Eremyas 51 - Fanawbuid tagsibaliwas Fakayabian

Famamut fag Faurianan sabaliwas Talun Babilunya

¹ Kata tuy ya Yawi at longan sabaliwas talun Babilunya: “Gfabulun au sat madot fag tagfawayan namawayan talun Babilunya ay at ngay tagbanwan sanya.

² Gfadasug kban ngay taw tagsiginan tangayayu fag talun laman namawayan ay nanrasras talun Babilunya, kata sik lalab nu gfalayug upa. Ay gina ban gfaurianan fag menit, kanya ban fag ngay taw namawayan nusnga nday fag afud talun Babilunya,

³ ay gfamin ban at ngay baguama ay anggan at ngay tagfawayan. Ginanya ban ngay tagsaful gagbilug godun sis talun Babilunya we buknga ya gagbilug at ngay godun ay gsulun at ngay famalabag.

⁴ Fagayu ban at nabasingan mataygilid way lang ngayu si sangaba dalan sis furuan Babilunya.

⁵ Dewa katanya, au, Yawi at Mabalyanan, Israel at Dius at yud e Malong, kdi naubun talun Israel ay Uda, dewa at ngay talun ankapnu fagmauriun.

⁶ Lagyui wan siginans Babilunya! Falangfei ay sadili! Wa masine nu kabul am aroro sa sangay taw Babilunya at ngay asalanan. Buknga wan laman namasud au talun Babilunya kata at ngay nafakamulun.

⁷ Kanya umkata sik taya mawatan siginans gintu tagsi ku daluap mapnu at malangu fag mamam. Kanya nafainum at malangu fag mamam sa sangay talun sas fagdaul daga, ay kanya fagayu nalangu ay anranug.

⁸ Masakit talun Babilunya nu karasras! Abalui wan anya! Namafia am at ngay nabasingan, bangaran ban umfia yay.”

⁹ Ngay taw Israel tagbanwan sanya glong te, “Nafabulun oma mi nafafia talun Babilunya, dewa katanya, kanya wa kafia ya. Nu katanya, gfabayan watam anya, ay guli watam sa tam mesa talun, aroro at ngay asalanan andasug wan sas banwa. Nu katanya, Yawi ban gfaurianan wan anya.

¹⁰ Yawi nafasud sa kafag ngay taw laman sa antam. Gewan, glo watam sas furuan Erusalem ay namoyung watam sa sangay taw Yawi tam Dius at nafakamulun fagayu.”

¹¹ Yawi namasud talun Babilunya aroro kanya narasras at bale. Yawi nataban talun Medya at ngay fun laman nanrasras talun Babilunya aroro katanya wan at algan. Kanya glong te, “Fataresi ay ngay bangko ay falganani ay ngay famalabag.

¹² Fabati sik ramit famasaful te, namawayan talun Babilunya. Famuti yap ay ngay tagulit, ay agbilugi at furuan. Buknga wan Yawi nu namakamulun at algan laman sas talun Babilunya.”

¹³ Talun Babilunya, ngayu tagsi emu liskung ke mamam tua gugat, ay ngayu yangay am ramraman. Dewa katanya, andasug wan am fakatabuan fag menit nu gafaurianan o.

¹⁴ Yawi at Mabalyanan nafatuyanan te, “Gfadasug kban sa ayu sik ngay fawayan kayu ngay liung, ay kanya ban fagayu guro te, nababo wami ayu.”

Nu Gfauseganan Yawi

¹⁵ Siginan Yawi at fagmabalyananun ay at fagsafulun, kanya nawat banwa ay fagdaul daga.

¹⁶ Siginan at aringang banwa gfangalung, ay gfae linyabu siginan sangay fungfung daga. Ay gfae limbad gina karak, ay gfadasug tagmara siginan at fagfungsuan.

¹⁷ Ngay taw tagseg ngay fagsegan sik yud way mamatanganan ay yud e fagsafulun. Ngay takawat gintu umkapla sat nawat fag ngay fagsegan aroro at awatan bunwa at matuyan fag fagsegan. Kanya fag ngay fagsegan wa gleleg,

¹⁸ ay we tungkul ay maksvn nu mauri. Gina ban gfaurianan fag menit, umkamin yangay ban at ngay awatan.

¹⁹ Dewa katanya, Akub at Dius di kata kafag ngay fagsegan. Kanya tua at nawat fagayu nusnge wain, ay kanya yangay at nafili ngay taw Israel. At ngayan Yawi at Mabalyanan.

Yawi at Famulpug

²⁰ Yawi nalong te, “O wan ku famalang, ku famawayan sas fagawayanan. Siginan emu, nanrasras au ngay talun ay fagfagtainanan,

²¹ ay ngay kabayu, ngay faguyudan at ke balingkitan ay at ngay tagsakay.

