Eremyas 6 - Fanawbuid tagsibaliwas Fakayabian

At ngay Fawayan Naligung Erusalem

¹ “Benamin at ngay kasugfunanan, lagyui ay nanuksuani! Loi wan siginans furuan Erusalem! Ay uyupi ay budyung sas furuan Tekwa ay fadungugi anggan sas Bet-Akerem fag furuan, aroro faurianan kadasug wan siginans fawalan fag alvngvdan.

² Nangiklas kban Erusalem fag furuan at masine.

³ Ngay tagfangguna ay at ngay tagfawayan nanligung furuan Erusalem. Kanya fagayu nangawat at ngay bale ramit nusnga nday at fakaylatun.

⁴ Ay at ngay tagfangguna glong te, ‘Falganani! Gina ro swabilug menit, namawayan tam anya.’ Dewa katanya, nu sawa sfafun baliwa, at ngay tagfangguna glong te, ‘Gakafalyuun wan menit ay gakadulumun wan.

⁵ Arvs ya ro sad yabi nu namawayan tam ay nangiklas at ngay alad.’ ”

⁶ Yawi at Mabalyanan glong te, “Nanggatvng ban am sik ngay kayu laman ay fangiklas furuan Erusalem at ngay alad, ay fabungsudi sik ngay lutuk sas tigyangan alad, laman ay dalan. Faurii wan tuy fag furuan aroro maksvn wan nu kamaidapan.

⁷ Kanya fagayu nu gfakamulun at mauri, kata sik bulbug nu gfamilugan. Ay takadungug sit furuan fagmauriun way lang. Glag kway gugat ke ngay fakasaitun ay tagabangbang.

⁸ Ngay taw tagbanwan sis Erusalem, kanya sik famararang sa ayu, ay nu dway am kaylat gdungugan, nangayayu au siginan ayu, ay ay talun umsik mabaluanan at yud e gbanwan ya.”

⁹ Yawi at Mabalyanan nalong yay fia te, “At sawad ban fag ngay taw Israel namamin kwan sat ngay fawayan, kata nu grabas taguyan fag rawvg ubas. Kanya fagayu gfalingamanun mandi sas wa don laman we fasawadan fagayu rawvg.”

¹⁰ Ay nainto au sas Yawi te, “Sinu ro ku fagnamararangan? Ay sinu yaro takaylat gdungugan angku? Ay kanya fag ngay taw nataup wan at ngay talinga laman wa gdungug angku. Ay kanya fagayu maksvn nu kauri am longan, ay wa kaylat gdungugan.

¹¹ Maksvn yangay nu kadotama au, kata Yawi nu kadotama, ay kwa kagwanta ya.” Yawi nalong te, “Namadasug au ku dotama sa sangay sisian tagawean, ay sa sangay baguama at maful, ay sa sangay dadwa ay anggan sat ngay mafagtainan wan.

¹² Ay namon kwan sa tibak taw at ngay bale anggan at ngay gamasun ay at ngay bubay. Umfasludan ban takatanya gina au nafaurianan ngay taw tagbanwan ste fag talun. Au, Yawi, taglong tuy.

¹³ Ay dewa at yud e kwa ay takadungug, ay at ngay taglong ay at ngay tagfon fanggalangun gsud way gfangalabian salapi.

¹⁴ Kanya fagayu gfutus oma ku ngay taw at bangbang ay wa fia kasalag, nu bunway glong way te, ‘Mabayan waymi!’ Ay aroro mangaro, wa mabayan.

¹⁵ O kanya fagayu kapla at ngay fakamulun at maksvn nu mauri? Duan! Kanya fagayu we apla ya! Nu katanya, glong au te, kanya fagayu umfaurianan yangay kata at ngay iba. Ay gina kban gfaurianan, kanya fagayu umkamin. Au, Yawi, taglong tuy.”

¹⁶ Yawi gdog yay glong te, “Nanmalindug am sa sangay sagbatan ay famanawani fia. Ay intoi te, inday at dan ay at matuyan fag dalan, ay laoi sanya. Ay umke fagmanabayanun ban am. Dewa katanya, glong wayam te, ‘Wami kaylat nandalan sanya.’

¹⁷ Nu katanya, nafili au ngay tagulit ay nalong ayu te, ‘Dungugani budyung nu gawang laman sik famararang sa ayu.’ Dewa katanya, nalong wayam te, ‘Wami kaylat gdungugan.’ ”

¹⁸ Nu katanya, Yawi nalong te, “Ngay talun at taw dungugani ay damai fia takafasludan sa ku ngay taw.

¹⁹ Ngay taw sas fagdaul daga, dungugani! Gfadasug kban sik maksvn fag faurianan sa sangay taw tagbanwan ste, laman sik faurianan sat ngay algan. Aroro kanya fagayu wa kaylat gdungugan ku ngay longan, ay wa nafaning ku ngay suguan.

²⁰ We tungkul sa angku at fanggalangun fag ngay famaebebanglu dewa siginans talun Syeba, ay at mabebanglu fag langis siginan tangayayu fag talun. Kwa kaylat at fagirugun fag ngay fanggalangun. Ay kwa guseganan at ngay fanggalangun.

²¹ Nu katanya, namoli au sa sangay taw at dalan sik fakataidan laman umlub. Ngay fagtainan ay at ngay sisian, anggan at ngay fagadgalangan ay at ngay fasabale umbul.”

²² Yawi nalong yay fia te, “Damai! E ngay tagfawayan kadasug siginans fawalan fag alvngvdan. Kanya fagayu siginan tangayayu ay at mabalyanan fag gaban taw at mafalganan laman namawayan.

²³ Kanya fagayu e ngay godun ay e ngay bangko, ay madot ay we afanyu. Ay kaduge gsakay sit ngay kabayu, at aringang kata sik lugwak nu gfawas. Kanya fagayu kadasug laman namawayan ayu, ngay taw Erusalem.”

²⁴ Nu nadungug ami takatanya, anmomuy ami ay kalimu ami ay e faganinianun kata sik mangena tagafasalugun wan.

²⁵ Wami gduksun ya laman gkoko sa em ngay gamasun, ay glao sas dalan aroro dewa nday e ngay tagfawayan at mafalganan gfabul. Kanya fagayu malimu.

²⁶ Ku ngay taw, suluni ay ngay lanbung ay dagingani sas wa dafug laman gfalag am te, kabalu am. Abalui maksvn kata ay ngenge tagsesadi nu nbul, aroro ay ngay fawayan masakit nu kadasug laman namawayan antam.

²⁷ Yawi nalong sa angku te, “Eremyas, nafili au emu kata sik taginsaful ngay sanbung, laman mainsaful o ku ngay taw at kaugalian.

²⁸ Kanya fagayu kamabo ay kamaogatun, katugas sik ngay tansu ay sanbung fia. Ay kamalingun ay gfandaya at ngay iba.

²⁹ Masugba oma at faigangan laman gfadalusan sanbung salapi siginan at mafasuglatan fag tansu, dewa katanya, kanya fag salapi wa kadalusan. Katanya yangay ku ngay taw, we masuad dewa au gfasine anya fagayu, aroro at fagmauriun wa nalyam.

³⁰ Ay kanya fagayu kangayan te, ‘Sik nakaurian fag salapi,’ aroro natalyuyan kwan anya fagayu.”