Eremyas 48 - Fanawbuid tagsibaliwas Fakayabian

Sik Foyungan sabaliwas Muab

¹ Katatuy Yawi at Mabalyanan, Israel at Dius, at longan sabaliwas Muab: “Afanyuan furuan Nebu aroro e nanrasras wan. Ay furuan Kiryataim umke fakaplaun ay e tumaban ban kafag furuan at ngay taw, ay at fagnansarigan fag bale tangabat karufa wan.

² Wa ban kafauseganan ya Muab aroro Kesbun at ngay tagfawayan e algan wan namawayan kafag talun. Ay o Madmen, am ngay fawayan ban namawayan emu ay namamin am ngay tagbanwan.

³ Dungugani ngay taw Kurunaim nu guro aroro maksvn wan sanya nu gawayan ay nu e gfaurianan anya fagayu.

⁴ Talun Muab ban karasras wan ay fagayu at ngay sisian gwaywayan wan.

⁵ Ngay taw Muab maksvn nu gwayway gina gundaud sas furuan Luit ay gina gtagbung sas furuan Kurunaim. Ay kanya fagayu gwayway aroro sat maksvn fag faurianan.

⁶ Falangfei ay ngay sadili! Ay lagyui wan sas talun at yud e taw.

⁷ Ngay taw Muab, nu gafanud am sa way ay fagmakatuun ay sa ay ngay ramraman. Nu katanya, e tumaban ban ayu gasfuan ay fagsegan Kemus ay anggan at ngay tagfon fanggalangun ay at ngay tagfangguna.

⁸ Kadasug ban at nanrasras sa ay ngay furuan ay wa ban e kalangfe ya. Ay fagayu ban furuan tagsisad datag ay tagsis tungud buksul fag datag umrasras wan. Umfasludan ban takatanya aroro Yawi wan at nalong.

⁹ Muab nangus e fakfak tua laman ro kanya glayug wan kayayu, aroro at ngay furuan we fanambagun ya ay we gbanwan ya.

¹⁰ Faurianani sik taw tagfalibangun nu gfakamulun Yawi at nafafakamulun sa anya gina gfaurianan talun Muab. Faurianani yangay sik taw at yud gfabul ngay taw Muab.

¹¹ Siginan ebi ngay taw Muab manabayan nu gbanwan. Muab kata sik fanlangu at yud batang e gfalelegan ay at yud batang e gfalin sat bagu fag fagsuadan, nu katanya, katanya tua gugat nu kanamnam ay nu kayuk.

¹² Dewa katanya, kadasug ban sik menit nansugu kban sik gaban taw laman nangugwag ngay taw Muab siginan sik ngay baringan. Sanya ginan nanrufa kwan kafag ngay baringan.

¹³ Ngay taw Muab ban at fagsegan Kemus gfae fakaplaun anya fagayu, kata at kinfasludan sis Betel, ngay taw Israel nu kae fakaplaun aroro sat fagsegan.

¹⁴ Ngay taw Muab kamatungudun te, at ngay tagfawayan maseganama nu gfawayan.

¹⁵ Dewa katanya, talun Muab ban karasras wan anggan at fagagbilugun fag ngay furuan. Ay e gfabul ban at ngay baguama at maseganama. Au, Yawi at Mabalyanan, taglong tuy.

¹⁶ Munakbang wan talun Muab nu kafaurianan.

¹⁷ Fagayu am Muab at fagudgubukan, waywayi wan! Longi te, ‘Anrasras wan Muab! At bangko anlifung wan at fagtoglagan te, mabalyanan ay maseganama.’

¹⁸ Am fag ngay taw Dibun, fababauni ay nanmalunggung am sas dafug aroro at narasras talun Muab namawayan yangay ban ayu, ay nanrasras yangay ban ay ngay furuan ayu daul ke ngay alad.

¹⁹ Am, ngay taw Aruer, nanmalindug am sas day dalan ay uliti. Ay intoi sat nalagyu te, nataw at kinfasludan?

²⁰ Ay kanya ro fagayu gbalus ayu te, ‘Muab anrasras wan ay anke fakaplaun. Uroi ay waywayi ay fadungugi sas Arnun te, talun Muab anrasras wan.’

²¹ Gfaurianan yangay ban ngay furuan tagsisad datag: furuan Kulun, Yaas, Mefaat,

²² Dibun, Nebu, Bet-Diblataim,

²³ Kiryataim, Bet-Gamul, Bet-Meun,

²⁴ Keryut ay Busra. Faurianan kadasug wan sanya fag ngay furuan tagsis Muab, dewa tangayayu ay at munakbang.

²⁵ Muab we fagmabalyananun ya ay katsi mamomuy wan. Au, Yawi, taglong tuy.

