Esra 5 - Fanawbuid tagsibaliwas Fakayabian

Tatenay at Rirukan sas Fun Daryu

¹ Sanya ginan, Israel at Dius nasugu at ngay taglong Agay ay Sakaryas, Iddu at fufu, laman namoyung sa sangay taw Udyu tagbanwan sis Uda ay sis Erusalem.

² Ay Serubabel, Sealtiel at baguama, ay Eswa, Usadak at baguama, nadungug Dius at longan, nu katanya, kanya fagayu gfataglayun nu kawat Dius at bale sis Erusalem. Ay kanya fag duak taglong nagubuk anya fagayu.

³ Ay wa glugo, Tatenay fag fun sirut sis fakayabian fag afud talun Eufrates andasug sas Erusalem, gadgaloan Setar-Busenay ay anggan at ngay fadgaloan, ay nainto sa sangay taw Udyu te, “Sinu at nasugu ayu te, ‘Fataglayuni nu kawat am Yawi at bale?’ ”

⁴ Ay nainto yangay fia te, “Sinu kafag ngay tagfakamulun at ngay ngayan?”

^5-7 Dewa katanya, Dius gdiri tua ngay taw Udyu at ngay fagtainan. Nu katanya, Tatenay, Setar-Busenay, ay anggan at ngay fadgaloan fag ngay tagfangguna si sik afud talun Eufrates, anke algan te, lag yap gfaragang nu kawat Yawi at bale yakmay nafasaful sas fun Daryu at kindasug. Ay kanya fagayu gfanya at famalus. Katatuy at nafabuba fag rirukan sas fun Daryu: Mesug fag fun Daryu, nangus manabayan tuo.

⁸ Em fun, gfasaful ami sa emu te, nalao ami sa sik afud talun Uda, sat fakawatan Yawi at bale. At fangawat Yawi at bale tagbia fag ngay gang, ay nafoli ngay kayu ayu daul sat alad laman magaras. Kanya fagayu maseganama nu gfakamulun, nu katanya, masakit nu kawat.

⁹ Ay nainto ami sat ngay fagtainan te, “Sinu at nasugu ayu te, ‘Fadogi yap awati Yawi at bale?’ ”

¹⁰ Ay nainto yangay mi at ngay ngayan, laman mafasaful ami sa emu nu sinu at ngay tagfangguna.

¹¹ Ay kanya fagayu nabalus emi te, “At ke fagsuguan emi, Dius tagagbilug banwa ay fagdaul daga. Nu katanya, gfadog ami kawat Yawi at bale, namafaning ebi Israel at fun at mabalyanan at nafawat.

¹² Em ngay mangaguyang nafauri tagsis banwa fag Dius, nu katanya Dius nafagbilug anya fagayu sas Nabukudunusur, Babilunya at fun. Nabukudunusur naiklas Yawi at bale ay nataban em ngay mangaguyang sas talun Babilunya.

¹³ Ay gina taguna fag banwa Sirus nu gfunan talun Babilunya, kanya nasugu te, ‘Fadogi awati Dius at bale.’

¹⁴ Ay kanya nafafoli sanya ngay fagagbilugun at mawatan siginans gintu ay sanbung salapi fun Nabukudunusur at nabul siginans Dius at bale sis Erusalem, ay at nabuba sat fagnansegan fag bale sas Babilunya. Ay fun Sirus nafatigwanan kanya fag ngay ramraman sas Sesbasar, at nafili fag tagfangguna sis Uda,

¹⁵ ay nalong sas Sesbasar te, ‘Fadogi awati Dius at bale sas Erusalem, fasii yap gugat ebi at fagbalean, ay fasakboi sanya kafag ngay ramraman.’

¹⁶ Nu katanya, Sesbasar ay at ngay ufud nalao sas Erusalem laman nangawat Dius at bale at ngay fagfatungkudan turuk.”

¹⁷ Mesug fag fun, katsi nu kaylat di o, namarvbvy talun Babilunya at ngay fun at ngay rirukan te, o anud fun Sirus nasugu te, “Fadogi awati Dius at bale sas Erusalem.” Ay fasafuli wa vtv sa emi am algan.