Ester 4 - Fanawbuid tagsibaliwas Fakayabian

Mardukyu Naet Gubuk sas Ester

¹ Mardukyu nu nasaful fagayu at kinfasludan, kanya nagirat at lanbung laman gfalag te, kabalu. Ay kanya nasulun saku ay nafasat alfuyu dafug, ay nasakbo sas furuan daul ay gwayway.

² Dewa katanya, si way tsigon day sakbawan fun at bale, aroro wa masine gfasakbo sas fun at bale at ke sulun saku.

³ Ay ngay taw Udyu sa sangay afud talun nu nadungug fun at suguan, kanya fagayu wa gfangon laman gdarangin, ay gwayway ay maksvn nu kabalu. Tangayu nasulun saku ay gtaygilidan sisad dafug.

⁴ Ester nu nasaful sabaliwas Mardukyu siginan at ngay fagsuguan fag mangena ay at ngay tagalaga anya, kanya anbalu. Kanya nafabuba sik lanbung sas Mardukyu laman at fantubus at lanbung fag saku, dewa katanya, Mardukyu wa naylat.

⁵ Nu katanya, Ester nafauro Atak, fun at tagfangguna at sadi laman tagalaga anya. Kanya nasugu Atak sas Mardukyu laman nanginsaful te, wain Mardukyu at fagfakamulunun takatanya.

⁶ Nu katanya, Atak nalao sas Mardukyu sas furuan daul at fagaweanan tagsis salubangan sakbawan fun at bale.

⁷ Mardukyu nalong fagayu at kinfasludan, ay nu seyu Aman at nafatuyanan at fagnamonun sas fun at fagsuadan ramraman, laman namabul ban fagayu taw Udyu.

⁸ Mardukyu nafon sas Atak at sadi kafag rirukan tagsiginans furuan Susa famasaful te, fabuli ngay taw Udyu, laman Atak namalag sas Ester ay namayamag sa anya fagayu at kindasug. Ay kanya glong sas Atak te, “Sugui Ester laman namainfanyuan sas fun te, gubuki at ngay kaiban.”

⁹ Atak anfoli sas Ester ay nalong fagayu Mardukyu at longan.

¹⁰ Ester nafafoli Atak sas Mardukyu ay nalong te,

¹¹ “Sas fagdaul fagfagtainanan fagayu nasaful wa te, nusnga sinu at kinkakbang sas fun at basad bale, mangama ay mangena, way nafauro, gfabul wan nu dway nafatiuan at tulag at mawatan gintu. Sik magdanun wan fun nu yud guro angku.”

¹² Atak nu nalong wan sas Mardukyu Ester at longan,

¹³ katatuy yangay Mardukyu at famalus sas Ester te, “Lag o gamatangan te, o way lang at kumlangfe sas fagayu taw Udyu aroro gbanwan o sis fun at bale.

¹⁴ Aroro dewa o fia manabayan gbanwan katsi fag buknga, e tiba way taggubuk ay tagfalangfe ngay taw Udyu, dewa katanya, o ay am ngay kalongan umbul ban. Tibaginan am faginsik fun at mangena laman gfalangfe o am ngay kaiban taw Udyu.”

¹⁵ Ay katatuy Ester at longan sas Mardukyu,

¹⁶ “Namaful o fagayu taw Udyu tagbanwan ste sfuruan Susa ay darangini yud gfangon laman sa angku. Lag am gfangon ay ginum kaduge tuluk menit. Au ay ku ngay fagsuguan fag mangena nandarangin yangay mi yud gfangon. Sanya ginan, sa kro sfun dewa gsalan way sis faugali. Ay nu nafabul wa ro angku, mafalganan kwa kabul.”

¹⁷ Nu katanya, Mardukyu nalao, laman namakamulun Ester at fagetun sa anya.