Eremyas 7 - Fanawbuid tagsibaliwas Fakayabian

Eremyas Kamoyung

¹ Yawi nalong sas Eremyas te,

² “Loi wan sa ku bale ay nanmalindug o sas sakbawan ay fadungugi sa ku ngay taw ku longan emu te, ‘Am fag ngay taw Uda tagseg Yawi at nangaful gugat stae fag bale, dungugani.

³ “ ‘Yawi at Mabalyanan, Israel at Dius glong te, Falyami wan ay ngay ugali ay anggan ay famanwanun at yud matuyan, laman ban gfabanwan ktua gugat ayu ste fag talun.

⁴ Lag am gafanud ngay taw at longan te, “We kadasug at malimu aroro Yawi at bale si wa antam.”

⁵ “ ‘Falyami wan ay ngay ugali ay anggan ay famanwanun at yud matuyan. Ay matuyani tua fia sa ay ngay iba,

⁶ ay lag am gfaidapan ya ngay taw tagsiginan tibak talun, ay at yud e ngay fagtainan ya, ay ngay fagbubayun. Lag am gfabul at yud e asalanan ay lag am gseg ya tibak fagsegan tagtaban ayu sas faurianan.

⁷ Nu nafakamulun tua ban am takatanya, gbanwan tua ban am gugat ste fag talun ku nafon sa ay ngay mangaguyang.

⁸ “ ‘Amatangani nu nataw ay nafakamulun! Nafanud am at yud e tungkul fag ngay longan.

⁹ Gfangkamul am, kamabul, kamatugtug, kamuagan nu gfatuyan, girug am famaebebanglu laman sas Baal, ay gseg am tibak fagsegan ay fagyudun toglag.

¹⁰ Ay ankakbang am ay nanangalindug sa ku daga salubangan ste si ku bale nu inda at fagnamauseganan angku. Ay glong am te, “Ste we kadasug ya at mauri sa antam.” Dewa katanya, gfataglayun yayam gugat gfakamulun at mauri.

¹¹ O nu glong am, tagfangkamul way at fagnanuksuanan tuy fag bale nu inda at fagnamauseganan angku? Saful kway ay ngay fakamulun si ku bale. Au, Yawi, taglong tuy.

¹² “ ‘Loi sas Silu, si taguna fag buknga ku nafili nu inda nu gfauseganan am ku ngayan. Nanlag am ku nafakamulun sanya aroro sa ku ngay taw Israel at fagmauriun.

¹³ Kaduge am gfakamulun at mauri, gfararang koma gugat ayu, dewa katanya, wam nadungugan. Nauro koma ayu ay wam nabalus.

¹⁴ Nu katanya, nu setain ku nafakamulun sis Silu, katanya yangay ban ku fagnamakamulunun ste fag bale nu inda at fagnamauseganan angku, ay tagfae fagsegun ayu, ku nafon sa ay ngay mangaguyang ay sa ayu.

¹⁵ Ay gaiyan kwan ayu siginan ku daga salubangan kata ku nafakamulun sa ay ngay kalongan fag ngay taw Israel.’

¹⁶ “Eremyas, lag o gdarangin laman sa kafag ngay taw. Ay lag o gfainfanyuan get sa angku laman sa anya fagayu, aroro kwa ngap ro gdungugan emu.

¹⁷ O nunda wo glag ngay taw at fakamulun sis talun Uda ay sis Erusalem at ngay dalan?

¹⁸ Ngay sisian ayu daul gfansarab, ay at ngay mama gfaigang, ay at ngay mina kawat tinapay laman at fanggalangun sat fagsegan at nafangayan te, Tagsis Banwa fag Mangena fag Fagsegan. Ay kanya fagayu gfon yangay ngay fanlangu sa tibak fagsegan laman gfauri angku.

¹⁹ O au kanya fagayu at nafauri? Duan! At ngay sadili yay at nafauri ay at nafapla.

