Esra 7 - Fanawbuid tagsibaliwas Fakayabian

Esra Andasug sas Erusalem

^1-6 Nu nlangfe ngayuk banwa, gina Artaserses at fun sis Persya, Esra andasug sas Erusalem siginan Babilunya. Esra, Seraya at baguama. Ay Seraya, Asarya at baguama. Ay Asarya, Kilkya at baguama. Ay Kilkya, Salum at baguama. Ay Salum, Saduk at baguama. Ay Saduk, Aytub at baguama. Ay Aytub, Amarya at baguama. Ay Amarya, Asirya at baguama. Ay Asirya, Merayut at baguama. Ay Merayut, Meraya at baguama. Ay Seraya Usi at baguama. Ay Usi, Buki at baguama. Ay Buki, Abiswa at baguama. Ay Abiswa, Finekas at baguama. Ay Finekas, Eleasar at baguama. Ay Eleasar, Arun at baguama, sik fun tagfon fanggalangun. Ay Esra sik takamoyung at nasaful sabaliwas Yawi, Israel at Dius, at rirukan tagsis Muisis at Faugali. At fun nafon fagayu at fagetun sa anya aroro Dius nagubuk tua anya.

⁷ Gina sis fafituk banwa fun Artaserses nu gfunan, Esra andasug sas Erusalem ay e ngay taw Israel at nanangalo anya: ngay tagfon fanggalangun, ngay taw Lebi, ngay tagsaful galubad, tagulit Yawi at bale at ngay sakbawan, ay at ngay fagsuguan sis Yawi at bale.

^8-9 Esra nalao siginans Babilunya gina taguna fag menit, taguna fag magdanun. Ay siginans Dius nu ggubuk anya, kanya andasug tua sas Erusalem, gina taguna fag menit, sis falimak magdanun, gina sis fafituk banwa Artaserses nu gfunan.

¹⁰ Dius nagubuk anya aroro kanya nafalganan tua fia at sadili sabaliwa nu gamatangan ay nu gfafasludan Yawi at foyungan, ay nu gfoyung at ngay faugali ay at ngay suguan sa sangay taw Israel.

Artaserses at Rirukan sas Esra

¹¹ Katatuy fun Artaserses at rirukan at nafon sas Esra fag tagfon fanggalangun ay fag takamoyung, at nasaful fia ngay suguan ay ngay faugali Dius at nafon sa sangay taw Israel:

¹² Au fun Artaserses, fagayu fun at fun. Nariruk au sa emu Esra fag tagfon fanggalangun ay tagfoyung tagsis banwa fag Dius at suguan.

¹³ Gsugu au te, nusnga sinu ngay taw Israel tagste si ku fagfagtainanan, anggan ngay tagfon fanggalangun ay ngay taw Lebi, takaylat galo emu gina o kafoli sas Erusalem, tabani wan.

¹⁴ Au ay ku tagfalu longan fag fitu, gsugu ami sa emu te, nanginsaful o sas Uda ay sas Erusalem te, o kanya fagayu gfaning tua fia Dius at suguan, kata am nasaful.

¹⁵ Ay bubai kafag salapi ay gintu, au ay anggan ku ngay tagfalu longan em nafalganan fia fag famonun laman sa sangay taw Israel at Dius, tagbanwan sis Erusalem.

¹⁶ Ay bubai yangay fagayu salapi ay gintu siginans Babilunya, anggan yangay ngay taw Israel ay ngay tagfon fanggalangun at nafalganan fag ngay fon yud fabulunan, laman sat Dius at bale sis Erusalem.

¹⁷ Tuyani fia te, kanya fag ngay salapi kanya wan ay famul ngay baka tama, tama tupa ay tama tupa riangan, ngay rawvg, ay ngay fanlangu laman ay fanggalangun sa ay Dius at bale sis Erusalem.

¹⁸ Ay at sawad fag ngay gintu ay fag ngay salapi masine wayam gagbilug anggan ay ngay kaiban nusnga setaw ay naylatan kata ay Dius at fakaylatun.

¹⁹ Dewa katanya, fagayu at nafatigwanan sa emu fag ngay fagagbilugun laman sa sangay tagfakamulun sim Dius at bale, fagayu foni wan sas Erusalem at Dius.

²⁰ Nung yay o e tibak fagayudanun sas Yawi at bale, namul o am famayad sam fagfagtainanan at fungsuan fag ngay ramraman.

²¹ Au fun Artaserses gsugu au sas fagayu tagalaga ramraman tagsis afud talun sis Eufrates at fakayabian baliwa te, foni sas Esra fag tagfon fanggalangun ay fag tagfoyung Dius at ngay suguan, nusnga setaw at fagetun.

²² Foni sa anya tuluk libu limak sandank fabudbungguan salapi, ay tuluk sandank saku trigu, ay limak sandan limak safuluk baringan fanlangu, ay limak sandan limak safuluk baringan langis ulibu, ay nu seyuk barara kata at fagayudanun.

²³ Foni yangay fagayu at fagayudanun sas Yawi at bale kata Dius at suguan. Aroro nu dway ro am nafon, Dius ro umdotama ku fagfagtainanan ay ku ngay sisian.

²⁴ Ay gfararang ami sa ayu te, lag am get sa sangay tagfon fanggalangun, ay sa sangay taw Lebi, sa sangay tagalubad, ay sa sangay tagulit Dius at bale at ngay sakbawan, ay tiba yak tagfakamulun sis Dius at bale, at famayad sas fun ay tiba yak fagbayadun.

²⁵ Ay o Esra, aroro Dius nafon tua emu fagsafulun, nanfili o sik ngay taw laman at nanfangguna ngay taw tagsis sik afud talun tagsibaliwas fakayabian Eufrates. Ay foyungi yangay Dius at suguan sa sangay taw at yud yay nasaful.

²⁶ Nusnga sinu ban at yud gfaning ay Dius at Faugali ay anggan ku faugali, kanya gafaurianan sas fakabulun, mannga gaiyan siginan at fagbanwanan, ay gbul at ngay ramraman, ay gubung.

Esra Nafauseganan Yawi

²⁷ Sanya ginan, Esra nalong te, “Segi Yawi tam ngay mangaguyang at Dius, at nafon sas fun sik amatanganan te, Fauseganani Yawi at bale sas Erusalem.”

²⁸ Aroro Yawi matuyan tua sa angku, fun ay at ngay tagfalu longan ay at ngay fagsuguan takadungug matuyan yangay sa angku. Ay aroro Yawi ku Dius ggubuk tua angku, kanya nafabitsug tua ku amatanganan laman gfaful au ngay taw Israel ay at ngay tagfangguna laman nangalo angku sas Erusalem.