Ester 7 - Fanawbuid tagsibaliwas Fakayabian

Aman Narabingan

¹ Fun Akasuerus ay Aman andasug sas Ester at nafalganan fag yafun.

² Ay kaduge kanya fagayu ginum at fanlangu, fun gdog yay nainto sat mangena Ester te, “Nataw fia am fagetun? Longi wan ay gfon au emu dewa sik wabilug ku fagfagtainanan.”

³ “Mesug fag fun, nu mauseganan ktua sa emu, falangfei angku ay anggan ku ngay kaiban fag ngay taw Udyu. Kanya wan ku fagetun sa emu.

⁴ Aroro e nafatuyanan sik famonun sas fagayu taw at namabul emi. Nu e namabayad way emi laman namafagsuguan emi, gragangan kway lang, aroro tuy wa fia mafanud laman gfasalag au emu.”

⁵ Ay fun Akasuerus nalong te, “Sinu at namaskud namakamulun takatanya fag mauri, ay dada wan katsi kanya?”

⁶ Ay Ester gbalus te, “Em fawayan, Aman fag taw mauri.” Nu katanya, Aman maksvn nu kalimu sas fun ay Ester at daga salubangan.

⁷ Fun maksvn nu kadotama ay anlindug ay nasat tanuman sit day bale. Aman anfamato gfainfanyuan sas Ester aroro nasaful te, fun ro gfaurianan anya.

⁸ Fun nu nfoli siginan at tanuman, manlag di Aman malub sis Ester at salubangan fagtiugan. Ay fun nalong te, “Kaylat yay o namakamulun mauri sas Ester si ku basad bale!” Sanya ginan, fun nu ntabu garingang, tagsanya fag ngay tagulit nagamat Aman ay natabun at alfuyu.

⁹ Karbuna, fun at fagsuguan at sadi, nalong te, “Aman nafawat sik fagrabingan Mardukyu, at nafalangfe emu fag taw. Kanya fag fagrabingan at kabatan duak safulu e tuluk sangbada ay munakbang sit day bale.” Fun nasugu anya fagayu te, “Fasanyai nu nanrabing am anya!”

¹⁰ Nu katanya, kanya fagayu narabing Aman sat nafalganan fag fagrabingan laman sas Mardukyu. Ay fun at dotama nalyam wan.