Eremyas 52 - Fanawbuid tagsibaliwas Fakayabian

Furuan Erusalem nu Karasras

¹ Sedekya at banwa duak safulu e sadi gina gfasigad gfunan. Kanya gbanwan sis Erusalem ay nu gfunan labi sadik banwa. At mina Kamutal, Eremyas at baguina fag taw Libna.

² Sedekya at fakamulun mauri way sis Yawi at daga salubangan, kata fun Yuyakim.

³ Nu katanya, Yawi andotama, ay naiyan ngay taw Erusalem ay taw Uda siginan at daga salubangan. Ay Sedekya nafamabo talun Babilunya at fun.

⁴ Sis fasafuluk menit, sis fasafuluk magdanun sis fasiamk banwa fun Sedekya nu gfunan talun Uda, fun Nabukudunusur, talun Babilunya at fun, ay fagayu at ngay tagfawayan anful sis day furuan Erusalem ay nafabungsud lutuk sis fun alad laman at fagsakboan.

⁵ Ay kanya fagayu maligung sis furuan Erusalem sitsigons falabi sadik banwa Sedekya nu gfunan.

⁶ Ay sis fasiamk menit sis faufatk magdanun ginanya yangay fag banwa, anke fanlunus maksvn sis furuan Erusalem ay ngay taw tagbanwan sanya we fakonun ya.

⁷ Ngay taw Babilunya naiklas wan sik afud Erusalem at alad, ay kanya fagayu dewa maligung wan, Sedekya ay at ngay tagfawayan naduksun gina mayabi sas sakbawan tagsis wabilug duak alad munakbang sis fun at tanuman, ay nalagyu sas Liskung Urdan.

⁸ Ay talun Babilunya at ngay tagfawayan nafafalo Sedekya ay nasud sis datag tagsis furuan Eriku. Sedekya at ngay tagfawayan ansaruayan siginan anya.

⁹ Ay Babilunya at ngay tagfawayan nagamat Sedekya ay nataban sas fun Nabukudunusur sas furuan Ribla, tagsis talun Amat. Ay sanya wan fun Nabukudunusur nu gtuyan te, fabuli wan Sedekya.

¹⁰ Ay sanya yangay, sis Sedekya at daga salubangan, Babilunya at fun nafabul Sedekya at ngay baguama, ay fagayu tagfangguna sis talun Uda.

¹¹ Ay nasugu yangay te, “Guladi Sedekya at ngay mata, ay siuki anya salambitan.” Ay nataban anya sas talun Babilunya. Ay Sedekya maubungan sanya, ay sanya wan nu kabul.

¹² Ay sis fasafuluk menit, sis falimak magdanun, ay sis falabi siamk banwa Nabukudunusur nu gfunan sis talun Babilunya, Nebusaradan fag tagfangguna ngay tagulit at fun andasug sas Erusalem.

¹³ Ay kanya nairug Yawi at bale, ay fun at bale, ay fagayu bale tagsis Erusalem, ay anggan at mafanud fag ngay taw at ngay bale.

¹⁴ Kanya nafangguna talun Babilunya at ngay tagfawayan, ay naiklas Erusalem at alad.

¹⁵ Ay kanya fagayu nataban at sawad fag ngay taw sanya ginan fag furuan, anggan at yud e kwa fag ngay taw ay ngay taw tagfadiuganan Babilunya at fun ay anggan fagayu tagsaful kawat.

¹⁶ Dewa katanya, kanya nafasawad yay sanya tibak taw at yud e kwa laman galaga ngay tanuman ubas ay ngay gamasun.

¹⁷ Ngay taw Babilunya narasras wan nusnge wain sis Yawi at bale: at ngay turuk mawatan tansu, ay famuba mamam fag ngay faguyudan, ay tagbia fag fagfegusan at nafangayan te, Dagat. Ay kanya fagayu nabuba sas talun Babilunya kafag ngay tansu.

