Eremyas 8 - Fanawbuid tagsibaliwas Fakayabian

¹ Yawi glong yay fia te, “Ginanya yangay ban fag buknga, namul ban siginans fagfolian ngay fun at ngay bini, ay Uda at ngay tagfangguna at ngay bini, ay ngay tagfon fanggalangun, ay ngay taglong, ay tagbanwan sis furuan Erusalem at ngay bini.

² Ay namarapyagan kban sa sik talun kafag ngay taw at ngay bini. Ay matimrangan ban sis menit at sugba ay sis magdanun ay si sangay galeme at yamag. Katanya ban at faurianan sa kafag ngay taw aroro nesug menit ay magdanun ay ngay galeme, ay nafaning kafag ngay tagyamag ay ankakbang sanya ay nafauseganan.

³ Ay namasaruayan kban sa sangay talun at sawad fag ngay taw tagbanwan sanya fag talun at mauri, ay kanya ban fag ngay taw kaylat wan kabul nu gamut nu gleleg. Au, Yawi at Mabalyanan, taglong tuy.”

Asalanan ay Faurianan

⁴ Yawi nalong sa angku te, “Nanlong o sa sangay taw te, ‘O sik taw nu nlub, wa nangalunggung ya? Ay sik taw nu nalyam at dalan, o wa kafoli ya?

⁵ Dewa katanya, am fag ngay taw Erusalem, wain ay fagtalyuyanun gugat angku? Ay wain ay fakaylatun yay gugat ay ngay fagsegan at yud matuyan, ay wayam kafoli sa angku?

⁶ Nadungug kwan fagayu ay ngay nalong, dewa katanya, wa matuyan. Nusdi sadi si ayu we natalyuyan ay fagmauriun. Ay we ginto sat sadili te, “Wain ku fagnafakamulunun takatatuy?” Abat ngate, galay am at sadi gfataglayun wayam sas fagmauriun kasakit sik kabayu nu glagyu sas awayan.

⁷ Ngay manuk tungud saful tua nu ginain nu nanlayug sa tibak talun ay nu ginain nu kafoli, dewa katanya, ku ngay taw wa nasaful ku ngay faugali.

⁸ Setain nu malong am te, e fagsafulun am? O aroro saful wayam Yawi at faugali? At matuyan, ay ngay takamoyung natubus wan Yawi at faugali.

⁹ Ngay taw taglong te, e fagsafulun ami, umke fakaplaun ay umke fakalimuun aroro e nantaban ban anya fagayu. Aroro kanya fagayu natalyuyan ku ngay longan, nataw fag fagsafulun tagsi anya?

¹⁰ Nu katanya, namon kban at ngay mangena ay at ngay gamasun sa tibak taw. Ay dewa at yud e kwa ay takadungug, ay at ngay taglong ay at ngay tagfon fanggalangun gsud way gfangalabian salapi.

¹¹ Kanya fagayu gfutus oma ku ngay taw at bangbang ay wa fia kasalag, nu bunway glong way te, “Mabayan waymi!” Ay aroro mangaro, wa mabayan.

¹² O kanya fagayu kapla at ngay fakamulun at maksvn nu mauri? Duan! Kanya fagayu we apla ya! Nu katanya, glong au te, kanya fagayu umfaurianan yangay kata at ngay iba. Ay gina kban gfaurianan, kanya fagayu umkamin. Au, Yawi, taglong tuy.

¹³ Gfabul kban anya fagayu, ay gbul kwa ban at ngay wat ubas ay igus, ay kwa ban gfae sawad ya, ay anggan ban at ngay don kalangke wan. Ay gbul kyay ban ku nafon sa anya.’ ”

¹⁴ Sanya ginan, kanya fagayu glong te, “Nataw ya tam fagfanyaun? Gewan, glagyu watam sat maaladan fag ngay furuan ay nangabul tam sanya. Aroro Yawi tam Dius namabul wan antam, kata nu gfainum antam at maganga fag mamam, aroro anke asalanan tam sa anya.

¹⁵ Nafanya oma tam fagmanabayanun, dewa katanya, we ndasug. Nafanya oma tam fagmafianun, dewa katanya, at kindasug fagmalimuun way.

¹⁶ Tam ngay fawayan at ngay kabayu nu gengasan kadungug siginans Dan. Ay si omay lang at ngay uni, fagdaul talun gtadtaruyan wan. Kanya fagayu andasug laman nanrasras tuy fag talun, ay ste fag furuan ay fagayu tagsanya.”

¹⁷ Yawi nalong te, “Dungugani! Namadasug au sa ayu sik ngay fawayan takata at ke fangganga fag ule at yud e mafagup, laman nangagat ayu.”

¹⁸ Sanya ginan, Eremyas nalong te, Wa kafalyam ya ku fakabaluun. Maksvn nu gidapan au gamatangan.

¹⁹ Dungugani! Ku ngay kaiban gwayway kadungug sas fagdaul talun, ay glong te, “O nunda Yawi naubun wan furuan Erusalem? O nunda Siun at fun wa sanya ya?” Yawi nabalus te, “Wain ay fagnafadotamaun angku, siginan nu gseg am tibak fagsegan?”

²⁰ Ngay taw nabalus te, “Fanggutluan antabu wan, ay mangune anlangfe wan, dewa katanya, yo nafalangfe emi!”

²¹ Maksvn nu gidapan au gamatangan ku ngay kaiban at fagdalanun fag fagidapun.

²² O nunda sis Gilyad we famafia ya? O ay sanya we tagfafia ya? Wain ku ngay kaiban at ngay bangbang fagyudun kafia ya?