Eremyas 49 - Fanawbuid tagsibaliwas Fakayabian

Sik Foyungan sabaliwas Amun

¹ Katatuy Yawi at longan sabaliwa ngay taw Amun: “Am tagseg Mulek fag fagsegan, wain ay fagnamanwanun sas Gad fag ngay furuan? O nunda Israel we kasugfunanan ya at nangagbilug kanya fag daga?

² “Au, Yawi, glong au te, kadasug ban sik menit, namafawayan au sik ngay fawayan sas Raba. Namarasras kban ay furuan daul, ay girug ban ay ngay furuan ayu sirut tagsi ay ngay ligung. Siginan ban takatanya fag balyawvtan, ngay taw Israel nangaiyan ngay taw at naiyan anya fagayu.

³ “Ngay taw Kesbun waywayi maksvn, aroro furuan Ai anrasras wan. Am fag ngay taw Raba, waywayi yangay ay suluni saku, ay foyfoliani sas tigyangan alad laman gfalag am te, kabalu am. Ay e namuba ban ay fagsegan Mulek, ay e nantaban at ngay tagfon fanggalangun ay at tagfangguna.

⁴ Am fag ngay taw takamabo, wain ay fakamatungudunun ay gamasun tangayu nu ggutlu? Gafanud am sa ay ngay ramraman ay glong am te, ‘We namawayan ya emi.’

⁵ Au ay Fun, Yawi at Mabalyanan, namadasug kban sa ayu ngay fawayan tagsiginan ay ligung fag ngay talun laman namalimu ayu, ay nangaiyan ayu siginan ay talun ay wa ban e ggubuk ya ayu.

⁶ Dewa katanya, gfafoli kyay ban Amun at fagmanabayanun. Au, Yawi, taglong tuy.”

Sik Foyungan sabaliwas Edum

⁷ Katatuy Yawi at Mabalyanan at longan sabaliwas Edum: “Dada wan at ke fagsafulun sis Teman? O we tagsaful ya gfalu longan?

⁸ “Am, fag ngay taw Dedan, lagyui ay nanuksuan am sa sangay luib. Aroro gfadasug kban faurianan sas Isaw at kasugfunanan gina kban gfaurianan anya fagayu.

⁹ Ay o nunda taggutlu ubas wa gfasawad ya tibak rawvg laman sat ngay yud e kwa? O nunda tagfangkamul nu nasakbo sa ay bale sad yabi at fagnamulun bunwa at fakaylatun?

¹⁰ Ay kanya ban fagayu nanrvbvy ay nangagbilug Isaw at ngay kasugfunanan at ngay ramraman. Namul kwan at fagsuksuanan at faningding laman kanya fagayu we fagnanuksuanan ya. Nu katanya, umbul ban at ngay sisian, at ngay kalongan ay at ngay fasabale, ay wa ban e sawad ya.

¹¹ Dewa katanya, kafamato ban si angku ay ngay kaiban at yud e fagtainan ya, ay nanggubuk kban anya fagayu. Ay ay ngay fagbubayun ban gseg tua angku.”

¹² Yawi nalong yay fia te, “At yud e asalanan nu gidapan way, o am ro wam gidapan? Matuyan gfaurianan kban ayu.

¹³ Gtuyan au te, furuan Busra ban umrasras wan. Ay malimu ban at kayaunanan, ay gafalingunan ay gafaurianan. Ay fagayu ban at furuan marasrasan way gugat. Au, Yawi, taglong tuy.”

¹⁴ Nadungug au sik longan siginans Yawi. E nasugu sik tagfosuk longan sa sangay talun laman nanlong te, “Wainyayam, namawayan watam talun Edum.”

¹⁵ Yawi nalong sa sangay taw Edum te, “Namakata au ayu sik yud e fagmakatuun fag talun, ay tagafalingunan maksvn sas fagayu taw.

¹⁶ Gfaseg wayam ay ngay sadili, siginan nu kamatungudun am glong te, we mababo ayu aroro gbanwan am sis wa gang tagsis tungud fungsu. Dewa ban am kata sik bio tangabat nu glayug, ay dewa ban am nawat ay fagbanwanan kabat bio at fagfugadan, gfatong kway ban ayu. Au, Yawi, taglong tuy.”

¹⁷ Yawi nalong yay fia te, “Edum ban at kayaunanan maksvn nu malimu. Ay fagayu ban tagdalan sanya fag furuan garinun ay gfalingun sat kinfasludan.

¹⁸ Nu setain Suduma ay Gumura ay tagsit ligung fag ngay furuan nu karasras, katanya yangay ban takafasludan sas Edum, ay wa ban e gbanwan ya sanya. Au, Yawi, taglong tuy.

