Ester 5 - Fanawbuid tagsibaliwas Fakayabian

Ester Nafainfanyuan sas Fun

¹ Gina sis fatuluk menit, Ester nasulun at fagsulunun gugat fag lanbung at famatoglag te, fun at mangena, ay kanya namalindug sis fun at basad bale gsalubang sat fun at suluk. Ginanya, fun malunggung sit faglunggungan ay gsalubang sabaliwas sakbawan.

² Ay nu nalag at mangena Ester, kanya guseganan maksvn ay nafatiuan at tulag at mawatan gintu. Nu katanya, Ester ankakbang ay nated at fungfung tulag.

³ Ay fun ginto anya te, “Nataw am fagayudanun ku fakesugun ku mangena? Longi ay gfon au emu dewa ro sik wabilug ku fagfagtainanan.”

⁴ Ay Ester nabalus te, “Mesug fag fun, nu kaylat o, ggewan au emu ay anggan Aman sa ku nafalganan fag yafun laman sa ayu.”

⁵ Ay fun nalong sat ngay fagsuguan te, “Nanguro am Aman laman namaning Ester at algan.” Nu katanya, fun ay Aman nalao wa vtv sas Ester at nafalganan fag yafun.

⁶ Ay kaduge duama ginum fanlangu, fun ginto sas Ester te, “Nataw fia am fagayudanun? Longi wan ay gfon kro emu dewa sik wabilug ku fagfagtainanan.”

⁷ Ay Ester nabalus te, “Katatuy ku fagetun sa emu,

⁸ nu maylat ktua sa emu, ay nu kaylat o gfon angku ku fagetun, gdog kyay ban fia gfastae ayu fagdua balabag, sa ku nafalganan fag yafun laman sa ayu. Ay ginanya ya ban nu glong au ku fagetun sa emu.”

Aman Namatangan Namabul Mardukyu

⁹ Ginanya fag menit, Aman guseganan mandi nu gduksun siginan sad fun at bale, dewa katanya, kanya kadotama nu nalag Mardukyu sis sakbawan fun at bale yud namalindug ay narungan laman gfalag te, gsuyu.

¹⁰ Dewa katanya, kanya nafaragang at sadili ay nataglayun wan nu guli. Ay nu ndasug sat bale, kanya nauro at ngay fagadgalangan ay at mangena Seres.

¹¹ Kanya kamatungudun sa anya fagayu at ngay ramraman ay at ngay sisian, ay fagayu fun at famauseganan sa anya ay sat nafon anya fag fanambagun gtungud tua fagayu tagfangguna ay anggan ngay fagsuguan.

¹² Ay kanya nalong yay fia te, “Bundi lang kanya, ebi gina Ester nafalganan sik yafun daul, au way lang fun at fadgaloan, ay balabag ban fun gdog yay gtaban angku.

¹³ Dewa katanya, takatanya fagayu wa mafafon sa angku fagmabayanun, kaduge kban glag Mardukyu fag taw Udyu nu malunggung sis day sakbawan fun at bale.”

¹⁴ At mangena ay at ngay fagadgalangan nalong anya te, “Fawati sik fagrabingan duak safulu e tuluk sangbada at kabatan. Ay balabag ban sbalabag, nanget o sas fun te, rabingi Mardukyu laman mabayan tuo fia gfadgaloan tam fun sat nafalganan fag yafun.” Nu katanya, Aman nafawat sik fagrabingan.