²⁶ Falangui wan Muab aroro kanya natalyuyan angku. Ay kanya gtaygilidan sit sadili fangkok ay e gfalingun anya.

²⁷ Am, ngay taw Muab, o nunda wam nafalingun taw Israel? O nunda nalag am kanya nu gfangkamul? Wain ay fagfalingunun anya siginan nu gligbat am?

²⁸ Loi wan siginan ay furuan ay namanwan am sa tagagangun fag talun, kata ngay alfasang nu gfugad sa sangay luib si tangabat fag fungsu.

²⁹ At kaksvn nu kamatungudun am. Nadungug au nu se aksvn nu kamatungudun am kamanagsag.

³⁰ Au Yawi, nasaful au te, kaksvn nya nu kamatungudun am, dewa katanya, we tungkul.

³¹ Nu katanya, gwayway au laman sa sangay taw Muab ay sa sangay taw Kir-Kareset.

³² Gwayway kyangay laman sa sangay taw Sibma, aksvn yap tua nu gwayway au laman sa sangay taw Aser. Sibma, kata way o sik tanuman wat ubas at sanga at kindasug sat Mabulan fag Dagat ay nadasug yangay sas Aser. Dewa katanya katsi, ngay tagrasras nafamin wan am rawvg.

³³ Sis talun Muab we guro ya guseganan ay gfanagsag sa sangay gamasun ay sa sangay tanuman wat ubas. Ay we gfamilugan ya sit ngay fagturisan. Ay we guro ya guseganan gturis sa sangay fagturisan. E guro yay oma dewa katanya, bunwa te, guseganan.

³⁴ Ngay taw Kesbun nu gwayway kadungug tua sas Elyale ay sas Yaas. Ngay taw Suar nu gwayway kadungug sas Kurunaim ay sas Eglat-Selisya, aroro Liskung Nimrim anlanggang wan.

³⁵ Namaragang kwan ngay tagfon fanggalangun nu gfon fanggalangun sa sangay tungud buksul fag ngay bale fagnansegan, ay nu nangirug at famaebebanglu sat ngay fagsegan. Au, Yawi, taglong tuy.

³⁶ Nu katanya, maksvn nu gwayway au sa ku amatanganan laman sa sangay taw Muab ay sa sangay taw Kir-Kareset, kata at mabaluanan fag awang laman sat kinbul. Ay nalyam wan at ngay ramraman.

³⁷ Galay sik taw nafalag te, kabalu siginan nu gfalanu at alfuyu, nu gufo at ngay umi, ay nu gfilas at ngay take ay nu gsulun laman famasaful te, kabalu.

³⁸ Ngay taw gwayway wan sat ngay mesa bale ay sa sangay fagaweanan, aroro narasras kwan talun Muab kata sik tikung at kinrufa at yud e nangasalag ya.

³⁹ Maksvn wan Muab nu marasrasan! Dungugani at ngay tagbanwan nu gwayway. Maksvn wan Muab nu mapla. Tibak talun tagsit ligung maksvn nu gfalingun ay nu kauri anya.”

⁴⁰ Yawi glong yay fia te, “Damai! Muab at ngay fawayan kata sik bio at masakit nu glayug laman nanggamat at fagnangonun.

⁴¹ Ay e nangagbilug wan tagsis Muab fag ngay furuan ay at mogat fag ngay fagsuksuanan. Ginanya ban fag ngay menit, Muab at ngay tagfawayan kalimu maksvn kata sik mangena tagafasalugun.

⁴² Talun Muab karasras wan aroro natalyuyan Yawi.

⁴³ Ngay taw Muab ban kadasug sa sik malimu, sa sik lusung ay sa sik sangdaw.

⁴⁴ Nusnga sinu ban at nalagyu aroro kalimu umtong sasad lusung. Ay nusnga sinu at kinlangfe siginans lusung umsangdaw sas sangdaw, aroro gfaurianan kwan Muab nu ndasug ban ku nafalganan fag buknga. Au, Yawi, taglong tuy.

⁴⁵ Afanyuan ban at nalagyu ay takaylat nanuksuan sas Kesbun. Ay Kesbun, fun Sikun at fagfagtainanan kairug ban anggan ngay buksul, ngay taw Muab at fagnanuksuanan ay at fakaylatun namawayan.

⁴⁶ Ngay taw Muab, afanyuan am! Am fag ngay taw tagseg Kemus fag fagsegan, e nantaban wan ay ngay sisian.

⁴⁷ Dewa katanya, kadasug ban sik menit, gfafoli kyay ban talun Muab at kayaunanan. Au, Yawi, taglong tuy.” Kata kanya at foyungan sabaliwas talun Muab.