Eremyas 46 - Fanawbuid tagsibaliwas Fakayabian

Sik Foyungan sabaliwa ngay Talun

¹ Katatuy Yawi at longan sas Eremyas fag taglong sabaliwa ngay talun.

² Katatuy at foyungan sabaliwas talun Igiptu at fun Neku at ngay tagfawayan. Talun Babilunya at fun nababo anya fagayu sis Karkemis munakbang sis Liskung Eufrates, ebi sis faufatk banwa Yuyakim, fun Usyas at baguama, nu gfunan sis Uda. Katatuy at foyungan sabaliwas Igiptu at fun Neku at ngay tagfawayan:

^3-4 “Falganani ay ngay famalabag. Suluni ay ngay fangalfuyu ay fataresi ay ngay bangko ay taudi ay ngay famawayan. Falganani yangay ay ngay kabayu ay loi sas awayan!

⁵ Dewa katanya, nataw ku lagan? Gsugudan am gtadtaruyan kalimu. Nababawan am ay glagyu masakit yud gfanligbatan ya aroro at kaksvnan nu kalimu am.

⁶ Dewa am maseganama ay masakit gtarung, wam malagyu ya. Kataygilid ban am ay kabul sis fawalan fag alvngvdan, munakbang sis Liskung Eufrates.

⁷ Sinu kanya fag talun at kinbalyanan, kata Liskung Nilu at mamam nu gsakfo tigyangan?

⁸ Kanya talun Igiptu, at kinbalyanan kata Liskung Nilu at mamam nu gsakfo tigyangan. Igiptu at fun glong te, ‘Ansik mabalyanan au, kata sik lugwak nu kapnu sas fagdaul daga. Namamin kwa fia ngay furuan ay anggan ngay taw tagsanya.’

⁹ Ngay taw Igiptu, fatarungi wan ay ngay kabayu ke ngay faguyudan fangawayan! Fagayu am ay anggan ay ngay fagudgubukan fag ngay taw Etiupya, Put, ay Lidya tagsaful gagbilug ngay famalabag ay godun.

¹⁰ Dewa katanya, tam Fun, Yawi at Mabalyanan gbabo ban gina nawayan. Ay ginanya ban kanya mafasud sat ngay fawayan. At fiso kata sik mangilafang takalunus at nangon kafag ngay taw yakmay napsug, ay at nanginum at taguk yakmay napyan. Ay kanya ban fag ngay taw at ngay bilug at mabulan, kata ban sik ngay fanggalangun sa tam Fun, Yawi at Mabalyanan, tagsi sangay furuan sas fawalan fag alvngvdan, munakbang sis Liskung Eufrates.

¹¹ Ngay taw Igiptu, dewa ban am glao sas Gilyad laman nanrvbvy ay famafia, fagayu ban famafia we mafafia ya ayu.

¹² Ay fagayu ban talun sas fagdaul daga sumaful ay fagmaplaun ay anggan ay fagwaywayun. Ay ay ngay tagfawayan ban umbul gtudtungudan.”

¹³ Katatuy Yawi at longan sas Eremyas fag taglong sabaliwa fun Nabukudunusur talun Babilunya at fun nu namawayan talun Igiptu:

¹⁴ “Foyungi ku longan sas talun Igiptu, sa sangay furuan Migdul, Memfis, ay Takpanes: Falganani aroro mafalganan wan fiso tagsumbalian at uyup laman namabul ayu.

¹⁵ Wain ay ngay tagfawayan at maseganama at fagnalagyuun? Kanya fagayu nalagyu aroro Yawi naiyan.

¹⁶ Ay ngay tagfawayan antaygilid gtudtungudan. Ay kanya ban fagayu glong te, ‘Alindugi wan, guli watam sa tam fakasalugan fag furuan, sa tam ngay kaiban laman masaruy tam tam ngay fawayan at fiso.’

¹⁷ Ay glong yangay ban te, ‘Faraun, Igiptu at fun, matuyan nu garingang; dewa katanya, gfangulan way at ngay buknga.’

¹⁸ Au Yawi at Mabalyanan ay Fun, gfatuyanan au te, kafanud nu gleleg au, e namabo ban talun Igiptu amabitsug yap tua tibak fawayan, kata Buksul Tabur tagsis wabilug ngay buksul, ay buksul Karmel tagsis tigyangan dagat.

¹⁹ Ngay taw Igiptu, falganani ay ngay famubaun aroro e nantaban wan ayu. Ay Memfis ban karasras ay umsik mabaluanan, aroro wa ban e gbanwan ya sanya.

²⁰ Talun Igiptu kata sik tumad baka, dewa katanya, e sik ngay tuma kadasug siginans fawalan fag alvngvdan laman nangalafang anya.

²¹ Ay anggan ban at fagbayadun fag ngay tagfawayan kafoli glagyu. Kanya fagayu kata at nafataglu fag ngay fagbaugun tumad laman at fagnamabulun. Umfasludan ban takatanya, aroro ginanya wan at buknga laman namaurianan ay namamin ngay taw Igiptu.

²² Ngay taw Igiptu glagyu kata sik ule at masakit, gina at ngay fawayan namawayan. Ay at ngay fawayan kadasug e buba ngay wase kata ngay taw nu namuan ngay kayu.

²³ Kanya fagayu namabul ngay taw Igiptu kata nu namuan at marabung fag ngay kayu. Ay kanya fag ngay fawayan ayu yap tua ngay liung yud e mafatap ya.

²⁴ Ngay taw Igiptu umke fakaplaun. Gfagbilug ban anya fagayu sa sangay taw tagbanwan sis fawalan fag alvngvdan.”

²⁵ Yawi at Mabalyanan, Israel at Dius, glong yay fia te, “Namaurianan kwan Amun, furuan Tebes at fagsegan, ay tiba yak fagsegan sis talun Igiptu. Ay namaurianan kyangay ban Igiptu at fun anggan at ngay tagfangguna, ay anggan fagayu tagseg anya.

²⁶ Namon kban anya fagayu sas nusnga sinu takaylat gfabul anya fagayu, sas Nabukudunusur, Babilunya at fun, ay sat ngay tagfangguna. Dewa katanya, kadasug yangay ban at buknga, ngay taw nu gdog namanwan sas talun Igiptu kata ebi taguna. Au, Yawi, taglong tuy.

²⁷ Ngay taw Israel, ku fagsuguan Akub at ngay kasugfunanan, lag am kamomuy ay kalimu aroro gfalangfe kban ayu siginan tangayayu fag talun nu inda nu gatabanan am. Gdog yay ban am namanwan manabayan, ay wa ban e kadasug ya sa ayu fagidapun, ay we mafalimu ya ayu.

²⁸ Nu katanya, ku fagsuguan Akub at ngay kasugfunanan, lag am kalimu, aroro gufud kban ayu. Namamin kban ngay talun nusnga nday nu gfasaruayan au ayu, dewa katanya, kwa ban gfamin ayu. Namaurianan kban ayu tagalvngvdan sa ay fagmauriun. Wa masine kway ban gfaurianan ayu. Au, Yawi, taglong tuy.”