²⁰ “Au, Yawi ay Fun, glong au te, namadasug au ste fag furuan ku dotama at maksvn: sa sangay taw, ay sa sangay fagbaugun, ay sa sangay fun kayu, ay sa sangay tanum. Ku dotama kata sik afuy at yud e mafarabung.

²¹ “Au, Yawi at Mabalyanan, Israel at Dius, glong au te, buli way ay oni ay ngay fagirugun fag ngay fanggalangun ay tiba ya ay fanggalangun.

²² Gina au gfaduksun ay ngay mangaguyang siginans talun Igiptu, ku ngay suguan sa anya fagayu bundi lang sabaliwa nu gfon fagirugun fag fanggalangun, ay tiba yak fanggalangun,

²³ nu bunway, nasugu kyangay te, ‘Faningi angku, ay au wan ay Dius, ay am wan ku ngay taw. Banwani kata ku nalong ayu fag balyawvtan laman ban mabayan tua nu gbanwan am.’

²⁴ “Dewa katanya, kanya fagayu wa nafaning ay wa nadungugan angku. Abat ngate, nafaksvn way nu kamaogatun at amatanganan ay nu gfakamulun at mauri. Ay kanya fagayu abat ngate nangakbang sa angku, gfataglayun way kayayu.

²⁵ Siginan ay ngay mangaguyang nu glao siginans talun Igiptu dasug katsi, gfataglayun kyay oma gugat gsugu ku ngay fagsuguan fag ngay taglong sa ayu.

²⁶ Dewa katanya, wam nadungugan ay nafaning kanya fag ngay taglong. Ay ay ngay amatanganan amogat yap ay ngay mangaguyang at amatanganan, ay ay ngay fakamulun amauri yap ay ngay mangaguyang at nafakamulun.

²⁷ “Eremyas, nu nananlong ro wo takatanya sanya fagayu, wa ro gdungugan emu. Ay nu nauro ro wo anya fagayu te, ‘Akbangi sa angku,’ wa ro gbalus emu.

²⁸ Nu katanya, nanlong yakman o sanya fag ngay taw te, ‘Am fag gaban taw at yud gfaning ay Dius Yawi ay at yud kaylat gfayfoyung. We si ya ayu fagmatuyanun ay wam e gfoyung ya at matuyan.

²⁹ “ ‘Ufoi ay ngay buk ay ukasi ay nagufoan laman gfalag am ay fakabaluun. Waywayani sis talun yud e taw fag ngay tagbudbuksulanun aroro Yawi natalyuyan wan ay nafabayan ayu fag ngay taw at nafadotama anya.’ ”

Fagfabulan fag Datag

³⁰ Yawi nalong te, “Ngay taw Uda nafakamulun at mauri. Ay kanya fagayu nafasakbo at masuya fag ngay fagsegan sa ku bale nu inda at fagnamauseganan angku, nu katanya, ansik masuya.

³¹ Ay kanya fagayu nawat sik fagirugan sis tungud buksul at nafangayan te, Tufet, tagsis datag Ben-Inum. Ay nairug sanya at ngay sisian laman at fanggalangun. Kdoma nasugu sa anya fagayu takatanya, ay kwe algan takatanya.

³² Nu katanya, au, Yawi, glong au te, madiriani tua aroro umdasug ban sik menit tuy fag datag wa kangayan ya te, Tufet ay datag Ben-Inum, nu bunway kangayan way ban lang te, Fagfabulan fag Datag. Ay sanya ban nu namoli ngayuk mabulan yakmay ban ankapnu.

³³ Ngay manuk tungud ay at madot fag ngay mela nangon ku ngay taw at bilug at mabulan, ay nusnga sinu we manansabug ya.

³⁴ Ay ginanya ban gfaragang kwan nu e guseganan sis furuan Erusalem at ngay fagaweanan. Ay si bans Uda wa yangay e kadungug ya at ngay bagu kadadwa nu guseganan, ay kanya ban fag talun umsik mabaluanan.”