Ester 8 - Fanawbuid tagsibaliwas Fakayabian

Fun Nafili Mardukyu

¹ Ginanya yay fia fag menit, fun Akasuerus nafon Aman at ngay ramraman sas Ester. Aman ngay taw Udyu at fawayan. Ester nalong sat fun te, “Mardukyu ku kalongan,” nu katanya, fun nafauro Mardukyu.

² Fun nabul at fanumyu at famae fagtoglagan at nabul siginans Aman, ay nafon sas Mardukyu. Ay Ester nafatigwanan sas Mardukyu fagayu at ramraman at nabul siginans Aman.

³ Ester nadog yay fia nanangakbang sas fun Akasuerus gtudan gwayway sit salubangan. Get te, “Faragangi wan Aman fag taw Agag at algan mauri sa sangay taw Udyu.”

⁴ Fun nafatiuan sas Ester at tulag at mawatan gintu. Nu katanya, Ester namalindug sis fun at daga salubangan

⁵ ay nalong te, “Nu mauseganan ktua sa emu, mesug fag fun, ay nu matuyan ktua ay masine sa emu, get au sa emu te, riruki sik suguan famayud e masuad Aman, Amedata at baguama fag taw Agag, at nafafagdaul fag suguan taglong te, fabuli fagayu taw Udyu sim fagfagtainanan.

⁶ Kwa magwanta glag ku ngay kaiban ay ku ngay kalongan nu kamin.”

⁷ Fun Akasuerus nalong sas Ester ay sas Mardukyu fag taw Udyu te, “Nafarabing kwan Aman at ke algan mauri laman namabul ngay taw Udyu. Ay Ester, nafon kwan sa emu Aman at ngay ramraman.

⁸ Nu katanya, awati sik suguan ay riruki sanya ku ngayan nusnga setaw ay fakaylatun griruk laman sa sangay taw Udyu at fagmabayanun, ay fae fagtoglagani siginan ku fanumyu. Aroro sik rirukan nu marirukan tua ku ngayan, ay nu nafae fagtoglagan tua siginan ku fanumyu wa gbadbalian ya.”

⁹ Nu katanya, gina sis faduak safulu e tuluk menit sis fatuluk magdanun, Siban fag magdanun, nafauro ngay tagalaga fun at ngay ramraman. Kanya fagayu nariruk Mardukyu at ngay nalong. Kanya fag rirukan laman sa sangay taw Udyu, sa sangay fun ayu sirut, sa sangay fun ay sa tibak tagfangguna tagsanya fag ngay afud talun fag sik sandan duak safulu e fitu, tagsiginans Indya sitsigons Etiupya. Ay nariruk takatanya sas fagayu gaban taw at fangaringang, anggan sa sangay taw Udyu at fangaringang.

¹⁰ Mardukyu nariruk fun at ngayan ay nafae fagtoglagan fun at fanumyu. Ay sanya ginan, kanya nafabuba kafag rirukan sa sangay tagfosuk longan tagsaful gsakay sis fun at ngay kabayu at masakit.

¹¹ Ay siginan kafag rirukan, nafasaful sa sangay taw Udyu te, masine nu kaful laman gfalangfe at ngay sadili. Ay masine way gfabul nusnga sinu at namawayan anya fagayu siginan tibak gaban taw nusnga nday, ay laman gbalabag at ngay mangena ay at ngay sisian, ay nu gbul at ngay fawayan at ngay ramraman.

¹² Ngay taw Udyu namakamulun takatanya fagayu sas fun Akasuerus at fagfagtainanan at ngay afud talun gina sis falabi tuluk menit sis falabi duak magdanun, sis Adar fag magdanun.

¹³ Ay gfabuba kafag rirukan sas fagayu afud talun laman at fagaloan, ay gfasaful sas fagayu taw, laman ngay taw Udyu mafalganan tua gfalangfe at mesa sadili siginan at ngay fawayan ginanya fag menit.

¹⁴ Ay siginans fun at suguan, ngay tagfosuk longan nalao wa vtv, gsakay sit fun at ngay kabayu. Ay nafarapyag yangay sas furuan daul Susa kanya fag suguan.

¹⁵ Ay Mardukyu nu naduksun siginans fun at bale, kanya galanbungan malaksi ay maubian, ay sik lanbung aba at mawatan siginan at masine fag ramit maubian, ay gasangboan at mawatan siginans gintu, kata fun nu galanbungan. Ay ngay taw sis furuan Susa maksvn nu guro guseganan.

¹⁶ Ay fagayu taw Udyu guseganan ay gfanagsag.

¹⁷ Ngay taw Udyu tagsis fagayu furuan ayu daul ay sa sangay afud talun at nadungug fun at suguan, maksvn nu guseganan. Ay sanya fag talun ngayu at kintaip te, taw Udyu aroro anlimu ngay taw Udyu.