Ester 3 - Fanawbuid tagsibaliwas Fakayabian

Aman Namatangan Namamin ngay Taw Udyu

¹ Sanya ginan, fun Akasuerus nafabat Aman at fanambagun. Aman, Amedata at baguama, fag taw Agag. Nafili anya laman gtungud tua fagayu tagfangguna.

² Ay kanya nasugu sas fagayu at fagsuguan te, tudani famababauni sas Aman. Dewa katanya, Mardukyu wa kaylat gtudan.

³ Tibak tagfangguna ginto Mardukyu te, “Wain am fagyudun gfaning tam fun at suguan?”

⁴ Ay Mardukyu gbalus te, “Sik taw Udyu au.” Kayu menit, tibak tagfangguna gfaylatan anya laman nantudan sas Aman, dewa katanya, kanya wa gfaning. Nu katanya, ngay taw nanamansulit Mardukyu at nafakamulun sas Aman laman sumaful te, o gfabayan way lang at nafakamulun, aroro sat nalongan te, kanya sik taw Udyu.

⁵ Aman nu nalag Mardukyu nu yud gtudan sit daga salubangan laman kamababaun, maksvn nu kadotama.

⁶ Ay kanya nu nasaful te, Mardukyu sik taw Udyu, namatangan te, bundi lang Mardukyu at fagnamabulun, nu bunway anggan tua fagayu taw Udyu tagsis fun Akasuerus at fagfagtainanan.

⁷ Gina sis taguna fag magdanun, Nisan fag magdanun, sis falabi duak banwa Akasuerus nu gfunan, Aman nasugu te, “Insafuli laman sumaful te, nataw ban fag menit ay fag magdanun laman gfafasludan at algan.” (Kafag fanginsaful nafangayan te, “pur.”) Ay at nafili sis falabi tuluk menit sis falabi duak magdanun, Adar fag magdanun.

⁸ Aman nalong sas fun Akasuerus te, “Mesug fag fun, e sik gaban taw tagbanwan sa tibak afud talun sim fagfagtainanan at faugali tagsaman fagayu gaban at faugali, ay kanya fagayu wa galo am ngay suguan. Nu katanya, wa masine sa emu nu gfabayan way o takatanya fagayu.

⁹ Mesug fag fun, nu kaylat o, sugui te, fabuli wan kanya fagayu. Ay namasa kbans fun at fagsuadan ramraman tuluk sandan limak safuluk salapi laman famayad sa sangay taw tagfakamulun takatanya.”

¹⁰ Sanya ginan, fun nabul at fanumyu at fagtoglagan, ay nafon sas Aman, Amedata at baguama, fag taw Agag, taw Udyu at fawayan.

¹¹ Ay fun Akasuerus nalong anya te, “Emu wan am ngay salapi, dewa katanya, fakamuluni am fakaylatun sa sangay taw Udyu.”

¹² Nu katanya, ebi gina taguna fag magdanun sis falabi tuluk menit, Aman nafauro tagriruk. Ay kanya nafawat sik rirukan laman sas fagayu tagfagtainan sit fagfagtainanan, sa sangay afud talun at ngay fun, ay sa sangay tagfangguna sa sangay furuan, sat sadili fangaringang. Kanya fag rirukan nafawat sas fun Akasuerus at ngayan, ay nafae fagtoglagan siginans fun at fanumyu.

¹³ Ay ngay tagfosuk longan nafarapyag kafag rirukan sas fagayu afud talun. Nariruk sanya fag suguan te, kadasug ban sik menit nu gfabul ngay taw Udyu: ngay sisian, ay at mafagtainan, mangama ay mangena, ay gbul kanya fagayu at ramraman. Umfasludan ban takatanya sis falabi tuluk menit sis falabi duak magdanun, Adar fag magdanun.

^14-15 Sanya ginan, kafag ngay tagfosuk longan masakit nu namosuk sas fagayu afud talun fun Akasuerus at suguan, ay nafoyung sa sangay taw takatanya laman kanya fagayu gsaful nu ginain fag menit nu namabul ngay taw Udyu. Ay kafag suguan nafasaful yangay sas furuan Susa. Kaduge fun Akasuerus ay Aman malunggung ginum fanlangu, ngay taw sis furuan Susa gfansulitan sabaliwa at kindasug.