¹⁹ Sik liun tagsiginan at fagsuksuanan sis tigyangan Liskung Urdan gfarapyagan ngay tupa tagsis fagfafangonan sis day liskung. Katanya yangay ban nu namafalo au ngay taw Edum siginan at talun, ay namatigwanan kban at talun sa ku nafili fag ngay taw. Sinu takata angku? Sinu at manamaskud namabadbaboan angku? Sinu fag tagfangguna at manamawayan angku?

²⁰ Nu katanya, dungugani, katatuy ku algan ku fagnamakamulunun sas Edum ay sa sangay taw Teman: Gtaban kban at ngay sisian ay nanrasras kban at ngay fagbanwanan.

²¹ Ay at kaksvnan ban nu grasras au talun Edum, daga guigan ay at ngay taw ban nu gwayway kadungug sas Dagat Maraska.

²² Damai! Ngay fawayan kata sik bio masakit nu glayug laman nanggamat ngay taw Busra. Ay ginanya ban fag ngay buknga, Edum at ngay tagfawayan gtadtaruyan kalimu kata sik mangena tagafasalugun wan.”

Sik Foyungan sabaliwas Damasku

²³ Katatuy Yawi at longan sabaliwas Damasku: “Ngay taw Amat ay ngay taw Arpad kalimu at nadungug fag barita at malimu. Kanya fagayu gidapan ay gafanawa ay wa kagwanta kata dagat nu glugwak.

²⁴ Ngay taw Damasku kamomuy ay glagyu aroro kalimu. Kanya fagayu maksvn nu kalimu, ay gidapan gamatangan kata sik mangena tagafasalugun.

²⁵ Takadungug ay at mabayan fag furuan Damasku naiyanan wan.

²⁶ At ngay baguama ban ay anggan at ngay tagfawayan kabul wan sa sangay fagaweanan.

²⁷ Girug kban Damasku at ngay alad, anggan fun Ben-Adad at bale daul.”

Sik Foyungan sabaliwas Kedar ay Kasur

²⁸ Katatuy Yawi at longan sabaliwas Kedar ay Kasur at ngay fagfagtainanan, Nabukudunusur, Babilunya at fun, at nagbilug: “Falganani ay namawayan am Kedar. Famini wan kanya fag ngay taw tagbanwan sis fakamenitan.

²⁹ Agoi wan at ngay bale ramit, at ngay fagbaugun, ngay fagayudanun, ay at ngay kamelyu. Ay kanya ban fagayu guro te, ‘Tam ngay fawayan at malimu maligung wan si antam.’

³⁰ Ngay taw Kasur, abanganani tua ay lagyui wan! Au Yawi glong au ayu te, nanuksuan wam sa sangay luib. Nabukudunusur, Babilunya at fun, e algan namaurianan ayu.

³¹ Au Yawi, nasugu kwan sa anya fagayu te, namawayan am ngay taw at manabayan ay at yud e fagafanawaun. At sakbawan furuan we dingding, ay kanya way lang fagayu tagbanwan sit furuan.

³² Ay fagayu ban at kamelyu ay fagayu at fagbaugun am wan tagagbilug. Gfasaruayan kban kanya fag ngay taw sa tangayayu fag ngay talun ay gfadasug kban sa anya fagayu ngay faurianan dewa ndaginan. Au, Yawi, taglong tuy.

³³ Kabavn ban mabalu way lang sis furuan Kasur; tagbanwan ban sanya idu talun way lang.”

Sik Foyungan sabaliwas Elam

³⁴ Katatuy Yawi at longan sas Eremyas sabaliwas Elam, gina Sedekya gfasigad gfunan sis Uda:

³⁵ Yawi at Mabalyanan nalong te, “Namabul kban Elam at ngay tagsaful gagbilug godun, ay at ngay tagsaful fia gfawayan.

³⁶ At ngay fawayan ban kadasug dewa ndaginan ay namawayan sas Elam, ay gfasaruayan kban at ngay taw tagbanwan sanya nusnga nday, ay glagyu ban sas fagayu talun sas fagdaul daga.

³⁷ Namamin kwan anya fagayu siginan at ngay fawayan takaylat namabul. Ay gfadasug kban sa anya fagayu sik faurianan, aroro maksvn wan nu kadotama au anya fagayu. Au, Yawi, taglong tuy. Gfadasug kban ngay fawayan sa anya fagayu yakmay ban kanya fagayu ankamin.

³⁸ Gfabul kban talun Elam at fun ay at ngay tagfangguna ay namasanya kban ku faglunggungan.

³⁹ Dewa katanya, gfafoli kyay ban sas Elam at fagmanabayanun. Au, Yawi, taglong tuy.”