius nasugu at nafili fag fagsuguan, taguna sa ayu fag ngay taw Udyu laman ggubuk ayu gubun ay ngay asalanan.”