Esra 4 - Fanawbuid tagsibaliwas Fakayabian

E Nasalag nu Kawat Yawi at Bale

¹ Taw Uda ay taw Benamin at ngay fawayan nu nasaful te, at kinfoli siginan at fagatabananan gdog wan nangawat Yawi at bale,

² kanya fagayu nasas Serubabel ay sa sangay tagfangguna ngay talananan, ay nalong te, “Ggubuk ami ayu kawat Yawi at bale, aroro gseg yangay ami ay Dius kata ay fakamulun. Ngaduge wan nu gfon ami em fanggalangun sa anya, siginan yay Esarkadun nu gfunan talun Asirya, ay kanya yay at nataban emi stae.”

³ Dewa katanya, Serubabel, Eswa, ay ngay tagfangguna ngay talananan nabalus te, “Sirus, Persya at fun nasugu emi te, ‘Fadogi yap awati Yawi at bale.’ Dewa katanya, wam masine ggubuk emi kawat sik bale laman sa em Dius, ami yakman lang takawat laman sas Yawi, Israel at Dius.”

⁴ Nu katanya, kanya fagayu nafalimu ay nafamomuy te, sia tua at dan gbanwan sanya fag daga laman wa mafataglayun nu kawat Yawi at bale.

⁵ Ay kanya fagayu nafon famayad sas Persya at ngay tagfangguna laman gsalag ngay taw Uda at algan. Kanya fagayu gfataglayun at fakamulun takatanya gina Sirus gfunan sis talun Persya yakmay Daryu at fun sanya fag talun.

Nu Gsalag nu Kawat Yawi at Bale gina Artaserses Gfunan

⁶ Gina Akasuerus gfasigad gfunan, ngay taw Erusalem ay tiba yak taw Uda at ngay fawayan nariruk sik ngay fanlonganan sabaliwa anya fagayu.

⁷ Ay gina Artaserses Persya at fun, Bislam, Mitredat, Tabeel, ay tiba ya nariruk yangay sa anya sas Aram fag fangaringang.

^8-11 Ay Rekum fag fun sirut si sik afud talun ay Simsay fag tagriruk, nariruk yangay sas fun Artaserses laman gsalag ngay taw Israel. Katatuy at rirukan: Em fun Artaserses, ami am ngay fagsuguan iste fag afud talun Eufrates ay em ngay faudgufudan fag ngay funan ay fag ngay tagfangguna, ay ngay taw sis Tripulis, Persya, Irik, Babilunya ay anggan ngay taw Elam tagbanwan sis furuan Susa, ay Usnapar, Asirya at fun at mabalyanan ay takadungug at nataban fag ngay taw.

¹² Em fun, kaylat ami gfasaful sa emu te, ngay taw Udyu gdog yay kawat furuan Erusalem. Ay tagbanwan sanya at mauri way ay takamabo. Kanya fagayu andasug sanya siginan am fagagbilugun fag talun. Kanya fagayu nafasine wan alad ay anggan fagfatungkudan turuk.

¹³ Em fun, kanya ban fagayu nu nafadog way nawat ay nafasine kafag furuan at ngay alad, wa ban gfon ya at ngay famonun ay wa ban gfon ya sa emu famayad ay tiba yak fagbayadun ay kalay waban am ramraman.

¹⁴ Em fun, aroro am fagsuguan yangay ami, wami kaylat nu e fakaplaun o.

¹⁵ Namarvbvy ban o am ngay mangaguyang at ngay rirukan, nu katanya, sumaful o te, siginan ebi ngay taw tagbanwan sis furuan Erusalem kamabo ngay fun, ay kanya wan at faginfauriananun. Kanya fag furuan anrasras wan aroro gfauri way tibak fun ay tibak furuan.

¹⁶ Em fun, gfasaful ami sa emu te, nu nafadog way ban nawat tuy fag furuan ay nafasine at ngay alad wa ban o e fagagbilugun ya sis fakayabian baliwa Liskung Eufrates.

¹⁷ Ay fun Artaserses nabalus anya fagayu te, Griruk au sa ayu, Rekum fag fun sirut, ay Simsay fag tagriruk ay sas fagayu tagbanwan sis Samarya ay anggan sa tibak talun sis Liskung Eufrates at fakayabian baliwa. Ginsaful au ayu te, o manabayan tuam?

¹⁸ Ay nafadasug sa angku fag rirukan e nafalin sa em fangaringang ay natap sa angku.

¹⁹ Nafarvbvy au ngay rirukan, ay natuyan au te, anud glugo wan Erusalem nu gfabadbaboan at ngay fun. Kanya fag furuan kamabo way siginan ebi.

²⁰ Nasaful kyangay siginan kafag ngay rirukan te, tibak fun gagbilug furuan Erusalem ay get famayad ay tiba yak fagbayadun sat mabalyanan fag ngay fun tagfunan sas fagdaul afud talun tagsis Eufrates at fakayabian.

²¹ Katsi, sugui te, faragangi kanya fag ngay taw nu gfadog kawat at furuan yakmay kban gsugu.

²² Fakamuluni wa vtv takatanya laman ku fagfagtainanan di gafaurianan.

²³ Ay nu natap wan fun Artaserses at rirukan sas Rekum ay sas Simsay ay anggan sat ngay ufud, kanya fagayu nalao wan sas Erusalem ay nafabulun ngay taw Udyu te, faragangi wan nu kawat at furuan.

²⁴ Nu katanya, nafaragang yay nu kawat Dius at bale sis Erusalem sitsigons faduak banwa Daryu nu gfunan sis talun Persya.