Ester 6 - Fanawbuid tagsibaliwas Fakayabian

Nafauseganan Mardukyu

¹ Ginanya fag yabi, fun Akasuerus wa katiug, nu katanya, nasugu te, “Buli fansulitan sabaliwas fagfunanun.” Ay kanya nafatap at rirukan kaduge gdungugan.

² Natap sanya sik afud at fansulitan sabaliwa Mardukyu nu gsaful Bigtana ay Teres at algan laman gfabul fun Akasuerus. Bigtana ay Teres, fun at ngay fagsuguan, ay kanya fag dua ebi tagulit fun at fagtiugan at sakbawan.

³ Siginan at natap, fun nainto te, “Nataw tam famangsi ay famauseganan sas Mardukyu aroro sat nafakamulun?” Fun at ngay fagsuguan nalong te, “Mesug fag fun, duan.”

⁴ Ginanya yangay, Aman nasakbo laman nanlong sas fun sabaliwa nu grabing Mardukyu sat nafawat fag fagrabingan. Ay fun ginto te, “Sinu in at masakboan?”

⁵ Ay fun at fagsuguan nabalus anya te, “Aman.” Ay fun nalong te, “Tabani anya stie.”

⁶ Ay Aman nu sanya wan, fun ginto anya te, “Nataw at masine sa sik taw fun at fakaylatun gfauseganan?” Aman nu glong, anya fun at fagnamausegananun.

⁷ Nu katanya, kanya nalong anya te, “Mesug fag fun, fakatatuyi am fakamulun.

⁸ Sugui te, buli at sadi am lanbung kata sik fun at fagsulunun, gasfuan at sadi am sakayan kabayu, at ke fun at famatoglag sit alfuyu.

⁹ Sanya ginan, sugui sam tiba tungud fag tagfangguna at sadi te, fasuluni fun at lanbung sam fakaylatun gfauseganan fag taw ay fasakayi sas fun at kabayu ay fatungluani sas fagdaul furuan, ay at ngay ufud fagayu uroi te, ‘Katatuy at fakamulun sas fun at fakaylatun gfauseganan fag taw.’ ”

¹⁰ Fun nalong sas Aman te, “Agvd, namul o at sadi ku lanbung ay ku kabayu, ay namakamulun o fagayu am nalong sas Mardukyu, kanya fag taw Udyu at malunggung si ku day sakbawan bale. Tuyani fia te, umfasludan fagayu am ngay nalong.”

¹¹ Nu katanya, Aman nanamul fun at lanbung ay nafasulun sas Mardukyu ay nafasakay sat fun at kabayu ay nafatungluan sas fagdaul furuan kaduge kanya guro te, “Katatuy at fakamulun sas fun at fagfausegananun fag taw.”

¹² Sanya ginan, Mardukyu anfoli sas day sakbawan fun at bale. Ay Aman gabanganan guli maumutan at alfuyu aroro maksvn nu kapla.

¹³ Kanya nu ndasug sat bale, nafansulit sat mangena Seres ay sat ngay fagadgalangan, fagayu at kinfasludan sa anya. At mangena ay at ngay fagadgalangan ay ngay tagfalu longan, nalong anya te, “Mardukyu gababoun wa emu. Wa ban o mababo ya anya aroro kanya sik taw Udyu. Matuyan wan gababawan wo.”

¹⁴ Kanya fagayu kaduge kamatoan, fun at fagsuguan masakit nu gtaban Aman sas Ester at nafalganan fag yafun.