Eremyas 50 - Fanawbuid tagsibaliwas Fakayabian

Sik Foyungan sabaliwas Babilunya

¹ Katatuy Yawi at longan sas Eremyas sabaliwas talun Babilunya ay sa sangay tagbanwan sanya:

² “Fadungugi sa sangay talun foyungan at yud e masuksukan ay fabati sik ramit, famasaful te, talun Babilunya anrasras wan. Ay at ngay fagsegan at mapla anrufa wan anggan at fagsegan Bel ay Marduk anrufa yangay.

³ E sik talun ban siginans fawalan fag alvngvdan namawayan talun Babilunya, ay Babilunya ban mabaluanan way lang. Ay wa ban e gbanwan ya sanya aroro at ngay taw anggan at ngay fagbaugun nalagyu wan.

⁴ “Au, Yawi, glong au te, matuyan ginanya ban fag buknga, ngay taw Israel ay ngay taw Uda kakbang wan sa angku, at Dius Yawi.

⁵ Kanya ban fagayu ginto te, ‘Dada dalan tagsas furuan Erusalem aroro glao ban mi sanya?’ Ay kanya ban fagayu nangawat sik nasadian at yud e fakatabuan laman sa angku ay gamatang tua ban gugat kafag nasadian.

⁶ “Ku ngay taw kata sik ngay tupa at nalyam. Aroro at ngay tagulit nafalibangun anya fagayu sa sangay fungsu ay sa sangay buksul ay kanya ban fagayu wa saful ya gtvbtvban at dalan gina kafoli.

⁷ Ay kanya fagayu naonan nusnga sinu at nalag anya fagayu. Ay at ngay fawayan glong te, ‘Kanya fagayu anke asalanan sas Yawi, at ngay mangaguyang at fagfiangalayan ay at fagsegun, nu katanya, wa tam e asalanan dewa tam nanamawayan anya fagayu.’

⁸ “Lagyui wan siginans talun Babilunya! Ubuni wan kanya fag talun! Gunai wa lagyui kata sik kambing nu gguna tibak kambing.

⁹ Aroro gfadasug kban at mabalyanan fag ngay talun at ngay taw tagsiginans fawalan fag alvngvdan. Ay kanya ban fagayu namawayan ay nangagbilug talun Babilunya. Ay at ngay tagfana mafananadan ay mafatayuk.

¹⁰ Kanya ban fagayu namamin talun Babilunya at ngay ramraman ay umfanud ban. Au, Yawi, taglong tuy.

¹¹ “Ngay taw Babilunya, naago am ku ngay taw at ngay ramraman, ay gfanagsag am ay guseganan kata sik tumad baka tina sis fagfafangonan ay kata sik kabayu tama tagfanagsag guni.

¹² Nu katanya, gfae fakaplaun kban ay talun. Ay umsik afanyuan ban sas fagayu talun, ay mabaluanan, ay umkata sik talun at yud e taw.

¹³ At kaksvnan nu kadotama au kafag talun, wa ban e gbanwan ya sanya ay mabaluanan way lang ban. Ay fagayu ban tagdalan sanya umdulo.

¹⁴ “Am, at mafananadan gagbilug godun, nangatalad am sa ay fagulitan ay nanligung am talun Babilunya. Ay fanai anya fagayu aroro maksvn wan at asalanan sas Yawi.

¹⁵ Am fag ngay talun, uroi faurii talun Babilunya! Damai, talun Babilunya nafababaun wan! Ay at ngay bale tangabat anrasras wan ay at ngay alad anrufa wan. Yawi nafasud sanya fag talun. Nu katanya, fasudi yangay anya ay fakamuluni kata at nafakamulun sa tiba.

¹⁶ Aiyani wan siginans talun Babilunya at ngay tagtanum ay at ngay taggutlu. Falangfei at ngay natabanan siginan at ngay fawayan at fiso tagsumbalian at uyup ay falagyui wa kanya fagayu ay faulii sat mesa fagbanwanan.

¹⁷ “Ngay taw Israel kata way sik ngay tupa at nasaruayan aroro ngay liun gfafalo. Taguna, fun Asirya naon anya fagayu, ay Nabukudunusur, Babilunya at fun, at narufa at ngay bini.

¹⁸ “Nu katanya, au, Yawi at Mabalyanan, Israel at Dius, glong au te, gfaurianan kban fun Nabukudunusur ay at fagfagtainanan kata nu gfaurianan au Asirya at fun.

¹⁹ Dewa katanya, gfafoli kban ngay taw Israel sat talun. Ay kanya ban fagayu umkata sik ngay tupa tagfangonan sis buksul Karmel, ay sis datag Basan, ay tagsis Efraim ay sis Gilyad fag ngay buksul, ay kanya fagayu umkapsug.

²⁰ Ginanya ban fag ngay menit, at kinsawad fag ngay taw Israel ay Uda wa gasalanan ya, aroro nafalyam kwan at ngay asalanan. Au, Yawi, taglong tuy.”

Yawi at Faurianan sas Talun Babilunya

²¹ Yawi nalong yay fia te, “Namawayan am talun Merataim ay talun Pekud. Namabul am anya fagayu yakmay namin laman sik fanggalangun sa angku. Faningi fagayu ku suguan ayu.

²² Fadungugi nu gudguroan am gfawayan, ay nu grasras am.

²³ Talun Babilunya kata sik famalang nu grufa ngay talun, dewa katanya, kanya way at kinrufa. Ay tibak talun nalag kafag talun nu karufa!