²² Nangagbilug kban emu, laman namamin au ngay mangama ay mangena, ngay fagtainan ay ngay sisian, ngay baguama ay baguina.

²³ Gfamin kyangay ban anggan at ngay fagbaugun, at ngay tagalaga tupa, at ngay tagtanum, at ngay baka ay at ngay tagfangguna ay tiba yak tagulit.

²⁴ “Ku ngay taw, gfalag kban sa ayu nu gfasud au sas talun Babilunya ay sas fagayu tagbanwan sanya aroro mauri at nafakamulun sas furuan Erusalem. Au, Yawi, taglong tuy.

²⁵ O, talun Babilunya, ku fawayan way o, nafangayan emu te, Tagfanrufa fag Buksul. Gfanrufa o fagdaul daga. Siginan ku fagmabalyananun nanrasras au ay nangirug emu.

²⁶ Wa ban e gang ya fangawat bale siginan emu. Ay umsik mabaluanan way ban o kabavn. Au, Yawi, taglong tuy.

²⁷ Fabati sik ramit famasaful te, gawayan wan! Uyupi ngay budyung sa sangay furuan! Falganani laman namawayan talun Babilunya. Sugui ngay talun Ararat, Mini ay Askenas at ngay tagfawayan laman namawayan. Filii yap sik tagfangguna laman namangguna namawayan talun Babilunya. Fadasugi ngay kabayu kayu ngay liung.

²⁸ Fafalganani Medya at ngay fun anggan at ngay tagfangguna ay at ngay tagulit, ay fagayu at fagagbilugun fag ngay talun laman namawayan talun Babilunya.

²⁹ Talun Babilunya ban guigan kata sik taw tagtadtaruyan ay maksvn at fakasaitun, aroro Yawi namafasludan wan at algan sanya fag talun laman we gbanwan ya sanya ay laman umsik mabaluanan.

³⁰ Babilunya at ngay tagfawayan umragang nu gfawayan ay maragangan way lang sit fagmafulan. Kanya fagayu ummomuy kata sik mangena. Ay tagsis Babilunya fag ngay bale umkirug ay at ngay dingding sakbawan umrasras wan.

³¹ Ngay tagfosuk longan andasug laman nanlong sas Babilunya at fun te, ‘E nagbilug wan fagdaul am talun.’

³² Naago wan fagdifean liskung ay nairug wan at ngay sigboan ay anlimu wan ngay tagfawayan.”

³³ Yawi at Mabalyanan, Israel at Dius, glong te, “Talun Babilunya kata sik tanum at munakbang wan nu kagutlu ay nu e gruyus.”

³⁴ Ngay taw Erusalem glong te, “Nabukudunusur talun Babilunya at fun kata sik ule daul naon emi. Ay kanya nafapsug anya em ngay ramraman, ay naubun wan em furuan ay we nafasawad ya nusnge wain, kata way lang sik tikung at yud e bilug ya.

³⁵ Ay kanya naiyan emi ay wami saful ya em fakamulun. E namakamulun yay nangus sas talun Babilunya kata at nafakamulun sa emi ay sa em ngay sisian. Umfasud nangus sa sangay taw Babilunya sat nafabulan emi.”

³⁶ Yawi glong te, “Ngay taw Erusalem, ggubuk au ayu ay namasud au laman sa ayu; namalanggang au dagat ay ngay bulbug tagsis talun Babilunya.

³⁷ Nanrasras kwan kafag talun, ay tiba bank taw umdulo at kindasug sa anya fagayu, ay gfalingun, ay tagbanwan ban sanya ngay idu talun way lang.

³⁸ Ay ngay taw Babilunya ban gsubang kata sik liun at riangan takalunus.

³⁹ Ay aroro kanya fagayu kalunus, namalganan au sik fagmafulun laman sa anya fagayu. Namalangu au anya fagayu laman guseganan, ay kanya ban fagayu ngabasad nu gtiug ay wa kafulo ya fagngabak buknga.

⁴⁰ Namuba au anya fagayu laman namabul kata sik ngay tupa ay ngay kambing.

⁴¹ Setain talun Babilunya nu karasas? Ay kanya oma ngay talun sas fagdaul daga at fakaduloun! Malimu tagdama at kinfasludan sa anya!

⁴² Talun Babilunya malubguban sit maksvn fag lugwak.

⁴³ Ay sanya fag ngay furuan mabaluanan way lang kata sik talun at yud e gbanwan ya ay at yud e gdalan ya.

⁴⁴ Gfaurianan kban Bel, talun Babilunya at fagsegan, ay gfafangkok kban at ngay naon. Ay ngay talun ban at ngay taw we nangadasug ya sa anya laman nanseg. Ay umrasras wan talun Babilunya at ngay alad.

