Eremyas 5 - Fanawbuid tagsibaliwas Fakayabian

Furuan Erusalem at ngay Asalanan

¹ Yawi nalong te, “Ngay taw Erusalem, loi sa ay ngay dalan ay damai ay ngay fagaweanan! Ay nu e nalag tua ro am at masine ay at matuyan, gfalyam kban ay furuan at asalanan.

² Dewa am glong te, ‘Gfatuyanan au sas Yawi, tagleleg fag Dius,’ kamuag wayam.”

³ Sanya ginan, nalong au sas Yawi te, “O grvbvy o at matuyan fag taw? Nafauri o am nafili fag ngay taw ay wa nkuri. Nafaurianan o anya fagayu ay wa kaylat gfayfoyung. Kanya fagayu nafamaogatun ay wa kaylat gubun at ngay asalanan.

⁴ Nu glong au, kanya fagayu sik ngay yud way e kwa ay at yud e fagsafulun. Aroro kanya fagayu sik ngay yud way saful at Dius Yawi at ngay balyawvtan.

⁵ Nu katanya, glao au sat ngay tagfangguna laman namakamatoan. Anud kanya ro fagayu sumaful Yawi at ngay balyawvtan, at masuad te, sumaful at Dius at fakaylatun.” Ay dewa katanya, nu nafakamatoan au, kanya fagayu wa naylat gfaning Yawi at fagyafafakamulunun.

⁶ Nu katanya, at ngay fawayan namaurianan anya fagayu kata sik idu talun, ay kata sik mela tagfanya at fagnangonun tagduksun siginans furuan. Umfasludan takatanya sa anya fagayu aroro ngayu ginan gtalyuyan Yawi.

⁷ Yawi nalong sa anya fagayu te, “Wain ro ku fagfalyamun ay ngay asalanan? Ay anggan ay ngay sisian natalyuyan wan angku ay nafatuyanan sat yud matuyan fag ngay fagsegan. Nafon koma anggan sa ay ngay sisian at ngay fagayudanun. Dewa katanya, natalyuyan yayam fia angku ay maful am si takamatugtug fag mangena at bale.

⁸ Kanya fagayu kata sik ngay kabayu tama at ke tagulit tua. Ay galay at sadi maksvn nu galabian tibama at mangena.

⁹ O nunda kwa ro masine gfaurianan anya fagayu aroro sat ngay nafakamulun mauri? Ay o nunda ro kwa yangay masine gfasud takatanya fag ngay taw? Au, Yawi, taglong tuy.”

¹⁰ “Israel at ngay fawayan, nanrasras am at ngay tanuman wat ubas, dewa katanya, lag yap gfamin. Gatvngi yap lang at ngay sanga, aroro kanya fagayu ansaruayan wan siginans Yawi.

¹¹ Ngay taw Israel ay ngay taw Uda wa matuyan ya sa angku. Au, Yawi, taglong tuy.

¹² Kanya fagayu wa gfoyung at matuyan sabaliwa angku. Abat ngate, glong way te, ‘Yawi wa gfaurianan antam! We faurianan, we malimu, ay we fanlunus takadasug sa antam.’

¹³ Ngay taglong at ngay foyungan we tungkul ya aroro wa siginan angku. Umfasludan nangus sa anya fagayu at nalong fag ngay faurianan.”

¹⁴ Nu katanya, Yawi nalong sa angku te, “Siginan takatanya fag ngay longan, nanlong au sa emu sik foyungan takata sik afuy at namaurianan anya fagayu.”

¹⁵ Yawi glong te, “Ngay taw Israel, namadasug au sa ayu sik gaban taw tagsiginan tangayayu fag talun laman namaurianan ayu. Kanya sik gaban taw taglugo wan nu gbanwan sit talun, ay ay fagyudun togdungug at fangaringang.

¹⁶ Ay kanya fag talun at ngay tagfawayan fagayu madot ay maseganama, ay at ngay banyas kamabul.

¹⁷ Kanya ban fag gaban taw namamin ay ngay gutluan, ay ay ngay fakonun, ay namabul ay ngay sisian, ay ay ngay fagbaugun, ay namamin ay ngay tanum wat ubas ay anggan ay tanum igus. Ay nangiklas ban ay fagnansarigan fag ngay furuan ke alad.

¹⁸ “Dewa katanya, ginanya ban fag menit kwa ban gfamin ayu.

¹⁹ Ay nu e ginto way ban te, ‘Wain Yawi tam Dius at fagnafakamulunun sa antam takatanya?’ balusi ban te, ‘Aroro natalyuyan am Yawi, ay naseg am tibak fagsegan si ay talun. Nu katanya, katsi nangafagsuguanan am sa ay fagyudun toglag fag gaban taw.’

²⁰ Nanlong am sa sangay taw Israel ay sa sangay taw Uda te,

²¹ ‘Am fag ngay taw at yud e fagsafulun ay takamaogatun, dungugani ku longan. E ngay mata oma am, dewa katanya, wam glag, ay e ngay talinga oma am, dewa katanya, wam gdungug.’ ”

²² Yawi glong te, “O nunda wam kalimu ya angku? Wain ay fagyudun gtadtaruyan si ku daga salubangan? Au wan at nawat ngay lagnas laman fatuan dagat, laman mamam wa masakfo. Ngay lugwak gdalusung lagnas sis tigyangan dagat, dewa katanya, wa masakfo.

²³ Dewa katanya, kanya fagayu kamaogatun ay kamabo, ay nalyam ay natalyuyan angku.

²⁴ Ay at ngay longan wa siginan at ngay amatanganan, kanya fagayu dewa glong fia te, ‘Gseg watam Yawi tam Dius, tagfon antam arak gina abagat, ay tagfon antam ngay rawvg gina fanggutluan.’

²⁵ Siginan ay nafakamulun at mauri, fagayu nusnge wain anyayu siginan ayu. Ay ay ngay asalanan gsalag nu mabul am ngay famonun.

²⁶ Ku ngay taw at mauri gfanya at fagnamauriun. Kanya fagayu kata sik takawat sangdaw fanggamat ngay manuk tungud, ay nafoli sangdaw laman sa sangay taw.

²⁷ Kanya fag ngay taw at bale mapnu at nafangkamul fag ngay ramraman, kata sik fagubungan manuk tungud at yud e fakasakan ya. Nu katanya, kanya fagayu ansik ngay maramraman, ay ansik ngay mabalyanan.

²⁸ Kanya fagayu antaglu ay anbitsug, ay maksvn nu gfakamulun at mauri. Ay wa gfon fagmasineun sat yud e fagtainan ya, ay wa kafanyu ya at yud e kwa.

²⁹ Au, Yawi, glong au te, o nunda kwa ro masine gfaurianan anya fagayu aroro sat ngay nafakamulun mauri? Ay o nunda kwa ro masine gfasud sa takatanya fag talun at ngay taw?

³⁰ Maksvn nu malimu takafasludan sa kafag talun.

³¹ At ngay taglong kamuag nu gfoyung, ay at ngay tagfon fanggalangun gfangguna siginan at ngay sadili fagsafulun, ay ku ngay taw maksvn nu kaylat takatanya. Dewa katanya, tain ban at fakamulun nu ndasug at fakatabuan fag buknga?”