²⁴ “Talun Babilunya, ankiktan o sa ku naton fag litag laman sa emu. Nagamatan o aroro sam fakamatungudunun.

²⁵ Naluang kwan ku fagfasuksukan ngay famabul ay nafaduksun kwan kafag ngay famabul aroro kadotama au maksvn. Au, ay Fun, Yawi at Mabalyanan at ke algan namaurianan ayu, tagbanwan sis talun Babilunya.

²⁶ “Am, at namawayan talun Babilunya siginan tangayayu fag talun, fawayani wan! Ay luangi at ngay bale famoy. Ay fabungsudi ay nagrufan kata nu gfaful at gutluan. Famini wan taw Babilunya ay lag gfae sawad ya.

²⁷ Fabuli wan fagayu at tagfawayan kata nu gfabul ngay tumad baka. Fabuli wan kanya fagayu. Afanyuan kanya fagayu aroro buknga wan nu gfaurianan au anya fagayu.

²⁸ “Dungugani at nalagyu fag ngay taw siginans talun Babilunya nu gfansulit sas Erusalem nu setain Yawi nu gfaurianan talun Babilunya aroro sat nafakamulun sas Yawi at bale.

²⁹ “Fauroi ngay tagsaful gagbilug godun laman namawayan talun Babilunya! Nanligung am kafag furuan laman we malagyu ya. Namasud wam fia anya fagayu sat nafakamulun mauri. Namakamulun am kata at nafakamulun sat iba aroro nafawayan Yawi, Israel at Dius at yud e Malong.

³⁰ Ginanya ban fag ngay menit, at ngay baguama anggan fagayu at tagfawayan kabul sas fagaweanan.

³¹ “Au, ay Fun, Yawi at Mabalyanan, glong au te, o takamatungudun fag talun Babilunya, ku fawayan o! Aroro buknga wan nu gfaurianan au emu.

³² O takamatungudun, umrasras ban o ay wa ban e ggubuk ya gfalunggung emu. Nangirug kyangay ban am ngay furuan tagsim ligung.”

³³ Yawi at Mabalyanan nalong yay fia te, “Ngay taw Israel ay ngay taw Uda nafalingunan ay natabanan. Ay naulit fia anya fagayu laman wa manangafoli ya sat talun.

³⁴ Au wan Yawi at Mabalyanan kanya fagayu at tagfalangfe. Ggubuk au anya ay gfae fagmanabayanun, dewa katanya, namaurianan kban tagbanwan sis talun Babilunya.

³⁵ “Au, Yawi, glong au te, faurianan fag fiso tagsumbalian at uyup namaurianan ngay taw Babilunya at ngay tagfangguna ay anggan at mamatanganan fag ngay taw!

³⁶ Ay namaurianan yangay takamuagan fag ngay taglong ay kanya fagayu umsik yud e fagsafulun! Ay namaurianan yangay at ngay tagfawayan, ay kanya fagayu umlimu maksvn!

³⁷ Ay faurianan fag fiso tagsumbalian at uyup gfaurianan yangay at ngay kabayu, ay anggan tagsakay sit ngay faguyudan at ke balingkitan, ay fagayu at nanggubuk anya. Kanya fagayu ummomuy kata sik mangena. Ay gbul yangay at ngay ramraman ay gbuba wan.

³⁸ Ay fagayu at fagnamulan mamam ankatat wan! Aroro sis talun Babilunya mapnu wan ngay fagsegan, tagfalyam ngay taw at amatanganan siginan nu gfalimu anya fagayu.

³⁹ “Tagbanwan ban sis talun Babilunya ngay mangilafang way lang at mela, ngay idu talun, ay ngay ebo. Ay wa ban e taw ya at namanwan sanya kabavn.

⁴⁰ Nu setain Dius nu grasras Suduma ay Gumura ay tagsit ligung fag ngay furuan, katanya yangay ban takafasludan sas talun Babilunya. Ay wa ban e gbanwan ya sanya. Au, Yawi, taglong tuy.

⁴¹ “Damai! E ngay tagfawayan kadasug siginans fawalan fag alvngvdan. Kanya fagayu anggan at ngay funan sik mabalyanan fag gaban taw. Kanya fagayu siginan tangayayu, ay mafalganan laman namawayan talun Babilunya.

⁴² Kanya fagayu e ngay godun ay e ngay bangko, ay madot ay we afanyu. Ay kaduge gsakay sit ngay kabayu, at aringang kata sik lugwak nu gfawas. Kanya fagayu kadasug laman namawayan ayu, ngay taw Babilunya.

⁴³ Ay talun Babilunya at fun nu nadungug takatanya, anmomuy, kalimu ay e faganinianun kata sik mangena tagafasalugun wan.

⁴⁴ “Sik liun tagsiginan at fagsuksuanan sis tigyangan Liskung Urdan gfarapyagan ngay tupa tagsis fagfafangonan sis day liskung. Katanya yangay ban nu namafalo au ngay taw Babilunya siginan at talun. Ay namatigwanan kban at talun sa ku nafili fag ngay taw. Sinu takata angku? Sinu at manamaskud namabadbaboan angku? Sinu fag tagfangguna at manamawayan angku?

⁴⁵ Nu katanya, dungugani, katatuy ku algan ku fagnamakamulunun sas talun Babilunya: Gtaban kban at ngay sisian ay nanrasras kban at ngay fagbanwanan.

⁴⁶ Ay at kaksvnan ban ngay taw Babilunya nu gatabanan, daga guigan ay kanya ban fag ngay taw nu gwayway kadungug sas fagdaul daga.”