⁴⁵ Ku nafili fag ngay taw, ayayui wan siginans Babilunya! Falangfei ay ngay leleg gina au yud yay nafadasug ku fandotaman sa anya fagayu.

⁴⁶ Dewa katanya, lag am kalimu ay kamomuy dewa am nadungug te, e awayan, aroro galay banwa e gbarita sabaliwa ngay fun nu gawayan.

⁴⁷ Nu ndasug ban at buknga, namaurianan kban ngay fagsegan sis talun Babilunya ay fagayu ban taw tagbanwan sanya fag talun umkapla. Ay fagayu ban at kinbul matangda way lang ngayu.

⁴⁸ Ay nu nfasludan ban takatanya, banwa ay fagdaul daga guro guseganan aroro talun Babilunya anrasras wan. Aroro ngay tagfawayan siginans fawalan fag alvngvdan nanrasras wan. Au, Yawi, taglong tuy.

⁴⁹ Rasrasi wan talun Babilunya, aroro kanya nafabul ngay taw Israel ay tiba yak taw sas fagdaul daga.

Yawi at Foyungan sa sangay Taw Israel tagsis Talun Babilunya

⁵⁰ Am fagayu tagsis talun Babilunya tagleleg yay, lagyui wan ay lag am karagang! Amatangi tua Yawi ay Erusalem dewa am si tangayayu fag talun.

⁵¹ Nalong am te, ‘Kapla ami, gafalingunan ami ay gafaplan, aroro tagsiginan tangayayu fag ngay taw nafasuya Yawi at bale.’

⁵² Dewa katanya, sik menit ban namaurianan kwan talun Babilunya at ngay fagsegan. Ay at nabasingan ban fag ngay taw Babilunya gidapan ay gfandeng, ay umdungug sas fagdaul at talun.

⁵³ Furuan Babilunya ban dewa gdasug sas banwa ay dewa gfaogat gugat at ngay alad, namadasug kban at nanrasras.

⁵⁴ Umdungug ban sas fagdaul talun Babilunya ngay taw nu gwayway aroro kanya fag talun anrasras wan.

⁵⁵ Grasras kban talun Babilunya ay maragangan way lang ban, ay at ngay fawayan ban kadasug kata sik lugwak nu gfawas ay namawayan anya fagayu. Ay kadungug ban kanya fagayu nu guro gina gfawayan.

⁵⁶ Kadasug ban at nanrasras talun Babilunya ay nantaban ban at ngay tagfawayan, ay at godun ban fagayu kalifung wan, aroro au, Yawi, tagfauri fagayu at mauri ay gfaurianan au talun Babilunya at kasakan sa anya.

⁵⁷ Namalangu kban at ngay tagfangguna, at ke fagsafulun, ay at ngay fun, ngay fun tagfawayan ay fagayu at ngay tagfawayan. Kanya ban fagayu ngabasad nu gtiug ay wa kafulo ya fagngabak buknga. Au, ay Fun, Yawi at Mabalyanan, taglong tuy.”

⁵⁸ Yawi at Mabalyanan nalong yay fia te, “Rasrasi wan talun Babilunya at ngay alad at madamvl ay irugi wan at ngay sakbawan tangabat. Wa ban e masuad fagayu tagbanwan sanya at nainlufuyan aroro kairug ban.”

Eremyas at Foyungan laman sas Talun Babilunya

⁵⁹ Katatuy Eremyas at longan sas Seraya, fun Sedekya at fagsuguan at sadi. Seraya, Nerya at baguama, ay Makseya at fufu. Eremyas nalong tuy fag longan gina Seraya nalao sas talun Babilunya gadgaloan fun Sedekya, sis faufatk banwa Sedekya nu gfunan sis Uda.

⁶⁰ Eremyas nariruk sat mafalutan fag fagrirukan fagayu faurianan takadasug sas talun Babilunya.

⁶¹ Eremyas nalong sas Seraya te, “Nu ndasug o sas talun Babilunya namabia o nu gtap o ay famayamagi sa sangay taw tuy fag rirukan.

⁶² Ay nu ntabu wan, darangini sas Yawi te, ‘Rasrasi wan kafag furuan laman we gbanwan ya sanya dewa taw ay nusnge wain tagleleg ay laman ban kafag furuan umsik mabaluanan way lang.’

⁶³ Ay nu natap ro wo tuy fag rirukan, rabingi sanya sik gang ay ukasi sasad Liskung Eufrates.

⁶⁴ Ay longi te, katanya ban takadasug sas talun Babilunya, kanya ban kalubgub ay wa kalakwi ya, aroro sas Yawi at fagnamadasugun fag ngay faurianan. Ay fagayu ban taw tagbanwan sanya kabul wan.” Katanya Eremyas at foyungan taguyan.