¹⁸ Kanya fagayu nabul yangay ngay awali, ay tagbia fag ngay saruk, ay famagud salung at fagigangan, ay ngay taya fagsuadan famaramsig fag taguk, ay ngay tikung, ay tiba yak fagagbilugun mawatan tansu ngay tagfon fanggalangun at fagagbilugun.

¹⁹ Ay Nebusaradan nabuba yangay tagbia fag ngay fagfegusan, ay ngay famanus famaebebanglu, ngay taya fagsuadan famaramsig fag taguk, ngay bisu, ngay fagfatungkudan salung, ngay taya fagsuadan fanginum fag fanggalangun, ay tiba yak fagagbilugun at mawatan siginan at yud e suglat fag gintu ay sanbung salapi.

²⁰ Wa kafabudbungguan ya at kabyatan fagayu tansu tagsiginan kafag duak turuk ay tagbia fag fagfegusan at nafangayan te, Dagat, ay labi duak tama baka tagsis daga Dagat, ay famuba mamam fag ngay faguyudan, fun Sulumun at nafawat laman sas Yawi at bale.

²¹ Galay sik turuk at kabatan labi waluk siu ay at ligung labi waluk darafa gsugfunan, ay e sulat sis wabilug, ay at kadamvlan ufatk sumyu.

²² Galay si sik tungud turuk e kata sik alfuyu, at kabatan tuluk siu, ay mafaligungan ngay salambitan ay takata sik ngay pumigranata at rawvg.

²³ Galay sik turuk at tigyangan mesa e siamk safulu e unumk famasine takata pumigranata at rawvg, ay nu fagayu wan, kanya fag ngay famasine sadik sandan, marabingan si sangay fansiuk sis tungud turuk.

²⁴ Ay Nebusaradan nataban yangay Seraya fag fun tagfon fanggalangun, ay Sefanyas at faduak fun tagfon fanggalangun ay anggan fagtulu tagalaga sis Yawi at sakbawan bale.

²⁵ Ay kayu ya tuy at nalag at nataban siginans furuan: tagfangguna ngay tagfawayan sis Uda, fun at fagsuguan fag fitu, ay ngay tagfawayan at fun tagtaban ay tagfananad ngay taw laman sik ngay tagfawayan, ay unumk safuluk taw tagbanwan sanya.

²⁶ Nebusaradan nataban kanya fagayu sas talun Babilunya at fun sis furuan Ribla,

²⁷ sis Amat fag talun. Ay sanya wan nu gfabul anya fagayu. Ay ngay taw Uda natabanan sa tangayayu fag talun.

^28-30 Kayu tuy fun Nabukudunusur at nataban fag ngay taw Udyu: Gina kanya gfunan sis fafituk banwa, tuluk libu duak safulu e tulu. Ay gina sis falabi waluk banwa, waluk sandan tuluk safulu e dua. Ay gina sis faduak safulu e tuluk banwa, fituk sandan ufatk safulu e lima. Kayu kanya Nebusaradan at nataban. Ay fagayu at nataban ufatk libu unumk sandan.

Nafalfas Yuyakin

³¹ Ay gina sis fatuluk safulu e fituk banwa, Yuyakin, Uda at fun, nu maubungan, Ebil-Merudak ansik fun sis Babilunya, ay kanya nafalfas Yuyakin siginan at fagubungan sis faduak safulu e limak menit sis falabi duak magdanun ginanya fag banwa.

³² Kanya malukme sas Yuyakin ay nafauseganan anya gtungud yay sa tibak fun at natabanan sas Babilunya.

³³ Yuyakin wa gsulun ya at lanbung kata at maubungan fag taw at lanbung, ay gfangon tua gasfuan at fun sat fagfangonan.

³⁴ Ay kayu menit ay kaduge kanya gleleg, fun gfon sa anya at ngay fagayudanun.